殼王新寵高 Ling，攝位與鍾嘉欣等人載歌載舞壓軸演出。
探熱針
花旦小生無面俾 台慶亮燈拍烏蠅
本週一（ 10月 20日）台慶 48周年亮燈，大台一年一度盛事，無奈牙力不復當年，加上部分花旦、小生決定離巢外闖，出席的一線藝人只有黎耀祥、鍾嘉欣、田蕊妮，勉強加埋馬德鐘同外援吳啟華，五隻手指數晒。就連台慶劇《老表，你好 hea》的三個主角王祖藍、郭晉安同萬綺雯通通缺席，令整個亮燈儀式，星光暗淡。
無影行動
近年台慶亮燈，星光一年比一年冷清，林峯離巢，打算完約走人的胡杏兒無影，其餘有約在身的親生仔女如陳豪、黃宗澤、佘詩曼和徐子珊等同樣冇現身，甚至乎台慶劇《老表，你好 hea》的王祖藍，因為要錄影中國版《 Running Man》的《奔跑吧，兄弟》，連帶同劇的另外兩位主角郭晉安和萬綺雯亦「側側膊」自動消失，令新劇的宣傳重任落在阿 Bob林盛斌同蔣志光等配角身上。
今年稱得上是大台 48年來最暗淡的一次台慶亮燈，出席的一線花旦小生只得黎耀祥、鍾嘉欣和田蕊妮。想當年大台人才鼎盛，當紮的陳法拉、徐子珊，大合照時只能企外檔位置，但今時唔同往日，二線頭的馬德鐘，可以「執死雞」企正中間影相，賺晒！
蝦碌
輪到劇集介紹，由《飛虎 II》打頭陣，主角鍾嘉欣、羅仲謙等還未出場，現場卻聽到兩人在後台的對話「開保險掣，我開咗，係呀！」「啲煙無咁犀利！」好在對話內容出得街，否則大件事。
蜀中無大將，嘉欣 BB唯有擔大旗，帶領一班二線花旦，包括黃智雯、李詩韻以及「殼王」陳國強新寵高海寧一同載歌載舞。
花旦、小生無影，連以往會俾面到賀的歌手，亦只得自己友的「巨聲幫」和「星夢幫」，其中攝到靚位在《名門暗戰》中做黎耀祥繼子的鄭俊弘，在劇集介紹期間率先獻唱劇集插曲。
至於獲高層關照的視后田蕊妮，落力發功，力撐自己有份演出的綜藝節目《超齡打工假期》，卻被陳百祥咬住狂寸：「你好細個拍㗎？咁夠膽素顏嘅？」 Do姐諗住打圓場：「阿田得你一個人去澳洲？」阿叻繼續加把嘴：「佢呢排無朋友嘛。」擺明借田蕊妮鬧經常得罪人多的杜汶澤。
|
鍾意就快D Share啦！
|
|
|
