因拍過電影《一路向西》而為人所熟悉的陳靜（DaDa）師妹Celia K.（郭穎兒）於社交網站晒婚戒報喜宣布將嫁文詠珊舊愛李冠峰，Celia K.寫到：「一切都發生很快，幸福就是這樣，很難去捉住時間，說來就來。是的，我突然就嫁了！」Celia K.更以人妻形容自己，甜蜜滿瀉！
拍拖年幾就結婚
Celia K.與李冠峰拍拖一年，一直都甜蜜滿瀉，經常在網上晒愛，兩人更一起搞手袋生意，情侶檔拍住上搵錢！今日，兩人更將甜蜜指數上升無限級，Celia K.於IG上載婚照宣布「嫁人了！」相片中，兩人穿上禮服笑到見牙唔見眼，齊齊舉起左手大騷無名指上的婚戒，Celia K.更以「人妻」來形容自己，《東網》記者致電Celia K.恭喜，她亦大方承認上月已註冊，但因她不想太高調，所以註冊一事，非常低調，她謂：「註冊嗰日只係請咗雙方家長、摯親到場，連攝影師都無請，好多相都係自拍。」談到簽紙一刻，向來硬淨的她，直言沒有激動亦沒有哭，只是有些蝦碌，她笑言：「我講嘢一向都好快，宣讀誓詞讀名嘅時候，一度窒一窒。」既然決定低調處理婚事，何解又突然公開宣布結婚？她謂：「因為我哋決定會擺酒，所以咪放相公布喜訊。」
Celia K.之後講述求婚經過：「今年六月底，我哋拍拖一周年，佢送咗999支玫瑰畀我，之後兩日，我哋返屋企時，佢用遙控較暗啲燈，再送花同跪地向我求婚。」難得找到一個疼錫自己的人，Celia k.也不猶疑，答應了婚事，她直言：「幸福既然來到，就好好把握，依家搵到個啱嘅就結婚。」
老公戒夜蒲
問到李冠峰有甚麼優點令她心動，她笑言：「佢嘅優點係冇缺點，同埋最重要係，搵到一個肯為自己改變嘅人係好難得，佢好迎合我嘅生活模式，唔再出夜街，戒夜蒲，食嘢亦好健康，充滿正能量，個人好正面，經常發放正能量，同佢一齊，好着數。」
婚後不設防 準備做媽咪
拍拖一年便閃婚，令人會聯想到是否有喜，她笑言：「唔係，不過，依家都會不設防，隨時準備做媽咪。因為啱啱結婚，依家有人叫我李太，我都未必第一時間可以反應過嚟。」
而一向低調很少接受媒體訪問的李冠峰，為了太太也破例接受了簡單的訪問，談到結婚的感受，他直言：「多謝大家關心，我已經搵到生命中最重要嘅人。」
|
鍾意就快D Share啦！
|
|
|
