掃呢頁CODE去手機

2015年1月7日 星期三

[FACE - 398 - 專訪] 撈足 17年 自比林志玲 黃榕打不死:佢 40歲都仲做緊啦! 志玲,黃榕,林志玲,MF,




真人騷

撈足 17年 自比林志玲 黃榕打不死:佢 40歲都仲做緊

約黃榕做訪問容易,她時間很多;度相亦容易,不管多性感她都說沒問題;最難的,是給她定位。

說她𡃁模,事實上她四年前出第一本寫真時已經年過三十;說她藝人,她有甚麼演藝作品,唔只你同我,連她自己也半天說不出;說她是 nobody,偏偏總看到她傍住綠魔夜蒲上報,濕碎如俾仔飛也能喊爆撈到版位;只好勉強把她歸類成陳冠希前度之一,她卻口硬:「始終我唔想捲入呢啲唔好嘅新聞,唔想同佢嘅名連埋一齊講。」

吓?做完訪問黃榕翌日就要北上,南京江西珠三角連走幾場,場場袋幾萬人仔,冇希哥,難道你又可以有今日?叫得起呢個價?呢下我真心替希哥不值,淪落到如此田地,竟然被黃榕嫌……其實與黃榕對話,這就是趣位所在,說她年紀不小,她自比林志玲:「林志玲四十歲都仲做緊」

說她沒有賣點,她說聽她捽碟班客有內涵:「都有人係想聽音樂!」

說她唔怕悶年年拍寫真,她說那是自己巴閉:「啲𡃁模拍完一年都唔見晒」

兩個字:奇葩!

聽聽下她那套謬論,我都差點由藐爆變成敬仰:一個既不年輕也不貌美,身材不是最好、天份幾乎沒有、智慧能見度屬於低的女子,竟然能在娛樂圈[!994B]立不倒 17年,說實在的,這就是能耐。

陳冠希叫我做佢女朋友!

整個新年都離港工作?

係呀,南京、江西、深圳兩場,一個騷有幾萬蚊人民幣,聖誕新年係我旺季。

宣傳海報都係「陳冠希舊愛」?

我控制唔到,通常都係「陳冠希緋聞女朋友」,最近我有要求佢哋唔好寫人哋嘅名,就變咗「香港性感女神」。都有「艷照門」出現過,佢哋以為我有份,但我重申,係冇嘅。

你係覺得好彩冇你份,定覺得蝕咗:「點解冇我?」

梗係好彩啦,我仲要嫁人㗎!佢(陳冠希)又唔係我老公,始終唔想捲入呢啲唔好嘅新聞,唔想同佢嘅名連埋一齊。

但係冇佢嘅名,你出騷叫唔叫到呢個價?

唔需要囉,我喺內地好好發展……

淨係靠你自己個名可以攞到呢個價?

唔關佢事,都係我出寫真後先至有人搵我去內地登台,雖然佢真係紅好多、我真係因為佢多咗人識,但自己唔想靠佢嚟賺錢囉。我都係講事實,真係有委屈至會講出嚟,唔係好似人哋咁講,利用人哋搏新聞搏版面。

陳冠希算係你前男友定前性伴?

我當佢係男朋友嚟㗎,因為佢有承認過我。

佢同邊個承認過?

同我囉!大家有一個共識,我先至會同佢一齊。我都唔係一開始就答應佢……

答應佢做女朋友定有性關係?

唔係做……係交往,佢都係問我可唔可以做佢女朋友,透過 sms,佢好關心我,我嫲嫲唔喺度,佢話會照顧我、會體諒我在先。我最唔開心嘅時候,有人關心我,仲要咁靚仔,我最鍾意靚仔又有肌肉仲要識氹人。佢會同我傾偈會話掛住我,其實都係好表面嘅嘢,但係 03年,我仲細,就係咁易信佢。

我嘅專業叫性感女星!

乜佢 03年唔係同陳文媛一齊咩?

我記得係 Rosanne,我有懷疑,但係佢同我講唔係。

佢有冇帶你去街?

冇呀,次次喺屋企見,但又唔係次次都係發生關係……我哋都會傾偈嘅。都有正常睇戲食嘢傾偈嘅。

你既然唔係抽水紙上明星、年紀又唔細做唔成𡃁模、冇拍過咩戲唔算係藝人,其實你嘅定位係乜?

我諗我嘅定位係性感女星。講作品,我都有拍過電影,可能比較早期,近年,就係出席活動為主。

何去何從呢喺呢個圈子?

我都有增值自己,學國語、學打碟、學跳舞……

都 34歲先走嚟增值自己、先學跳舞,會唔會太遲?

係有啲遲,但總好過乜都唔做。 try my best囉。

34歲先學打碟?

我喺中環見過有個阿伯打碟添!都有人係想聽音樂嘅……

邊個入場睇你係為咗聽音樂?

有一啲人係膚淺係真,淨係想睇我性感,但係真係有人聽音樂係有內涵,鍾意聽因為我打碟打得好。

林志玲四十歲都做緊!

始終年紀會大身材會走樣,下一步呢?

我都有保養,都有做運動。

再保養,都唔會夠身材走樣走得快喎!

哈哈哈……都冇辦法嘅。我都有勤做運動,勤做 facial。

到四十歲呢?你諗你做緊乜?

