掃呢頁CODE去手機

2016年1月27日 星期三

dry足 5年對人歡笑  45歲小儀睇森美醫生治抑鬱 [FACE - 453] __,森美,小儀,MF,

對住鏡頭係開心果,最叻自嘲,真實一面的小儀連日獨來獨往,愁眉苦臉唧都唔笑。封面dry足5年對人歡笑 45歲小儀睇森美醫生治抑鬱大台鬧小生花旦荒,明顯已經荒到一個點!新劇《愛情食物鏈》陳智燊搭高Ling,再加埋做開主持嘅小儀、金剛都有得擔正,揹唔揹得起係一回事,不過新鮮感又確係俾到小小,收視首開29點,已經要開香檳!原來對觀眾新鮮,對小儀本人擔正仲新鮮!45歲小儀劇內有高富帥垂青、戲外甩拖5年dry ...


對住鏡頭係開心果,最叻自嘲,真實一面的小儀連日獨來獨往,愁眉苦臉唧都唔笑。

封面

dry足 5年對人歡笑  45歲小儀睇森美醫生治抑鬱

大台鬧小生花旦荒,明顯已經荒到一個點!新劇《愛情食物鏈》陳智燊搭高 Ling,再加埋做開主持嘅小儀、金剛都有得擔正,揹唔揹得起係一回事,不過新鮮感又確係俾到小小,收視首開 29點,已經要開香檳!

原來對觀眾新鮮,對小儀本人擔正仲新鮮! 45歲小儀劇內有高富帥垂青、戲外甩拖 5年 dry足 5年,日日宣傳要扮開心果對人歡笑,實情收埋疑似抑鬱症症狀,要偷偷請教過來人森美食藥睇醫生,女主角喎!你估容易做?

今時今日,新劇開播收視有 29點已經要偷笑。小儀、金剛話晒人生第一次擔正,巡例都學人哋小生花旦放話刺激收視,話過 50點男着比堅尼女着 T-back喎!其實男神子華擔正都冇 50點,小儀着 T-back想像下都覺重口味,吹咁大都無非係自嘲想逗大家一笑啫!

因為做女一搞到壓力爆煲,小儀疑似患上抑鬱症,有指要求助拍檔森美介紹求醫治療。《蘋果日報》圖片

除咗工作就係一對寶貝狗 Dee同細佬,事實上前度男友黃志暉都係因為愛狗結緣。《蘋果日報》圖片

獨來獨往

不過觀眾識笑、同劇拍檔識笑,唯獨小儀自己唔識笑!陳智燊就快娶老婆、金剛有陳蕊蕊,連高 Ling都話同音樂人鄧智偉暗交三年,唯獨小儀眾所周知自從五年前慘被出版社 CEO前度飛甩便乏人問津, 45歲剩女生活除咗工作就係兩隻寶貝狗。失驚無神升呢,據悉小儀因為要同時兼顧電台、電視台兩份工作,再加上第一次做女主角,劇本要記要背、戲份要求亦都唔同往日小角色,休息嚴重不足加上壓力倍增,疑似患上抑鬱症要求醫。

獨居又獨身連個傾訴對像也沒有,好在小儀有個好拍檔森美可以求救,未至於有苦自己知。早年一樣得過抑鬱症,靠藥物和信仰終於痊癒的森美介紹加開解,小儀早前才求醫病情才見好轉,不過一個人時始終板着臉不見笑容。連日來雖然不見小儀覆診,不過每天電台、宣傳、拍攝工作都獨來獨往,神情落寞,回家後亦只見她在社交網絡分享一人食譜,清靜得很。連大雨天駕車去保養,也沒有友人陪伴接送,要靠車房職員車她去附近商場消磨時間。

每日上載獨家村一人煲仔飯、一個炒菜、一個糖水,連網友都睇唔過眼話小儀慘,小儀親自回應:「仲有呼吸已經好幸福」,繼續撐!(網上圖片)

