探熱針
背楊怡去滾 羅仲謙事敗走後門
上週六（十月十八日）楊怡起程到武當山拍新劇，無王管的羅仲謙，本週一晚趁做完台慶亮燈儀式， call齊溝女鐵腳周志康、周志文及林師傑，借打邊爐為名，約吳若希、朱晨麗、歐陽巧瑩、陳庭欣、劉溫馨及劉佩玥成班靚女 happy hour。原本打到興高采烈，當知道門口有記者，羅仲謙驚到第一時間走後門鬆人，以為可以製造不在場證據，但班兄弟個個食咗誠實豆沙包，同記者踢爆羅仲謙啱啱走。正所謂：唔怕神一樣的對手，只怕豬一樣的隊友。
羅仲謙請客
本週一（十月二十日），羅仲謙趁女友楊怡不在港，晚上做完台慶亮燈活動，即刻吹雞搵埋溝女鐵腳周志康、周志文、林師傑，還有大班女藝人到九龍城打邊爐。
「難得阿怡唔喺香港冇王管，謙仔即刻打電話叫埋大、細孖同林師傑出去搵食，同枱仲有吳若希、朱晨麗、歐陽巧瑩、陳庭欣、劉溫馨、劉佩玥，佢哋四條仔個底一向都花，滾肥牛定滾女，大家心照但謙仔講到明請客，咁班女仔咪當免費食消夜囉。」有知情者說。
兄弟踢爆
四條 King當晚九點齊齊到九龍城新三得火鍋開定枱，邊食邊等班靚女收工。原本大家食到興高采烈，但店員通水門口有記者，老闆於是落閘阻截採訪。
到凌晨一時，眾人食飽離開，唯獨不見羅仲謙，問周氏兄弟老友去咗邊？兩個最初扮聽唔到，後來誤以為記者影到羅仲謙，才口窒窒說：「啱啱走咗」
玩得好小心
據知，楊怡一直反對男友與周志康、周志文及林師傑來往，但羅仲謙講極唔聽，「阿怡同謙仔拍拖三年，感情都算穩定，不過，好多人都同阿怡打小報告，話謙仔份人好花弗，叫佢睇定啲。其實阿怡都知道謙仔間唔中有出去玩，算係隻眼開隻眼閉，但佢最憎男友黐埋周氏兄弟同林師傑，佢三個出名係溝女王，係女人都唔放心自己男朋友黐埋呢類人」有知情者說。
|
鍾意就快D Share啦！
|
|
|
