真人騷
鴨王教落最緊要信自己 何浩文：我要做梁家輝任達華
我認我有偏見。
袁嘉敏脫掉，好像是遲早的事。
可是何浩文脫，做咩啫？靚靚仔仔，能歌善舞，係唔係一定要行到呢一步？
何浩文提提我：「梁家輝同任達華都露過股、扮過鴨，佢哋做咗影帝之後仲有邊個記得？杜汶澤都講過，演員喺鏡頭面前，身體每個部份都屬於觀眾，唔係自己。」
係，梁家輝同任達華除，是在成名以後，那叫藝術。
26歲的何浩文，第一次擔正就演《鴨王》、就扮人體刺身盛，那叫：「為做男主角，可以去得幾盡」。
直到他告訴我，那個晚上他又驚又怕請教書的父母來首映看自己全裸扮刺身盛，放映全程父子都保持沉默。深夜，何浩文給父親發了一則短訊：「唔緊要，呢個只係一個 step，我遲啲就會喺啲更高嘅位、拍啲更好嘅戲俾你哋睇！」我才開始放下偏見，看到眼前這個打開褲鈕、赤裸上身拍照的男孩子為了成功有多大決心：「有朝一日我好似梁家輝、任達華咁做咗影帝，過去就只不過係我成功路上嘅一個 step。」
是有點大口氣，我都忘了，上次遇到這麼大口氣、對自己這麼有信心的新人已經是何年何月，讓人有點兒驚喜。
除衫唔係我唯一賣點
你話過男人做鴨係因為冇錢，男星除衫係因為專業？
係，因為，身為一隻鴨，首要條件係冇錢所以放下尊嚴。做一個藝人，同做鴨最大嘅共通處，就係都需要娛樂觀眾。
當年你拍寫真，係唔係同一個原因？
因為窮，因為想搵快錢？
做模特兒叫做搵快錢，好短時間搵到錢，但維持唔得幾耐。但係做藝人，賣嘅係技能，我唔認為我唔係紙醉金迷為錢而做，真係關夢想事，我想推廣街舞、我想做好啲戲、我想做下一個任達華、梁家輝。
專業就係叫你除就要除？
我入行拍第一套劇《四葉草》時，第一次接觸，就真係人叫我做乜我就做乜。但係拍埋落去，我愈嚟愈鍾意，就知道演戲唔係人哋叫你做乜就做乜，要自己揣摩，自己塑造。《鴨王》何鉅峰呢個角色，係借咗我何浩文嘅身體去講佢嘅故事。呢樣嘢，係我演戲老師彭秀慧教我嘅。
做一個脫星，最難係邊一步？
要由喺泰國拍《賭城風雲 2》講起，喺嗰度係晶哥第一次同我講：「開部戲俾你啦，不過要做鴨！」我話：「做鴨？好哇……嚟呀！」我記得杜汶澤拍《 AV》時講過，喺鏡頭面前，演員身體每部份都係屬於觀眾嘅……我覺得呢個諗法好敬業樂業，我好想學佢，好想知自己嘅底線喺邊。到真係拍喇，發覺我真係可以無底線，就算係拍 love scene，拍嘅時候我一啲尷尬一啲反應都冇，𠵱家跳番出嚟、諗番轉頭，反而有啲尷尬。
你同杜汶澤除衫完全係兩回事喎！有冇諗過，靚仔加大隻，會蓋過晒你嘅努力？
何浩文係一個包拗頸嘅人，啲人越係覺得咁做係色情係負面，我就偏偏越係要做，越係要話俾人聽呢個係一個 step，最後大家睇到吸收到嘅，唔係我除咗幾多衫，只會係我嘅努力。等於我練歌練咗一百日，冇人會知，但係一上台唱，一聽就聽得出。我唔怕因此定位，我相信經理人安排，亦相信觀眾嘅眼睛好雪亮，相信每一個 step都係嗰一刻最好嘅選擇。有朝一日，大家會揭去另一頁，會見到我除咗呢樣，仲有好多。
有咁嘅自信，因為你唱得跳得演得，你最清楚自己唔只得副 body？
我有學戲，有練歌，鍾意拍微電影，做埋導演，我諗大家慢慢會發現，我係有操大隻，但係 support我藝人身份嘅並唔只係大隻。坦白講，淨係除衫淨係靠樣，嗰啲係 model。
最驚俾父母見到我做刺身盛
你做仔嘅時候有冇咁聽話？
我係鍾意出街打波、玩嗰啲，唔算乖，但絕對唔係曳嗰班。不過我媽咪教中學，爹哋都喺政府教育部門工作，佢哋兩個都搞教育，個仔唔搞埋一份仲走去拍《鴨王》。你話死唔死？
佢哋教書，應該真係好難明點解你要拍一本嘢，表面上係整甜品，實情係賣肌肉。
我影呢本寫真嘅心態同目的，都唔係賣肉，係想留低嗰一刻嘅自己……
你咁講法有冇試過有人信？
我自己信囉！寫真張國榮同謝霆鋒都拍過，日韓偶像亦都有，攝影師影出嚟真係靚吖嘛……重點係，嗰本嘢真係有食譜喎！
但食譜嗰 part真係冇人睇呢！
