2015年1月7日 星期三

[FACE - 398] 「亞視王子」蔡國威:唔介意拖糧 用我份糧救其他同事 亞視,蔡國威,MF,




爆 Like王

「亞視王子」蔡國威:唔介意拖糧 用我份糧救其他同事

嚟到 15年,但亞視連上年 11月份糧都只係出咗一半,雖然有員工頂唔住離職,不過喺亞視做咗 20年,有「六合彩王子」之稱嘅蔡國威,就話呢刻一定唔跳船。仲死忠話拖佢三個月糧都會繼續做,就算攞佢份糧出畀其他人都冇所謂,因為佢好想亞視撐得住,他說:「我覺得低處冇得再低㗎喇,即係已經見到底喇,係希望回彈嗰下!」

F:點解亞視成日出現例如台慶掟壽包呢啲核突事?

蔡國威力撐亞視,但講到掟壽包,就連佢都覺得高層有責任,他說:「如果當日有人嗌停,就唔會發生呢件事。」

蔡:我當日都喺台上面,我嗰一刻其實都有質疑過,我會覺得原先安排咗嘅嘢,要做呢個動作,咁預設嘅畫面應該有好多人喺個場度,如果你咁做啲人會好開心。但當日喺台上我嗰刻會諗呢個動作係咪應該 cut咗佢呢?但冇人通知我哋。咁有啲演員比較新啲,佢哋控制唔到,貪得意咁咪走去掟囉。咁就形成咗呢個畫面,如果嗰刻通知到所有藝人,喂!你哋唔好掟,就可能冇呢件事發生。

F:亞視欠你 3個月糧,你仍堅守?

蔡國威主持六合彩節目 9年,問到佢有冇中過六合彩,他說:「有!我期期都有買,嗰次中咗 5個字,但當日唔係我主持,我希望再中!」

蔡:如果公司好坦白話爭你 3個月糧, 3個月後我一定可以有新股東,可以出番糧畀你,跟住繼續好暢順可以有新嘅製作,我可以同佢捱。

甚至如果我冇得出,其他同事有,又覺得用我份糧救得到其他同事,我唔介意冇,但要係一個好短的時間。

F:你會點形容𠵱家嘅亞視?

蔡:我會形容係谷底之中的谷底㗎喇,但求佢極地反彈囉。我覺得低處冇得再低㗎喇。即係已經見到底喇,係希望回彈嗰下!

F:好多舊同事過咗大台都紅咗,你點解唔去呢?

蔡:我諗係本身性格問題,我係一個比較安穩嘅人。我唔係一個跳嚟跳去周圍試嘅人。呢個係由細到大嘅性格,一來又好似冇咩人特別問過我需唔需要過友台啦,冇咩人 contact我啦。可能我有一個比較 icon啲嘅節目啦,即係隔籬台成日都話我哋好大浸我哋嘅味,要洗底,要一段好長嘅時間。

F:又有好多人想亞視執咗佢!你有咩感覺?

亞視騎呢事件成堆,包括老闆王征喺政總門前跳舞、誤傳江澤民死訊,蔡國威話:「唔好因為一件事而無視晒所有台前幕後。」

蔡:其實都有啲唔開心,惡搞始終係唔好嘅嘢,唔係佢哋簡單一句執咗佢啦,就係咁簡單。有好多人誤解,你亞洲電視成日都重播,又冇製作,乜都冇,不如你執咗佢啦。你啲人又冇用,你啲藝員又係冇用嘅,如果係嘅話隔離台一早挖咗你啦。

我好想話畀佢哋聽其實唔係咁,亞洲電視嘅所有員工包括台前幕後,其實好專業同好精英㗎。

F:有冇人話你愚忠?

蔡:有好多人咁同我講過㗎!我自己唔係咁睇囉,始終我係收緊佢人工啦,你唔好講拖糧先啦,咁多年以嚟都係佢出糧畀我,咁多年嚟亞視畀機會我,如果你要我同呢間公司共渡難關一齊去解決問題的話!我覺得呢個係絕對需要,絕對唔係叫愚忠囉。



鍾意就快D Share啦!
Related Posts Plugin for WordPress, Blogger...