「中毒」留言
房祖名攤喺梳化，狀甚迷離，張相話佢「食物中毒」，又話佢需要「 tlc」（ Tender、 Loving、 Care），究竟做過乜會搞成咁呢？
封面
索女伴遊 招呼台韓星 房祖名迷照曝光
本月 14日，房祖名同柯震東在北京涉毒出事，被捕多天仍未獲釋，事後柯父及成龍先後代子道歉，有傳成龍用盡內地人脈救仔，但至今仍未知如何判刑。
身為「龍之子」的 32歲祖名，人脈不比父親輸蝕，在香港、北京、上海、台灣等地都有相熟私竇同蒲場，每次有朋友探訪，祖名一定親自招呼，有時更有索女出席，保證玩得熱鬧玩得盡興。連 G-Dragon同周杰倫等巨星都鍾意搵祖名做導遊。
本刊發現兩輯祖名同陳柏霖等台灣幫的 home P相，其中一張影到祖名全身冇力攤在梳化，仲寫住「 food poisoning is never fun」，究竟祖名食咗乜「食物」搞到「中毒」呢？
相識滿天下的房祖名，唔只喜歡招呼柯震東、陳柏霖等老死返自己北京豪宅「 Naga上院」開 P，亦會帶朋友落私竇夜蒲，蒲腳遍佈中港台，包括 Eason、謝霆鋒、王力宏、周杰倫等，連內地大姐大范冰冰都係蒲腳，而且玩得比祖名更癲更放。老豆大把錢，祖名出去玩經常包場，提供大量酒水雪茄外，偶爾仲有唔少索女同場齊齊玩，保證玩得夠 high，難怪被圈中人戲稱為「蒲點 GPS」。
蒲勻亞洲
叫得做「蒲點 GPS」，祖名當然係識蒲老馬蒲點遍及中港台韓，而且全部設有 VIP房夠私密！所以話，識蒲一定係跟祖名蒲，不過毒就咪掂
北京 Spark、 Coco Banana
祖名鍾意去北京嘅 Spark同 Coco Banana，曾被影到同王力宏在北京夜蒲。有傳今次被捕的第一現場亦是在 Spark內，但因現場有其他富二代及官二代，現場片段先冇曝光。
首爾 Club Octagon
同唔少韓星老友，祖名去到首爾都有私竇，去年曾包起當地高級明星夜蒲場 Club Octagon搞生日會。
台灣 Primo
由黃立行同黃立成兩兄弟所開設的夜店，祖名同對方非常熟絡，經常落去蒲。 11年同混血女模 Nesha亦係去 Primo夜蒲後過夜斷正。
GD認曾吸大麻
近年祖名有意大力發展經理人事業，兩年前成立「藝房紫」公司，打算簽韓星到內地開騷，因此祖名積極同韓星打好關係。除了與在韓國人面廣的阿嬌前男友 K先生相熟，連 K-pop巨星 BIGBANG的隊長 G-Dragon、勝利同權相佑等，亦同祖名稱兄道弟，每次 GD來港或到內地工作，必搵祖名陪玩。
去年 11月， GD到北京出席頒獎禮，當晚祖名即帶 GD到那英開的酒吧 Vics夜蒲，同場仲有好兄弟柯震東及 Angelababy。今次祖名因毒惹禍，無獨有偶， GD 11年在日本開騷時曾吸大麻，雖因服食量少及初犯，未被韓國警方起訴，但亦要公開道歉。
𡃁模忽然懷孕
貴為「龍之子」，自然大把女黐埋身。遺傳父親「優良血統」的房祖名，緋聞女友多到數唔到，由薛凱琪到前「城嫂」葉熙祺、旗下藝人「小薰」、台灣歌手大元等，其中 11年試過帶 17歲混血模 Nesha夜蒲後返台北屋企過夜，唔嫩唔食，斷正後祖名口窒窒回應，衝口而出：「今次被媽罵慘了！」更驚到要求記者筆下留情。
據傳去年祖名曾與一名圈中廣交男星的𡃁模玩得好埋，其後對方忽然向友人透露懷孕消息，北京𡃁模界更傳出有人畀了一筆可觀的費用給大肚𡃁模，事件才平息。而據知祖名定居北京兩年，雖然身邊女伴氹氹轉，但始終冇公開的女友。不過毒案事發後，幾位緋聞女友都好維護對方，薛凱琪最初唔信祖名涉毒，消息證實後亦唔肯公開評論，只表示關心；而葉熙祺亦對本刊說：「很久沒聯絡，希望祖名沒事，亦希望身邊朋友潔身自愛。」
柯震東返台即勒戒
祖名人緣好，被捕後亦獲公安厚待。比起柯震東要着住囚衣「走格」出鏡，祖名獲央視打厚格遮樣，更誇張到安排北京公安局禁毒總隊副總隊長力讚「有文化素養、比較後悔」，大龍鳳做到足。老豆成龍出力營救，母親林鳳嬌則傷心過度，因為太擔心祖名而數度暈倒，好友甄珍亦聯絡不上，成龍現時除了為仔奔波，更要照顧好嬌媽身體。
而同祖名一齊被捕的柯震東，被控吸毒而要拘留 14日，預計最快本週五「放監」，雖然刑罰較祖名的「容留他人吸毒」罪輕，但回台後要立即接受勒戒，加上代言的 19個廣告分分鐘索償，有份參與的 3套電影亦肯定被拖累，真係星途盡毀。
|
鍾意就快D Share啦！
|
|
|
