左起：梁健平、鄭家生、郭卓樺、李楓幾位綠葉王，堪稱視圈高人，他們互相取笑改花名，愛噴口水花的梁健平是吹神，郭卓樺和鄭家生分別是東邪西毒，李楓則是獨臂神尼，單手打贏好多人，演技超凡。
探熱針
綠葉王輪住約滿 梁健平焗退休
在電視圈做足廿八年綠葉的梁健平，離無綫投港視，最近還有機會衝出香港，客串韓劇《命中注定我愛你》，擔正的短片《三輪車伕》又有份角逐多倫多影展最佳短片及出征康城，但好睇唔好食，還有半年便約滿港視的他，下一步如何打算，仍未有着落。
梁健平外，視壇前輩李楓、專演惡霸的鄭家生及御用爛仔郭卓樺，同樣將於今年十月至明年四月陸續約滿港視，本身是國際標準舞教師的郭卓樺一技傍身，長搵長有；但其餘幾個中佬則打定輸數。「可能要焗住退休！」五十四歲的梁健平說。
養家有壓力
港視不獲發牌，令快將約滿的一班甘草，包括梁健平、李楓、鄭家生及郭卓樺前路茫茫。
「轉行真係唔知可以做乜，當然掃街、洗碗都係正當職業，一樣有尊嚴，但以我哋嘅年紀，諗轉行不如退休。」五十四歲的梁健平和五十八歲的鄭家生異口同聲說。
有兩個女分別讀中五、中四的梁健平，原本在布行工作的老婆剛退休，要供兩個女讀大學，百上加斤。鄭家生負擔較輕，兩個兒子已經廿九和廿五歲，可幫手養家。
梁健平聲稱鄭家生就算唔做幕前，也可以做武指，但憑《鎗火》獲提名金像獎最佳動作指導的他卻不表樂觀，「而家要識埋電腦，複雜過以前好多，唔夠啲後生嚟。」
李楓唔靠人
另外，年屆六十一歲的李楓今年十月便約滿港視，雖然電視、電影、舞台劇瓣瓣通，但實質至今仍未有落腳地。
「今年四月，無綫搵我返去拍劇，但我同王維基未約滿，要遵守合約精神。嗰次推咗之後，就冇再搵過我。我信天無絕人之路，若果生活逼人，洗碗咪洗碗囉！」李楓說。
子女各有家庭，李楓為免增添家人負擔，一直堅持經濟獨立。
「八年前，我因為腦入面個泡爆咗，做咗次十個鐘開腦手術，咁都未死得，即係話個天覺得我仲有用，所以我一直繼續做嘢。船到橋頭自然直，人可以靠自己一雙手；廿年前我前夫破產，本來我哋住九肚山大屋，有三架 Benz，一夜間冇晒，當時仔女仲細，我一樣捱得過，何況今次。」李楓說。
比較起來，郭卓樺最無後顧之憂。考獲多個國際標準舞專業資格的他，不但有老師牌，年尾還會考裁判牌。由於他主要教人考老師牌，所收的學費亦比較高。
「除咗教舞，我仲有拯溺牌、小巴牌、巴士牌、貨車牌等等，我又做埋飛車特技；考咁多牌，係要提升自己，俾自己更多選擇。喺呢行堅持落去，錢唔係最重要，我可以喺其他地方賺錢，最主要係鍾意做戲，先可以堅持落去。」郭卓樺說。
插無綫刻薄
現階段港視仍開台無望，但將滿約的他們仍無後悔，認為王維基對藝人十分尊重。反而對前老細大台的刻薄，仍氣憤難平。「我哋拍打戲，公司次次預埋替身套衫，但就得套衫冇替身。」郭卓樺說。
「有次臨時加個凌空撻生魚背脊落地鏡頭，但地下又冇鋪墊，拍完梗係痛自己捽吓藥酒又繼續開工。」梁健平說。
「唔好話拍動作場面慳，我句對白講得唔好，叫導演嚟多 take都唔肯，咁嘅態度，啲嘢點會好！」鄭家生吐苦水。雖然有辛酸，但梁健平表示聽到別人讚賞，就有力量走下去，相信這是不少綠葉的心聲。
|
鍾意就快D Share啦！
|
|
|