2015年10月15日 星期四

無 17點算好 直播 app大拆解 [壹週刊 - 1336 - 優質生活] M1,



壹科林

無 17點算好 直播 app大拆解

講開直播,今時今日第一時間諗到,就一定是由台灣藝人黃立成投資的手機 app「 17」,由於爆發色情直播, Google Play即時下架,黃立成都被起訴,搞到滿城風雨。

以為因為色情話題先令個 app爆紅,大錯特錯,其實直播 apps在近半年已在全球走紅,不含色情成分的「老大哥」 Meerkat、 Periscope等更受到不少年輕人愛戴,全球熱玩,點解?逐一解構。

1.明星𡃁模做宣傳

講到最大吸引力,相信莫過於明星,好多直播 apps都會有二、三線明星玩,第一可以吸引人注意,第二又可以幫自己免費宣傳,就以最近被下架的「 17」為例,就有馬來西亞藝人 Michiyo、台灣汽車女郎 Ariel等,而香港代表都有林芊妤( Coffee)同近期爆紅的 FFx部分成員做直播,吸引到一班忠實 fans撐場,閒閒哋都有幾千人睇。

雖然台灣汽車女郎 Ariel名氣不算高,但始終有一班捧場客日日追看。

現時手機的拍片質素高,更可直接做直播,方便好多,但就涉及版權問題。

2.照妖鏡睇真身

早前網上討論區高登,就有人將部分相片與真人不符的直播用家截圖,同大家分享有幾大分別。

好多女仔都鍾意玩自拍,不過,自拍通常都會將張相有幾靚執幾靚,但一見到真人,就完全是另一回事。而直播 apps可以話針對這種每個人都有的八卦心理,當你睇完靚相,但一睇直播就見到「恐龍」,其實都幾好玩,絕對成為不少人茶餘飯後的話題。

3.有錢可搵

有部分直播 apps有分紅制,雖然分到的錢不多,但有人氣又有錢收,自然吸引到人玩。

由於直播 apps有廣告收益,而吸引人流又要靠一班開直播的玩家,所以會分少少「甜頭」出來吸引人。當然並非每個直播 app都有分紅,不過只要夠多人睇,一樣賺到錢。好似韓國就有個 14歲少年,單靠每日直播自己大吃大喝,每日就賺到最高 1,400美元。另外,好多網購網主都親力親為開直播,可以用 apps賺錢,又可以同時推廣產品,一舉兩得。

除了搵錢,外國亦出現付款做直播的情況,例如推廣商品或推廣電腦遊戲時,就會請美女型男去做,又或者靠已有一定追隨者的用家做直播,推銷商品或遊戲,這個情況在國內最為普遍。

4.發明星夢

玩直播 apps,最緊張是收到好多「讚」或「心」,表示自己人氣有幾高。

好多人都想做明星,受萬人愛戴,既然有個免費平台可以測試自己人氣,自然多人玩。玩法亦五花八門,例如同人傾偈,或者唱足兩個鐘歌,甚至跳舞、做健身都有,務求令自己人氣上升,以得到更多「讚」或「心」,隨時俾電影或模特兒公司睇中,就可以成名做明星。

仲有選擇

直播 apps可以說是繼 YouTube之後,另一個最具潛力發展的流動播放平台,不過近期最火的「 17」已淪為鹹片地帶,仲有無其他選擇?有,而且可以向全球發展,隨時好過「 17」,不再局限於中港台。

元老級  Meerkat

今年二月推出的 Meerkat,在外國已經有一定知名度,更有不少名人會進行直播,例如 Box創辦人 Aaron Levie、《 The Lean Startup》作者 Eric Ries等,吸引到不少人去睇。

支援平台: iOS/ Android

後起之秀  Periscope

自從「 17」爆「鹹」之後,其實都有不少人轉移去 Periscope繼續直播。 Periscope其實是由 Twitter所開設的直播 app,之前由於有人直播過美國拳擊賽事而出名,除了直播外,亦支援點播功能。

支援平台: iOS/ Android

國內最大 斗魚 TV

如果只是想做觀眾,亦可以下載斗魚 TV app。雖然網站主要以直播遊戲為主,不過近期開始轉型,資訊愈來愈多樣化。

支援平台: iOS/ Android

撰文:蘆甘

攝影:徐柏然

features@nextmedia.com

鍾意就快D Share啦!
Related Posts Plugin for WordPress, Blogger...