兩個演員要演戲，仲要用暗力保持身體角度，泡泡下面， Chilam仲要用雙腳頂實對方，以防郭采潔愈跣愈低。
探熱針
賀歲片 沖涼戲曝光 郭采潔辛苦張智霖
因為「 Cool魔」一角爆紅的張智霖，為了配合《衝上雲霄》電影版拍攝檔期，寧願推掉一部內地電視劇，少賺千萬人仔，錢都唔要！犧牲吸金良機， Chilam的回報是可以和對手郭采潔出浴，二人在浴缸纏綿八粒鐘，但因為浴缸設計又深又斜，為讓郭采潔保持身體角度不要向下跣， Chilam唯有全程用雙腳頂住對方下身，享受變攞苦嚟辛！
出腳相助
賀歲電影《衝上雲霄》三生三旦孭飛，三啤人三段情， Sammi和 Sam哥吳鎮宇是搖滾天后戀上飛機師、古天樂佘詩曼有泳池激嘴，還有 Cool魔張智霖與郭采潔一場浴缸纏綿。
這場重頭戲在英國以實景拍攝，埋位當日，氣溫只有兩度，為免熱水的蒸氣影響鏡頭清晰度，浴缸的水溫只暖不熱，兩位男女主角，一拍就八粒鐘。
「嗰日得一、兩度，啲暖水好快就變凍水，我哋浸喺水幾粒鐘，絕對唔係觀眾睇到鏡頭咁享受。」 Chilam說。
由於現場浴缸設計深而斜，郭采潔只要一挨落去，就會自動向下跣，要演戲，又要遷就鏡頭擺位，十分狼狽。
「個浴缸兩邊係斜嘅，挨落去完全唔貼背，挨得耐會好唔舒服，我見 KiKa（郭采潔戲中角色）好似鐵達尼咁沉落去，無法嘞！係我出腳嘅時候！為咗幫佢固定個位，我只有用雙腳頂住佢下身。本來大家唔太熟，但呢一頂，就熟晒。」 Chilam說。
鏡頭前纏綿浪漫，鏡頭外卻苦不堪言。
「埋位前要預先試位，試咗好多次，先至搵到我同 Chilam點坐法，機位點擺法，因為全程都要撐住個浴缸，我同 Chilam要做晒熱身拉筋，一啲都唔浪漫。」郭采潔說。
自動波喊
與張智霖一對的郭采潔，在戲中要接受大手術，想到女友要捱刀， Chilam埋位時竟自動加料，爆喊！
「導演其實無要求我喊，但一 roll機，自己就忍唔住。可能之前拍嘅都係溫馨場面，自己都投入咗喺段感情入面。」 Chilam說。
Cool魔、 Sam哥加埋原裝 Mr. Cool，賀歲檔同周潤發、張家輝、成龍、假男人吳君如正面交鋒，但呢一仗，最難打嗰個係要走嘅叮噹！
食胡角色
張智霖入行 24年， 91年同許秋怡合唱大熱 K歌《現代愛情故事》街知巷聞，在個人演藝事業中，「初哥哥」和「 Cool魔」兩個角色，均助他再向前邁出一大步。
《衝上雲霄 II》
13年，無綫劇《衝上雲霄 II》的「 Cool魔」一角，令 Chilam再度爆紅，在台慶頒獎禮奪「最受歡迎電視男角色」外，再獲馬來西亞星光薈萃頒獎禮的「最喜愛男主角」及「最喜愛電視角色」，成為雙料大馬視帝。
|
鍾意就快D Share啦！
|
|
|
