掃呢頁CODE去手機

2015年2月11日 星期三

[FACE - 403 - 大專校園] 學界 MJ 桂華山中非混血兒 Slam Dunk MF,




雖然只係轉校半年多,但 MJ話學校同學大都好隨和,冇因為膚色問題驚咗佢或者排擠佢,仲喺籃球隊識到一大班隊友兼老死添!

Main Camp

學界 MJ 桂華山中非混血兒 Slam Dunk

眾所周知 MJ= Michael Jordan=波神,就算未睇過佢打波有幾神級,點都會着過 AJ潮鞋。

原來香港學界籃壇,都有個球員 MJ,雖然佢球技未必有對方咁出神入化,但外表一樣同 MJ有黑黝黝皮膚,因為佢係中非混血兒,今學年佢成功轉入學界強隊桂華山讀書。

不過呢位學界 MJ,童年原來受盡欺凌歧視。

現讀中五, 17歲的 MJ( Michael John)莊智存用純正廣東話話:

「我係土生土長嘅香港人嚟㗎!」

上週三( 4日)記者到北角桂華山與 MJ做訪問,校內無人不曉,同學跳住過嚟大嗌 MJ,身高 188cm, MJ亦十足大哥哥咁搭吓佢地膊頭,連老死兼籃球校隊隊友吳俊恆都話:「佢份人好 nice好幽默,係我哋開心果,同學都好鍾意佢。」不過原來 MJ今年先由屯門 Band 3學校轉過嚟名校桂華山重讀中五兼打校隊。

扣門考桂華山

加入名校做新仔,全因 MJ對舊校籃球隊「死心」,「以前喺東華三院鄺錫坤伉儷中學打波,一心諗住齊齊同隊友打江山,目標係 D3冠軍,點知打極都冇乜起色,啲隊友打波又唔上心,上年暑假我就向教練提出去桂華山跟操,跟咗一課之後,翁 Sir(桂華山中學籃球隊主教練翁金驊)竟然話可以推薦我入讀,結果如願以償,我讀書一般,英文最差,我轉校只係想打高水準賽事!」學校「買人」就聽得多,自薦轉校打波真係少之又少,仲要係「學界籃壇班霸」桂華山中學,相信只有 MJ先夠膽做,佢笑笑口話:「其實都係試吓,唔得咪當跟吓啲高手操練,學吓嘢囉!」

事實 MJ有一半黑人血統,先天已經俾其他同學優勝:「其他人喺 gym房日操夜操練大隻,但我喺屋企 hea吓 hea吓做掌上壓已經大隻過佢哋,同學又讚我彈跳力同體能特別好,打足全場氣都唔喘,其實都幾自豪!」現為桂華山男籃主力嘅佢更加豪言下年學界男籃精英賽勢要奪冠而回,報卻上兩屆屈居亞軍之辱!

雖然上年 D1港島區男甲奪冠,但精英賽飲恨於男拔得第二,今屆 MJ(中)誓要與桂華山隊友豪取「 4冠王」( D1港島區學界、精英賽、 Panasonic學界邀請賽、學界馬拉松),佢仲話想去國內或台灣打職業籃球。

桂華山籃球教練翁金驊

MJ勝在有身高同體型,不過要對自己再 harsh啲!

俾鄰居侮辱

當個個羨慕 MJ嘅身型體格,但原來 MJ童年受盡委屈,被唔少同齡小朋友歧視, MJ生父係尼日利亞人,佢 6、 7歲父母已經離婚,之後跟媽媽生活,雖然係香港出世,但膚色問題令佢細個成日俾鄰居欺凌, MJ媽媽仲因為咁講到激動落淚:「之前我哋住天水圍, MJ落親公園玩都會俾其他新移民鄰居歧視叫佢「阿差」,返到嚟 MJ攬住我喊,嗰刻我個心真係好痛!其實 MJ先係香港出世,佢哋係新移民,有咩資格歧視佢!」

由細到大同媽媽相依為命,所以 MJ與媽媽感情特別好,乜都傾乜都講,連感情問題都會分享,似朋友多過似阿媽,仲話如果媽媽去睇佢籃球比賽,自己會緊張到好似女朋友睇佢比賽咁!

哥哥唔識中文

原來 MJ仲有個同父異母嘅哥哥 Mcanthony John(右),但由於哥哥由細到大都係跟爸爸(尼日利亞裔)住,所以反而哥哥講得一口流利英語,中文只屬「有限公司」。

女友懶理目光

MJ喺長洲一次搶包山活動做義工識到依家嘅女朋友 Kayla, Kayla話鍾意 MJ高大得嚟好幽默,就算拍拖出街成日引嚟途人奇異目光,話當同明星出街喎!

師弟偶像

188cm嘅 MJ無論身型同高度都大同學「成個碼」,不過啲同學就話 MJ好肯教師弟打波,仲有好多同學因為咁封佢做偶像添!

兄弟拍住上

咪以為同父異母就好生疏,其實 MJ兩兄弟都會定期見面,上年暑假開始 MJ哥哥更加搬埋入去同 MJ一齊住,哥哥仲話想追隨細路步伐轉校去桂華山!

男拔 191長城勁敵

雖然 188cm嘅 MJ喺學界算好屈機,但高處未算高,死敵男拔隊中打中鋒嘅葉偉恆,身高 191cm,就被 MJ視為最大勁敵。

男拔中鋒葉偉恆

阿恆同 MJ一樣,以前都係讀 band 3中學(秀茂坪的香港道教聯合會青松中學),打波可以打到入名校。

學界 MVP

阿恆有 191cm,加上佢彈跳力強,喺上年年尾嘅學界籃球精英賽,再擊敗桂華山,而阿恆仲攞埋 MVP。

鍾意就快D Share啦!