孤清生活

拍完劇一樣冇停手,小儀除咗電台份工仲要兼顧主持同廣告,上週三( 20日)離開電台一個人去快餐店拍攝,但鏡頭後對住美食絕不雀躍。

上週五( 22日)又係獨自收工獨個駕車去保養,除咗工作拍檔,當日陪伴佢只得短短一程車的車房職員。

森美:佢話捱唔到

週日( 24日)寒潮襲港,要捱凍拍攝新一輯《街坊廚神》的小儀又再捱病,週一缺席電台節目。

節目完結後,剩下獨撐大局的森美回應記者,不過森美幫晒口撐老拍檔:「佢拍緊劇嗰陣時要做電台又要做戲,有時人哋演員拍到凌晨六點仲可以返去瞓幾個鐘,但佢要返嚟電台做節目,做完又繼續拍日景,拍完日景又夜景。我有聽佢講話好辛苦,捱唔到!不過佢個人好樂觀,冇抑鬱,佢搞到我抑鬱就真!我係有介紹醫生俾其他朋友,不過小儀冇咁嘅需要!結唔結婚嘅嘢佢都睇化咗,冇話 45歲一定要嫁,我見佢成日有好多男性朋友,我有幫手𥄫住啲男仔㗎!」唉,女仔人家唔通恨拍拖周圍講咩?森美你一家四口咁美滿又怎明剩女寂寞的心呢?

第一次擔正,戲裡其貌不揚、年紀一把一樣有高富帥陳智燊欣賞,可惜戲外小儀仲未搵到惜花之人呢!(電視畫面)

同時拍劇又要返電台,小儀首次擔正就搞到壓力爆煲疑似抑鬱,不過為收視為搞氣氛,次次宣傳還是落手落腳扮開心果。(網上圖片)

網上圖片

唔只電台同電視,小儀近年還積極發展飲食事業搞埋車仔麵店,一樣親力親為。(網上圖片)

近年丟低電台拍檔森美,小儀同金剛憑飲食節目殺出一條血路,不過就逃不過同一命運,不斷被拍檔取笑搞 gag。

週一( 25日)小儀告假,獨撐大局的森美接受本刊訪問,承認小儀的確呻過「好辛苦,捱唔到!」

過來人

小儀識得搵森美求助,除咗因為兩人是十幾年好拍檔兼老友外,最重要都係因為森美都係過來人。

表面事業有成家庭幸福,又係對住觀眾聽眾笑騎騎,唔係森美自爆,都冇人知佢病足三年,由 10至 13年因為抑鬱症長期食藥睇醫生,直至 13年尾才停藥。 14年因為辭演《使徒行者》一度有傳自言自語、記性變差疑似抑鬱症狀加重,森美辯稱純屬為身體健康辭演。

森美 13年接受訪問時自爆曾患抑鬱症,講講下童年往事同媽媽又激動爆喊。

康復後森美經常以個人經歷在教會傳福音,又向朋友介紹醫生正視抑鬱症。

爛桃花

老友森美都話小儀異性朋友唔少,事實上咁多年小儀又的確不乏男伴,不過十居其九冇下文,除了入行早期有個拍拖多年都分手收場的消防員男友外,唯一撻得着嘅出版社 CEO同樣始亂終棄係爛桃花。

09年森美牽紅線介紹小儀結識出版社 CEO黃志暉,可惜拍得一年拖,對方就跳蹧去財經界仲急撇小儀兼玩失蹤。

同 CEO分手後,小儀被拍得煲靚湯餵新仔,然後撐枱腳睇拉闊騷直落,事後小儀否認有新戀情。

13年搞麵店同大坑拉麵新貴長髮男被拍到深宵密密斟,不過小儀發現鏡頭後主動澄清對方唔係新歡。《蘋果日報》圖片

大把異性朋友陪伴左右嘅小儀,最似層層係同《早霸王》監製阿金,疑似工作以外亦私底下譜出短暫戀曲。《蘋果日報》圖片

剩女 70後

45歲未有着落其實都唔使做阿愁,古今中外港台兩地大把 70後美女、才女陪小儀一齊做剩女。

杜如風( 40歲)

港女代表杜如風證明無嘢重要得過自信,雖然年過四十、外形個性唔係個個接受,不過一講拍拖佢次次都話自己大把人追、吊高嚟賣。

林志玲( 42歲)

有冇真姻緣同個樣同個身材絕對無關,靚絕中港台真女神林志玲,今年 42歲仲係單身一個,不過 keep得靚一樣可以唔做剩女做女神。

佘詩曼( 40歲)

電視台花旦最多剩女代表,鬼咩, On call 36小時都係拍劇拍劇再拍劇,真係好容易搞到似阿佘一樣做咗當家花旦同視后,不過就耽誤咗個人幸福。

卓韻芝( 38歲)

早年感情生活多姿多彩,年過 35歲以後突然停滯不前。才女即是才女,卓韻芝話你知單身都可以好繽紛仲有錢搵添,去年就開 talk騷講足成晚《你個樣好單身》。

採訪、撰文:娛樂組

攝影:娛樂突發組


鍾意就快D Share啦!