結婚人生大事，阿 B同范姜卻未有安排雙方母親做見證，反而叫關之琳同譚詠麟做證婚人，連簽字宣誓一刻，都要搵巨星做陪襯。
娛頭
群星夾錢 機票酒店自己俾 阿 B再婚大吸水
星期一（八月二十五日），六十一歲的阿 B鍾鎮濤，同四十二歲台灣女友范姜素貞，結束十七年愛情長跑，在峇里舉行婚禮，並廣邀港台名人明星出席，包括張曼玉、關之琳、梁家輝、小豬羅志祥，台灣名媛孫芸芸等等，而兄弟團更有歌神張學友、影帝張家輝。
現場星光熠熠，有指阿 B豪花五百多萬打做世紀婚禮，但實情所有賓客，要自費買機票之餘，仲要每晚嘔五千七百港元入住鍾生鍾太指定的 Alila Villas Uluwatu酒店，四日三夜行程，每位贈興賓客要先倒貼二萬多元，才能換取婚禮入場劵。
娶妻一定要豪！早在一九八八年，阿 B耗資三百萬迎娶章小蕙，也是一時佳話。九九年兩夫妻因財反目離婚，近幾年長居美國的章小蕙，原來已靜悄悄回港從事融資工作，上週更「飛釘」行中環 Chanel。提到前夫再婚，章小蕙全程裝聾扮啞，對阿 B零祝福。
偉仔放飛機
鍾鎮濤與范姜素貞拍拖十七年，育有兩名女兒鍾懿及鍾幗，但拖到今時今日才結婚！本週一（八月二十五日），新郎哥對傳媒解釋：「給范姜一個名分，給小孩一個交代。」
數月前已開始籌備婚宴的 B哥，一早鎖定以峇里的六星級酒店 Alila Villas Uluwatu作為婚禮場地，「兩公婆」更一早 mark定港台兩地名人紅星賓客檔期，當中包括梁朝偉劉嘉玲。
「呢段時間偉仔放緊大假， B哥諗住實請得郁嘉玲偉仔，點知兩個都話唔得閒，范姜知道後居然話想將婚禮改期，又叫班朋友要有心理準備改日子。之後兩公婆一齊出馬落嘴頭，但偉仔嘉玲都係維持原判，最後婚禮照原定日子舉行，但其實都講唔通，竟然為兩個朋友改婚期？究竟想點先！」知情人說。
倒貼戥人高興
Alila Villas Uluwatu於 09年開業，酒店由國際知名設計團隊 WOITA打造，獨特設計曾獲多個國際大獎。酒店位處可俯瞰整個印度洋，並以無邊際泳池及鳥巢設計的餐廳為賣點，大多婚禮宴會均在鳥巢舉行，吸引不少名流明星前來作為人生大事場地，包括台灣名媛孫芸芸母親，也曾在此舉行婚禮。酒店內設有 84幢別墅，每幢均有獨立泳池、私人露台及涼亭，其他設施包括水療室、健身室等，暑假旺季日子（ 7月至 9月），雙人房每晚要 735美元（約 5,700港幣），為期四日三夜的 B哥婚宴，一眾到賀賓客未計人情同機票，單俾房錢，每人最少要花近二萬。
碌咭訂房
處心積慮要群星拱照的 B哥，被指豪擲五百多萬，包起機票酒店食宿，宴請圈中好友飛到峇里見證歷史一刻，但原來有另一個版本。
「過去好多星請朋友去外地出席婚禮，都會包食宿，機票錢就多數由賓客自己負責，雖然唔講得上係行規，但大家都知規矩；點知臨出發前一個月， B哥助手打電話嚟叫我哋同酒店講低信用咭號碼，方便過數，嗰間酒店一晚房錢要七百三十五蚊美金，四日三夜，淨係房錢都差不多二萬蚊港幣，加埋機票同人情，去歐洲都得」知情人說。
機票酒店要自己俾，這筆錢對於婚禮見證人關之琳、譚詠麟等巨星來說，當然是小數目，但七十位賓客中，有部分是一對新人的合作伙伴，包括來自髮型化妝界，以及公關友好。
「聽到咁貴，好多人都同 B哥反映，話自己 book過另一間酒店，點知佢又話唔得，一定要住埋同一間，因為已經 book晒房唔可以轉，大家唯有焗俾。」
各有各包
貪高興，又要私隱，不少藝人都愛到外地註冊結婚，親朋戚友組團現場見證，使費可大可小！
吳建豪、石貞善（全包）
去年 11月，台灣男星吳建豪（ Vannes）與新加坡富二代石貞善於美國洛杉磯 Resort at Pelican Hill舉行盛大婚禮。一對新人包起 150名親友機票連食宿，親飛美國分享喜悅。
鄭希怡、梁學儲（包酒店）
去年 11月， Yumiko跟拍拖八年的化妝師男友梁學儲（ Andy）在蘇梅島拉埋天窗，三日兩夜行程，機票由賓客自費，食宿則由一對新人負責，包起成間 Sha Sa Resort酒店，約埋徐濠縈、陳小春夫婦、蘇永康等近 80人齊齊狂歡。
周汶錡作反
多一事不如少一事，賓客碌咭就範，唯獨周汶錡企硬。
「 Kathy同老公一早已經喺峇里，諗住玩幾日再 join個 party， B哥有叫佢哋之後轉酒店，但 Kathy死都唔肯，佢唔單只唔轉酒店， welcome party嗰晚 B哥話要保密，叫大家唔好放相上微博或者其他社交網站， Kathy一樣話之你，照擺！」知情人說。
口說保密婚禮過程，更安排警衞，在峇里機場驅趕想拍低星級賓客落機陣容的傳媒，加上酒店四面八方布滿手持木棍保安，一眾名人明星以為可以無拘無束玩番晚，但 welcome party翌日，中港台三地傳媒均獲官方發相。
「范姜一早同公關公司傾好發相安排，所以唔俾賓客自己放相，咁做出嘅篇幅可以大啲。講真，話佢結婚使咗五百幾萬，條數點計都冇咁多，分分鐘人情都賺番晒啦，不過范姜睇到啲報導咁寫就好開心囉！」知情者說。
前 B嫂扮豪
阿 B再做老襯，九九年離婚的前 B嫂章小蕙，最近亦由美國回流香港，從事融資行業。上週四（二十一日）黃昏六點，穿著薄身白 tee「飛釘」的章小蕙，與友人到中環樓高三層的 Chanel專門店購物。
對手袋、秋冬裝愛不釋手的她，在店內逐樣睇，後來職員通水有記者在外守候，章小蕙於是改到上層繼續買。
由六點開始，買到晚上八點。章小蕙經三樓的行人天橋離開，記者上前問她有關阿 B再婚，她只是笑一笑，再問她會否送祝福，回港有什麼工作？她完全無回應，之後急步走到文華東方樓下的士站，不願排隊的她同酒店職員說：「我俾人跟，車我先！」得咗！
同阿 B育有一對子女鍾嘉浚、鍾嘉晴的章小蕙，離婚後兒子跟她，但近年母子關係漸疏，兩兄妹經常黐實阿 B同范姜，亦有飛到峇里見證老豆再婚，章小蕙失婚失子女，講到人緣，無論在公在私，前夫阿 B都比她好得多。
|
鍾意就快D Share啦！
|
|
|