係喇……唔緊要，你咪當我影俾自己睇囉，紀錄一個年紀嘅自己，五年、十年後有得重溫都幾得意。唔使擔心我父母，我始終叫做搵到自己興趣，但係一路以嚟真係需要時間、係好多時間氹佢哋。佢哋希望我讀多啲書，但我同佢哋諗嘅嘢背道而馳。佢哋想我做乜師物師，浸下鹹水，所以送咗我去英國讀會計，但係我覺得做想做嘅嘢，未必一定要讀書。
喺英國讀讀下會計，走返香港做跳舞組合，父母會唔會好嬲？
其實返香港都係為咗讀會計，始終兩邊法律唔同，要喺香港做會計始終喺香港學好啲，但係返到嚟開始睇人跳舞、學跳舞、幫人伴舞然後被發掘組成 Bro5。佢哋唔係嬲，但擔心係真嘅，我書都未讀完……隨着我堅持，作品慢慢面世，擔心係少咗……
但由跳唱組合到拍寫真、拍《鴨王》，會唔會離得太遠？
一開始佢哋唔係拒絕，係「唔係啩，個仔拍寫真……」。唔怪得佢哋，寫真聽落真係色情啲，女性化啲，但係我自己知除咗賣肉，仲有其他賣點，我冇法子控制全香港人諗法，我知自己做緊咩。到《鴨王》，佢哋真係有啲嚇親……不枉我咁多年幫佢哋做心理輔導，到《鴨王》首映，我總算有一次可以做男主角、屬於我自己嘅首映，真係一定要同屋企人分享。嗰晚爹哋媽咪就坐喺我後面，我完全唔敢望後面，但全程聽住佢哋反應。去到嗰一幕，我全裸瞓喺度做刺身盛，我聽到一聲嘩……睇完套戲，我擰轉身，爹哋淨係拍一拍我膊頭，冇講嘢……係囉，咩意思呢？拍呢下膊頭？睇完成套戲，我諗佢哋好清晰，《鴨王》唔係淨係裸露，都有故事、都需要演技。嗰晚我 send咗 message同爹哋講：「唔緊要，呢個只係一個 step，我遲啲就會喺啲更高嘅位、拍啲更好嘅戲俾你哋睇！」佢覆番我：「加油， keep going!」
前女友傷得我最深
Keep going你想去到邊？
我想似梁家輝同任達華，有朝一日到我做咗影帝，過去就只不過係我成功路上嘅一步。
同糖妹分手後，一直單身？
仲係唔係朋友？
我當佢係朋友，都仲會聯絡，我哋分手唔肉酸。
撻着都係因為一齊去搵彭秀慧學戲？
其實早過學戲已經識，當年做 Bro5時佢（糖妹）係化妝師。
佢話過當年係女追男？
佢係落力啲嘅……但我唔認同邊個追邊個，大家一齊係舒服，就自然會走埋一齊。
既然相處好舒服，點解唔可以繼續？
因為事業，大家最終明白到，大家望緊嘅方向唔同。
當年你出寫真，都有人打去糖妹方面問回應。得到唱片公司嘅答案係：「唔好唔想拉埋佢一齊講呀！」好明顯，有人會覺得你嘅層次低啲，會拖累別人形象。
娛樂家最重要係娛樂到人，大家喺咩層次、地位有冇高低之分，邊個高邊個低，睇你點理解。問心嗰句，我真係冇受佢哋影響。我諗好多嘢，但係唔會諗人哋點睇我，你哋點睇我，唔會影響我點行我條路。
你係唔係一個好男朋友？花唔花心？
我對人有好感好容易，天蠍座係咁，好 friendly，但係要我好愛並唔容易，一定要對佢認識好深。我從來未試過擘腿，相反俾人擘就試過。當年我喺英國讀書，後期佢去咗第二個城市，我以為有心就算係 long distance都一定維繫到，但係原來女朋友背住我交往咗無數咁多個……
所以你冇試過傷人，反而俾人傷過？
人哋講俾我聽，我先至知自己做咗好耐傻仔。我突登坐兩個鐘車過去搵佢，佢就係一句：「 sorry」……呢下最傷！原來你做咗咁多嘢就係一句就算。其實我去唔係想對質，係希望佢解釋、認錯，我一心係諗住會原諒佢……從此以後，何浩文對愛情有另一種睇法，原來愛情唔係單靠努力就可以維持。我冇喊，雖然俾人傷害嘅係我，但我好清楚，失去我係佢嘅損失。
係專業嘅！
無論扮古惑仔定鴨王，拍戲剝，係專業嘅！
嚟到影相，話自己冇底線可以除淨底橫，都係專業嘅！
不過剝晒衫褲教整甜品都係專業，我覺得最難，難過說服自己做鴨王。
佢話：「嗰本書真係想教人整甜品，同埋都唔只除衫，仲有啲係喺 fashion角度出發，都係紀錄咗嗰一年嘅自己，我唔理得其他人點睇！」
專業、自負、大口氣、仲識麻醉自己，我覺得何浩文已經成功咗一大半。
|
鍾意就快D Share啦！
|
|
|
