2015年2月11日 星期三

[FACE - 403] 送禮乜乜乜 點先做到最冧情人節? MF,




全知言

送禮乜乜乜 點先做到最冧情人節?

一年一度,情人節大日子又到相信大家都一定會花盡心思炮製一個難忘嘅情人節送畀另一半!今時今日送花送禮物好行貨喎。

全知言今個禮拜就搵嚟不同藝人同街坊,情人節究竟會用乜招數去冧爆另一半。當中娜姐嘅答案真係令人眼前一亮,自己乜都唔做等另一半安排節目!不過都要有娜姐咁嘅級數先得囉,普通人咪學呀!

徐天佑:一定要送花

我諗一定要 surprise,要畀個驚喜佢,唔使諗一啲好貴嘅禮物,但一定要有驚喜,要扮到乜嘢都冇發生,等佢預你情人節乜都唔做,但到嗰日嘅時候已經安排好餐廳同所有嘢,記住要送花喎!

周秀娜:乜都唔做

我嘅情人節必殺技就係乜都唔做、齋坐喺度、齋企喺度等人,不過我基本上都唔使等嘅。因為我覺得沙灘漫步或者食飯,呢啲嘢都係由男仔去做嘅,女仔就只係需要好開心去接受呢份心意。

董敏莉:外遊最驚喜

我諗計劃一個 surprise嘅外遊 trip會令對方意想不到,仲要喺佢完全冇準備之下直接同佢去到機場,就同佢講已經預備晒所有行程、機票同酒店,最好係去到情人節當日,喺另一個地方同佢食一餐簡單嘅晚飯。

吳千語:心意最緊要

我會寫嘢同送嘢,未必係啲好勁、好大嘅禮物,因為每個人都唔同,我會送啲比較貼心嘅嘢,可能係佢提過想要嘅嘢,而你又覺得佢會鐘意嘅嘢,再加一個好好嘅 message。

天堂鳥:手繪冧樣

Lincoln:我會揀一張有意思嘅相,畫佢個樣落去,呢份禮物應該會比較冧啲,因為自己親手做。

Tyrese:我會將一張相印出來做成一個 puzzle,再去砌番一副好完整嘅 puzzle,好似 500塊、 1000塊,用嘅時間都幾多,佢應該會幾感動。

Gordon:親手整嘅嘢一定要㗎情人節呢一日好多女仔都一定要收花,係一個例牌嘢,就算得一支都會好開心。嗰日我就會送一啲親手做嘅嘢同送一紮花。

街坊情人節 都係去旅行啦

一班街坊所用嘅招數相對平實得多,都係離唔開自製食物同出埠旅行,不過都係最緊要同自己另一半度過,咁日日都係情人節

Justin:情人節又撞正新年假期,可能請兩三日假去個短 trip嘅旅行,去吓韓國、日本呢啲地方。

嘉瑩:如果情人節,我會親手整朱古力畀男朋友,因為自己落心思去整,佢收到就會好開心。

鍾意就快D Share啦!
Related Posts Plugin for WordPress, Blogger...