拍拖三年難忍臭脾氣 鄺美雲撇恒基樓神：相處唔開心
現年五十二歲、坐擁五億身家的富婆鄺美雲（Cally）回復單身了，與拍拖三年的恒基「樓神」男友林達民，因性格不合而分手。有指「樓神」大男人脾氣差，Cally沒有正面承認，只表示：「相處唔開心比開心多。」她自言現階段不一定要再搵男朋友。
鄺美雲與恒基「樓神」男友林達民拍拖三年，一直都人前恩愛，昨日忽然傳出二人已分手消息。據悉，Cally去年底主動提出分開，皆因男友有潮州大男人愛面子及大脾氣的性格，個性溫和的Cally已處處遷就，但二人的生活磨擦依然未能解決，以致常常嗌交。林試過在聚會中在Cally友人面前不留情面發脾氣，之後更拂袖而去。一向工作忙、女強人性格的Cally已放低情傷投入工作，前日與本地時裝設計師何國鉦齊齊在其中環珠寶店搞私人珠寶騷，見她神采依然，而好友「洗米嫂」陳慧玲亦從澳門到來撐場。
■鄺美雲與「恒基樓神」林達民相戀三年，因性格不合已和平分手。資料圖片
「一個人都幾好」
記者昨日致電Cally，她亦大方證「分訊」：「其實冇乜嘢，咪分手囉，都好呀。」問到她二人是否和平分手？她說：「梗係啦，呢啲係緣份，人生係咁，有時聚，有時散，每個人喺你生命出現梗有原因，每個人都係為咗開心，相處時磨合唔到就不如休息吓。自己都好忙，冇乜花心思落去。」對於有指林達民大男人性格，二人經常因此吵架？Cally停了一會便說：「過去晒就唔講，我拍拖都係想開心，佢冇嘢，唔係都唔會一齊三年咁耐，但係當發覺唔開心比開心多，就要休息吓。乜嘢事都向前看，積極面對。」她更謂自己並不心急再找伴侶：「一個人都幾好，我唔一定要搵男朋友。」
■鄺美雲前日出席珠寶騷，獲好友「洗米嫂」陳慧玲撐場。互聯網圖片
林：我會祝福佢
而林達民昨回覆本報記者：「都係私人事，主因都係性格。」問到他被指潮州大男人性格？他表示：「大唔大男人睇你哋用咩角度同層面睇，我哋性格都太硬同強，係性格唔配合問題。」問到對三年情逝可惜嗎，他表示：「緣來即隨，緣去即散要分開，抵擋唔到，我會祝福佢，佢係好好嘅一個人，好善良。」
採訪：羅慧敏
|
鍾意就快D Share啦！
|
|
|
