掃呢頁CODE去手機

2015年5月22日 星期五

教你睇《製作人們》 4大 point [忽然1周 - 1034] MW,



韓氣逼人

教你睇《製作人們》 4大 point

「都 min俊 C」終於變做人喇!期待咗好耐嘅 KBS新劇《製作人們》,喺上星期首播。話晒係男神金秀賢自《星星》後第一套劇,真係愈睇愈興奮!劇集以貼近現實手法,俾大家睇吓韓國電視台嘅綜藝節目到底係點製作,仲有車太鉉、金秀賢、孔孝真同 IU搞 4角戀,嘩!好亂呀!唔使驚,同大家嚴選咗 4大必睇位,即 check







1.玩影射

韓國唔少女星都係女團出身,劇中歌手 Cindy( IU飾演)都唔例外。但隊友話公司偏心,只捧 Cindy,其他人就投閒置散。 Cindy就反指隊友唔使做,靠佢搵錢大家分。現實中,女團 missA最近都傳出秀智被排斥,事關呢幾年佢歌影視發展好,又多個人廣告,仲有男神李敏鎬做 boyfriend,隊友勁嬲豬。

劇中 Cindy係前女團 Pinky4成員,因為獨立發展理想,令前隊友妒忌,吵大鑊。

之前 missA回歸都傳不和,同團賺錢最多嘅秀智(右一),俾隊友孤立。咦!同劇中嘅 IU好似喎!

2.溝女新程式

金秀賢喺《星星》用超能力追掂全智賢,依家做番平凡人,識女抄牌都有一手㗎!劇中白承璨(金秀賢飾演)見落雨,好心借咗把遮俾企喺公司門口嘅 Cindy,但把遮佢都係向公司借,為免冇還被扣人工,就問人哋攞電話號碼。但佢比起前輩羅俊模(車太鉉飾演)嘅手段爭好遠囉!佢見青梅竹馬嘅卓藝珍(孔孝真飾演)冇地方住,就叫人同居,仲用 kiss嚟簽約。 Wow∼

為親近女神趙胤熙(圓圖),金秀賢去電視台返工,但咁就俾佢見到落雨冇帶遮嘅 IU,成功抄牌,又多個選擇。

車太鉉同孔孝真由細玩到大,呢日車生叫人哋搬去同佢住,仲借醉 kiss kiss。

3.勁像真

劇情講綜藝節目《 2天 1夜》播到第 4季,而現實嘅《 2天 1夜》中係由劉浩鎮監製、車太鉉主持第 3季。劇中懵盛盛、一返工就俾前輩點相嘅白承璨(金秀賢飾演),同劉浩鎮經歷幾似,當年劉生初入職就係做《 2天 1夜》,成日俾主持恰。之後調去《音樂銀行》(即係劇中卓藝珍〔孔孝真飾演〕監製嘅節目),再喺年半前重返《 2天 1夜》,成為主監製。對照參考人物,嚟緊白承璨俾人再恰多幾集,應該有機發圍喎!

金秀賢第 1日返工,就俾飾演監製嘅孔孝真帶去同歌手 IU談判,但佢衰老實,讚 IU嘅透視裝靚,咁就俾孔孝真鬧爆。

參考人物劉浩鎮

現實版嘅《 2天 1夜》依家播到第 3季,由劉浩鎮(中)帶隊。但喺 7年前佢第 1日返工,就俾《 2》嘅第 1季主持姜鎬童(左)同金 C(右)扮嗌交偷拍,搞到劉生崩潰咁滯。

4.必睇串星

呢套劇話晒係大製作,當然星光熠熠,淨係客串陣容,目前張 list已經超過廿人!嚟緊會有大老細 JYP、張赫同 EXID登場。頭兩集就有「少女時代」出現 10秒,帶大家睇吓 KBS飯堂係點,仲睇到金秀賢嘅食相,好繽紛呀!

「少女時代」小隊 TTS都有客串,仲去咗 KBS飯堂食飯。不過金秀賢對佢哋似乎冇興趣,只係掛住食。

朴軫永

之前同金秀賢合作過《 Dream High》嘅朴軫永,今次喺《製》劇又嚟幫手,演番 JYP娛樂老闆,仲帶埋旗下藝人趙權、 Nichkhun同宣美客串㖭。

張赫

張赫啱啱先拍完古裝劇《輝煌或瘋狂》,都嚟《製作人們》串場,佢嘅戲份仲已經拍完㖭!不過電視台刻意保密,未有洩露角色。

Hani

呢期大紅嘅 EXID,都喺串星名單之內,但只係得 Hani以《 2天 1夜》第 5季候補主持身份出現。

鍾意就快D Share啦!