33度大熱天時，剪咗新髮型嘅周國賢，着埋長袖線衫一樣瘦到似 iPhone，雖然話見到香港人多會驚，難得仲係好友善企定定接受記者訪問。
真面目
失蹤之謎 暴瘦 15磅 33℃着長袖衫 周國賢認焦慮症：見到咁多人好驚
自從 12年 8月出版唱片《 Live A Life》，周國賢已經鮮有露面。去年中傳出搭上助手南南更加搞到差啲家變，更盛傳為氹韓籍老婆舉家移民加拿大。
足足年半，上週本刊終發現呢位樂壇失蹤人口，無工開近兩年，繼續水源充足，在太古廣場逛勻 Dior、 Harvey Nichols各大名店，還睇中女裝飾物滿載而歸。
週日再約女友人小聚，暴瘦 15磅嘅 Endy友善在地鐵站企定定接受記者訪問，自爆有意回歸樂壇回港探路，至於失蹤原因，就話係患上焦慮症，唔關小三事喎。識得去名店搵禮物氹老婆，睇怕個煲箍掂咗
明明結婚 12年，家有韓妻同三粒寶貝女，不過記者這次都只係見到周國賢一支公回歸香港，繼上週四（ 21日）買完女裝鏈再買紅酒，享受完優質生活後，週日（ 24日）傍晚則約見女性朋友在上環小聚。可能久別香江，周國賢告別友人在港鐵站似足自由行，入錯荃灣線又行錯入機場快線，行完大運又如夢初醒唔上車拍八達通再出閘，記者表明身份，周國賢話約咗人未夠鐘喎：「我哋唔係移民，係幫小朋友搞讀書啲嘢啫，安排好晒咪返香港探下親戚朋友，好耐冇返嚟，我𠵱家見到咁多人都好驚。（想復出？）香港變得好快，呢個模式唔同晒，等我探下路先。（點解瘦晒？）大約瘦咗幾 kg，我唔敢磅呀！係因為食咗長齋同埋跑番步，其實之前有焦慮症嘅係我，唔知點解傳傳下變咗太太。公司同事想幫我掩飾病情，又唔知點解傳傳下變咗緋聞。其實今次老婆同女都有返，不過走咗先。我就仲有啲親戚未見完，今次一嚟探朋友親戚、二嚟探路，三嚟其實係想打邊爐！」食齋邊爐？咁咪即係烚菜？
韓妻李美英
同韓籍老婆李美英結婚 12年，周國賢育有三個分別 11、 6及 4歲的囡囡，被指舉家移民加拿大，周國賢就話為女升學而已。
瘦咗似劉華
比最癲峰時狂瘦十多磅，周國賢話靠食齋同跑步減磅。連何詩都話佢瘦咗似劉天王！
轉行有得諗喎！
周國賢話返港探路想重回音樂老本行，其實連 Eason都賣得 900隻碟心灰意冷，音樂當興趣好過做職業。家有海味鋪，身有周身刀，唔做歌手大把嘢做。
|
鍾意就快D Share啦！
|
|
|
