探熱針
反轉豬肚 林峯簽英皇 反無綫
今年七月正式約滿無綫的林峯，一直盛傳會自組開經理人公司，但原來他跟英皇娛樂傾掂數過檔，除了唱片約，還包括三年經理人合約，與謝霆鋒、容祖兒、古巨基拍住上。
最近有傳英皇老闆楊受成，與呂志和、林建岳聯手買亞視，快將成為英皇人的林峯，隨時掉轉槍頭，亮相亞視反無綫。
合作無間
老豆係廈門「李嘉誠」的林峯，自七月約滿無綫後，一直處於半休息狀態，只間中參與商演及內地演唱會。雖然未有新動向公布，但原來他已將唱片及經理人合約簽俾英皇，為期三年。
「阿峯○七年喺樂易玲撮合下，簽咗英皇唱片，雙方關係一直都好好，吳雨大哥知道阿峯約滿無綫，都有搵佢傾過檔，連楊生都有開口叫佢過嚟。」一名英皇人說。
在無綫十五年，一度是樂易玲頭號愛將的林峯，一二年因失落台慶視帝寶座，才下定決心走人。
「係人都知阿峯恨攞視帝，始終出道十五年，佢覺得自己係時候攞，加上當時《雷霆掃毒》口碑好，樂小姐又拍晒心口話俾硬佢，點知最後輸咗俾唔係親生仔嘅黎耀祥，阿峯唔嬲就假，佢同朋友講，一定唔會再留喺 TVB，因為做親生仔都冇用！」知情者說。
做生不如做熟
無綫為補鑊，兩度安排他奪《勁歌頒獎禮》的「最受歡迎男歌手」獎，可惜林峯依然拒絕留低。
「老豆大把，本來林峯打算自己投資開公司，但諗諗吓又怕煩，最後放棄做老闆，加上佢一話走，好多公司都搵佢過檔，包括 Paco嘅太陽城娛樂，仲有黃百鳴嘅天馬娛樂，價錢同條件又唔差，但林峯覺得做生不如做熟，最終揀咗英皇！」知情者說。
英皇成功收歸林峯，另一邊廂，亦有傳楊受成與呂志和、林建岳聯手洽購亞視。昔日與無綫關係友好的英皇，因不滿大台硬捧「星夢幫」，早前下令旗下歌手罷簽無綫歌星約抗議，若洽購成功，將成為英皇人的林峯，隨時倒戈相向做亞視人。
散得就散
自余詠珊入主後，派系鬥爭令大台內憂外患，繼一眾花旦小生離巢後，就連一班幕後老臣子及歌手都紛紛加入逃亡潮。
何麗全
70年代已加入無綫，擔任非戲劇節目總監的何麗全，創作過無數長壽綜藝節目，包括《歡樂今宵》、《獎門人》系列和《香港小姐》等。 11年，何麗全轉投李澤楷旗下的 nowTV，但近日盛傳他已遞離職信，準備過檔亞視。
梁家樹
在大台服務 37年，任職無綫製作部戲劇製作總監的梁家樹，歷年代表作包括《衝上雲霄》、《怒火街頭》等。自余詠珊空降無綫後，梁家樹即被打入冷宮，今年 2月被調到邵氏電影任高級顧問。無綫當係草，但林建岳卻睇中梁家樹，安排他加盟寰亞新增的電視製作部，每年製作 200小時電視劇，主攻內地及海外市場。
|
鍾意就快D Share啦！
|
|
|
