探熱針
企硬 飛車唔俾戴頭盔 岑麗香錫身拒埋位
上週五（八月二十一日），岑麗香同洪永城在赤柱碼頭開工拍新劇《實習天使》，其中一個飛車鏡頭，香香提出戴頭盔上陣，但導演認為頭盔會遮住香香個樣，拒絕她要求，點知錫身香香企硬唔就範，最終要搵替身頂上。
嚟真笠晒水
明明係水兵鬥海軍，但岑麗香因為演技太浮誇，同洪永城合作拍《實習天使》期間，因為經常 NG累街坊，曾被對方當眾鬧爆：「你咁咪唔 natural囉！」
上星期，劇組到赤柱碼頭拍飛車戲，唔想對手再扯晒火，著住牛仔短裙的香香不斷刨劇本好用功。導演先拍二人近鏡熱身，只見香香從後攬實洪永城喪嗌，交足驚恐表情。
三十五度高溫拍外景， take一個 shot，香香已經妝都溶埋。
拍完近鏡，再嚟一個《天若有情》式場面，導演要二人坐電單車衝向海邊再煞停，香香知道要嚟真，突然臨場笠水，要求戴番個頭盔埋位，不過導演認為冇需要，香香又企硬，雙方爭持不下。
「場戲要 take到香香個樣，佢要做表情交戲所以唔可以戴頭盔，但香香話飛車危險唔想搏，同埋洪永城都可以戴，點解自己唔戴得？」一名劇組人員透露。
臨時搵人頂
經過一輪拉鋸，香香始終堅持，唔戴頭盔唔拍，最後導演提出香香親身上陣拍一個飛車 shot，其餘就由替身頂上。導演讓步，香香亦勉強接受，面燶燶埋位。
「香香最後拍咗海邊煞停嗰個 shot，因為一定係拍正面，唔可以用替身，其他飛車鏡頭，臨時搵咗個訓練班嘅女仔做。不過咁，話晒真係要飛車，又冇做安全措施，香香唔肯自己嚟都正常，如果意外整花咗塊面整親手腳，搵鬼可憐！」劇組人員說。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