我諗我都係工作緊,林志玲都四十歲雖然冇得同啲𡃁妹比,但係四十歲都仲可以靠自己工作嘅。

你都俾𡃁模潤得多,話你老。

年年都係呢個 point……佢哋淨係識用我嘅年紀嚟攻擊我,四年嚟書展都係咁,都冇新意。

但係佢哋又講得啱喎!

始終用年紀攻擊人,我覺得佢哋有唔啱,佢哋都會到呢個年紀,都會老。

唔只係老,佢哋可能覺得自己到你年紀唔使再拍寫真?

係佢哋冇得撈啫,好多影完一年都唔見咗人啦。

撐係要嘅,但係你真正擔唔擔心咁樣到幾多歲?

都有諗過嘅其實,都三十幾歲,可能五、六十歲就唔會再喺呢一行,儲咗筆錢、做緊生意仔,總唔能夠年老色衰都仲喺呢行。

俾人包我寧願用錢貼仔!

事業最低迷係幾時?

未興𡃁模嗰陣時,都有呢啲時候,又窮又冇嘢做,雖然未去到戶口得 7個 9,但成個月先得一個泳衣騷,先得嗰二、三千,真係好驚,死喇……點算好呢?雖然屋企唔使我養,但咁大個人幾千蚊都搵唔到……真係……再加上身邊嘅人都係負面,啲 model朋友又係冇工開……

鬥霉?

係啦,我已經夠負面,仲要聽埋咁多負面嘢……

所以𠵱家叫好好?雖然形象差,但起碼搵到錢?

係㗎,佢哋笑我,但佢哋都冇呢啲騷接,或者就算有,都唔係我呢個價,趁住呢個時候,搵得幾多搵幾多。

其實你攰唔攰?咁嘅年紀仲要晚晚去夜場搵錢?

好攰㗎!有冇 24歲時咁好氣?我又覺得我可以,可能平時做開運動啩,未去到嗰一日,覺得已經老、已經冇晒 energy,所以真係搵得幾多搵幾多,我都算勤力,又算係好慳。一講到錢,我企得好硬。

會唔會為咗錢陪老細食飯?

呢樣嘢我唔得,一入行已經大把,我開頭仲唔明,點解啲人叫我去飲嘢仲要俾番錢我……好多人開價,試過問一晚二十萬得唔得。梗係唔得啦,做咗我要睇心理醫生囉!因為我鍾意靚仔㗎嘛,我寧願攞啲錢去貼仔囉。

有冇貼過仔?

又唔係好嚴重嘅貼,請食飯就有,買嘢俾佢、開房就唔到我俾。最多都係消費、唱 K,幫佢俾埋佢嗰份,靚仔真係我死穴。

咁啲有錢佬又點追你?

我唯一收過嘅係有個佛山老闆,送個佛牌俾我,話係象牙值成一百萬,因為係佛牌、我又信呢啲,先至會收。都有試過富二代交往,都出名、成日上報紙嗰啲,但係佢哋開口埋口都係錢,我食餐飯幾多錢、揸架車又幾多錢,永遠係錢錢錢錢,我唔鍾意。

你𠵱家 dating緊呢個又係咩來頭?

都係 model,我諗佢冇乜錢,又細過我……但係我唔會擺真感情落去,一齊開心咪算囉。我以前愛情係第一位,但係之前嗰個……嗯……唉……

你去嗰啲地方識男仔,識埋嗰啲梗係落去搵食㗎

工作場合識㗎,我覺得唔關事,係啲男人就係衰。

你工作嘅地方咪又係夜場?你唔試下去教會、圖書館識男仔?

咁係得呢啲場合先至識到男仔嘛……我覺得都係男人衰,個個都係追到你、上過床就會失蹤。我都諗過,賺夠就去第二個國家,外國人唔知我咩背景、同埋外國人唔係好識睇中國人年齡。

會唔會因為你形象問題,個個男仔以為你好隨便?

我明嘅,所以我同人交往通常都會講清楚我唔係咁隨便嘅女仔,可能因為咁,佢哋總係發生完關係就會走,再搵唔到人。

遇過幾多個男朋友𡁻完鬆?

太多個,我冇數過……我唔可以一夜情,明知佢哋一得手就會走就唔馨香,都兩三個月先至俾佢哋,點知都係咁。

成剝之路

唔講真係冇人深究過,原來黃榕原名黃立意,蠻有氣質。

住觀塘讀女校,父親是公務員,想當年亦曾經是個面皮好薄的普通女孩。

「都係第一次影雜誌封面,唔知頭唔知路就話要全裸 body painting,俾人氹兩句我就耳仔軟,搞到啲親戚朋友指住阿爸阿媽話點解你個女咁唔檢點;然後第一次上報就話我做成人網站主持,其實嗰份工我做咗兩日已經唔撈,又要着得性感、又要對住電話呻吟,聽第一個電話已經喊……我本來都係一個普通女仔,但係𠵱家面皮已經由超級薄練到超級厚。其實我心裡面都仲係嗰個小女孩,諗嘢好純真。」

呢句我認同,表面上 34歲,黃榕的談吐和情商絕對不過 24歲,的確還是那個小女孩,叫得起做模有餘。



鍾意就快D Share啦!