【衝擊大台台慶】FB洩天機 HKTV堅係下月19號開台 教埋你點睇
2014-10-22 20:06:00
千呼萬喚嘅香港電視(HKTV)經歷咗多年波折，最後都係拎唔到政府嘅免費電視牌照，令一眾香港市民都極度不滿。
不過打不死嘅「魔童」王維基變陣，以OTT形式播放節目，王維基仲坦言相信今次被政府「阻撓」機會不大，否則就「真係去政總坐」。之前本報率先爆出HKTV開台日特登揀正11月19號，即係大台台慶當日，挑機味極濃，王維基似乎真係信心十足。報道仲話以《警界線》計嘅廣告費，未計折扣每15秒收費58.8萬元，認真和味。
噚日HKTV個FB仲神神秘秘，話下星期先公佈開台日子，仲Po張通勝相話叫大家先生參透下喎!今晚HKTV個小編就整咗張圖教大家點樣喺智能電話、電視、平板電腦等收睇，佢就寫住:「我最鍾意食生果，每日OT都必須要食，香蕉乜乜乜...但為咗解答呢條最多人問嘅問題，小編就用兩大條最鍾意食嘅蕉，同隔離team交換咗呢張絕密解構。但為咗唔好遭天譴，打一打馬賽克是常識吧。你哋咁好眼力，睇到嘅......掛！」點知就「出事」喇!位「小編」竟然喺電腦個PART打漏咗格仔，清楚咁見到推出日期係:「11月19日」
網民笑佢打漏咗格，起先「小編」嘅反應係:「幻覺嚟架je, 呃我唔到既」，但之後佢就話:「好開心同大家共事咗咁耐，但我相信聽日大家好可能唔會再見到我喇。多謝大家一路以來嘅照顧！我可以為你地做嘅就係咁多。」仲加咗個喊嘅表情，傻豬嚟嘅，維基份人應該冇方丈咁小氣嘅！
HKTV「小編」打漏咗格
之後再補鑊打返格
維基冇「方丈」咁小氣，「小編」唔使驚啦!
但已經太遲鳥
|
鍾意就快D Share啦！
|
|
|
