腦下垂體雖只有一粒綠豆般大，卻操控着整個內分泌系統，分分鐘搞亂全身正常運作。
頭號健康
腦生瘤 內分泌亂龍
女士失驚無神停經；男士突然性慾大減；又或者無論你食幾少，身形都不斷暴脹……以上種種，都可能跟內分泌失調有關，而背後搞鬼的，就很可能是腦下垂體。
腦下垂體位於腦部中央、眉心後方，體積細如綠豆，卻指揮着整個內分泌系統，若這個地方出問題，雖未至於攞命，但就會搞亂內分泌，令人周身唔妥。
「我唔覺得自己啲荷爾蒙分泌有乜問題喎，身形無特別肥、情緒無特別差，加上我三十七歲嗰年，已經切咗子宮，老早無月經，所以更加難發現荷爾蒙有無唔妥。」五十八歲剛證實患有腦下垂體瘤的劉太，一臉疑惑地說。
原來，腦下垂體是內分泌系統的「大內總管」，操控着多個內分泌器官分泌不同的荷爾蒙，包括甲狀腺激素、腎上腺激素、催乳激素、黃體激素、濾泡激素等等，這些荷爾蒙影響着身體的新陳代謝、情緒、性功能等生理狀態。
而發生在腦下垂體的疾病，最常見為增生良性瘤，估計每一千人中有一人發病。腦下垂體瘤除影響荷爾蒙，就連頭痛、眼矇都可能是由於它作怪。
眼矇手痺誤為中風
劉太憶述︰「而家諗番起，○七年我開始左邊頭成日痛，中醫話我偏頭痛，西醫就話我神經痛，因為當時媽媽病重入院，我以為係因為自己奔波照顧佢、擔心佢，所以先會咁。」
翌年，隨着母親病逝，劉太的頭痛的確慢慢消失了，但去到一○年，其夫發現患上鼻咽癌，頭痛又再出現，「今次痛嘅程度比上次犀利，而且發作次數密咗，就算先生最終喺一一年過身，我唔需要再咁操勞，但之後呢三年，我仍然係持續頭痛。」
最近幾個月，劉太更出現視力模糊、左邊身麻痺的情況，親友擔心她出事，遂強行送她入急症室。威爾斯親王醫院腦神經科葉慶龍醫生表示，最初也一度以為劉太中風，「佢嘅病徵真係有啲似中風，但經過進一步檢查，包括進行電腦掃描，就發現佢腦下垂體有個黑影，所以推斷佢嘅唔舒服係源於腦下垂體瘤，而唔係中風。」
考慮到劉太的腫瘤直徑有近兩厘米，院方正排期替她進行手術。「治療好壞取決於瘤嘅大細以及病徵。如果個瘤大過一厘米，通常會影響埋視野；如果個瘤細過一厘米，就主要係影響荷爾蒙分泌，呢種情況，可以考慮先用藥物控制，調節荷爾蒙之餘，亦有機會令腫瘤縮細。」葉慶龍醫生說。
忽然停經密密頭痛
相對劉太， Grace的病徵就典型得多，荷爾蒙被腦下垂體瘤搞到「亂晒龍」。雖然她已於三個月前做了手術，但內分泌系統仍然未完全回復正常。
「其實由上年一月到而家，我只係嚟過兩次月經，一次喺上年九月，另一次就喺上年十二月。我以為做完手術，切咗個瘤就會有番啦，但都係無，婦科醫生話，可能仲要等多一年半載，身體復元，月經先會再嚟，我最擔心咁耐唔嚟月經，會影響骨質。」四十歲的 Grace苦惱地說。
已為一女之母的 Grace，在去年一月突然停經，由於肯定不是有喜，於是四月約見公立醫院婦科醫生，醫生替她抽血檢查，發現其催乳激素較正常值高出四倍，懷疑是腦下垂體瘤作怪，遂一邊替她排期照磁力共振，一邊處方藥物給她抑制催乳激素，希望可令腫瘤縮細。
Grace在去年八月開始服藥，九月恢復了月經，但只是維持正常了一個月，之後又再次停經；去年十二月， Grace終透過磁力共振，證實腦下垂體長了一個直徑約二點五厘米的腫瘤。
原來除了無月經，近大半年， Grace更開始有高血壓，而且經常頭痛，兼看東西時出現重影。「以前我血壓一直好正常，而頭痛就久不久都有，但就無近半年發作得咁頻密。今年二月，有晚瞓到半夜，突然頭痛到成個人扎醒，幾乎痛到作嘔。之後一段日子，我都係斷斷續續咁頭痛，去到四月，就唔單只頭痛，連對眼都扯住脹痛，仲開始眼矇，睇嘢有重影。」
中大腦神經外科主任兼講座教授潘偉生解釋， Grace的頭痛，是由於腫瘤漸大而導致腦壓上升，而視野出現重影，則是因為腫瘤同時壓迫着腦下垂體上方的視覺神經。
術後再做放射治療
由於 Grace的情況頗嚴重，院方已於今年五月替她進行微創手術，以內窺鏡經鼻孔到達患處切除腫瘤，潘偉生教授透露，是次手術有一定難度，「基本上已經幫佢切咗九成腫瘤，但因為個瘤有小部分黐住腦裡面嘅靜脈竇，如果夾硬切，有機會傷到神經線，所以決定留低呢小部分嘅瘤，寧願半年後再安排病人做放射治療。」
手術後， Grace再沒有頭痛，血壓和視力亦回復正常，卻有少許後遺症，「可能始終經過個鼻去做手術，做完之後，我嗅覺、味覺都差咗好多。食嘢方面，最初只係分到鹹或苦味，近排開始好啲，食得出甜味，但酸味仍然未有，希望遲啲會慢慢恢復」
潘偉生教授解釋，由於手術期間，需要把鼻道內的鼻竇口擴大，以放入內窺鏡管及手術儀器，因此部分病人手術後可能出現短暫嗅覺及味覺失靈，但一般在術後三至六個月內復元。
透視內分泌系統
內分泌器官包括腦下垂體、甲狀腺、副甲狀腺、腎上腺、胰島腺、性腺等，並由腦下垂體作總指揮，控制各內分泌器官分泌不同的荷爾蒙，再經由血液輸送至全身，為身體維持一個穩定的內在環境。如果腦下垂體受損或有腫瘤，或會導致內分泌失調，身體就有可能出現以下毛病：
話你知
在公立醫院求診的癌症病人，如果想盡快照電腦掃描、磁力共振等，可要求醫生寫轉介信到私家醫院接受檢查，如屬某幾類癌症病人，檢查費用全數由醫管局資助。除癌症病人，其他病人手持公立醫院醫生的轉介信，到大部分私家醫院接受放射診斷檢查，亦可獲折扣優惠。網址︰http://www.ha.org.hk
在公立醫院求診的癌症病人，如果想盡快照電腦掃描、磁力共振等，可要求醫生寫轉介信到私家醫院接受檢查，如屬某幾類癌症病人，檢查費用全數由醫管局資助。除癌症病人，其他病人手持公立醫院醫生的轉介信，到大部分私家醫院接受放射診斷檢查，亦可獲折扣優惠。網址︰http://www.ha.org.hk
|
鍾意就快D Share啦！
|
|
|