熱爆娛樂: [壹週刊 1277] 借大佬招搖　林保怡胞弟被破產林保怡,M1,

2014年8月28日星期四

[壹週刊 1277] 借大佬招搖　林保怡胞弟被破產林保怡,M1,

林保怡胞弟林偉強跟上司女友季麟桐，收取國衞巨額過檔費，但年多後違反合約，再收富通保險過檔費跳槽，去年被國衞追數，申請二人破產。

探熱針

借大佬招搖　林保怡胞弟被破產

林保怡轉戰大陸後，搵到盆滿鉢滿。甚少談及家事的他，一向照顧家人，尤其是在大陸成長、近年才來港生活的胞弟林偉強。不過，有指林偉強經常借胞兄名氣招搖，在保險界自我吹噓，與娛樂圈人脈網廣。林保怡不知就裡，還專登跟胞弟出席保險公司活動，變相做生招牌。

心急賺快錢的林偉強四年內轉了三間保險公司，其中在國衞（安盛前身）和富通更收取大筆過檔費，但未有做足服務年期便離職，違約被國衞追數，更遭入稟申請破產。林保怡護弟心切，聲稱不知情。

晒合照搵生意

長期留守內地搵人仔的林保怡，只要一有空檔，便會返港探望老父，十分照顧家人。

家境困難關係，林保怡細佬林偉強細細個便過繼給親戚，在大陸長大，到近年才申請來港生活，任職保險經紀，並不時借胞兄林保怡的名義，招攬生意。

「林偉強成日話佢阿哥係林保怡，所以佢都識好多圈中人，佢手機有好多同林保怡，同埋張栢芝、陳奕迅之類嘅藝人合照，周圍俾同事同啲客人睇。一一年林偉強喺蘇黎世保險嘅業績好好，被公司請去俄羅斯旅行，佢請埋女友兼上司季麟桐同林保怡去，又介紹林保怡俾團友識話係佢阿哥，所以呢行好多人都知佢哋係兩兄弟。

「其實嗰次佢可以去俄羅斯旅行，係因為佢幫林保怡開咗好多份單，蘇黎世覺得林保怡係藝人，收入比較高，所以批晒，但聽聞冇幾耐就 cut晒啲單。之後佢由蘇黎世過檔國衞，亦係佢個上司女友拉線，兩個人一齊收錢過檔，好和味。」知情者說。

林保怡近年在大陸發展甚佳，早前更拍吳宇森新片《太平輪》，跟章子怡、宋慧喬和黃曉明做對手戲，的確人脈甚廣。

二○一一年，林偉強獲當時服務的蘇黎世保險請去旅行，他邀請林保怡同行，林保怡和林偉強（左圖）分別在微博及 facebook貼上旅行照。

四百萬落袋

因林保怡的關係，林偉強成功吸引國衞（安盛前身）以巨額過檔費邀請他和女友上司季麟桐過檔，合約訂明二人要服務四年，但做了一年多，二人又收了富通保險一筆錢，違約過檔，國衞向他們追討賠償不果，去年申請二人破產。

據業內人士估計，林偉強在兩間公司的過檔費和其他津貼，約有四百萬落袋。

雖然林保怡已很久沒拍港劇，但《天與地》仍令人印象深刻。

接連收巨額過檔費，林偉強和女友季麟桐過上等人生活，得閒去歐洲旅行拍拖。

林偉強和女友季麟桐去年被國衞追數，由於他們並沒還款，遭國衞申請破產。

舊上司頂證

本刊向林偉強在國衞的舊上司 Chester求證。

壹：記者Ｃ：林偉強舊上司 Chester

壹：係咪因為林偉強係林保怡細佬，所以先請佢？

Ｃ：係呀！

壹：佢有冇吹噓自己喺娛樂圈識好多人，可以搵好多生意？

Ｃ：係呀，有咁講㗎。

壹：林偉強因為違約離職，所以俾國衞追數？

Ｃ：係有咁嘅事。

壹：以你所知，佢寧願被申請破產都唔還錢？

Ｃ：係喇，冇錯。

壹：有傳林偉強已經離開香港避風頭，佢係咪已經離開保險界？

Ｃ：佢已經唔喺呢行，唔知佢做緊乜，完全失咗蹤。

本刊聯絡林保怡，有關胞弟借他的名氣在外招搖，並被申請破產一事，林保怡即時黑面；問他知否林偉強是保險經紀時，他竟答：「我唔知道！」之後匆匆離去。