[壹週刊 - 1285] 乘人之危 減價𢱑撈 余文樂攝走柯震東 柯震東,余文樂,M1,

旨在賺人氣多過搵錢的余文樂，減價冧掂品牌起用自己做大中華區代言人。

探熱針

乘人之危　減價𢱑撈　余文樂攝走柯震東

今年八月房、東北京涉毒被捕，孭住一身廣告、代言合約的柯震東，形象破產同時，還要面臨品牌追討千萬港元賠償。

向來機會主義的余文樂，𥄫中柯震東任代言人的 adidas，全國鋪天蓋地宣傳攻勢，有助鞏固自己在國內人氣，即使有份領軍的「橫洲工業」籃球隊，一直獲 Nike鼎力支持，余文樂仍主動𢱑撈，甚至開出友情價，換取一紙代言合約。

有前科

○八年爆出「淫照事件」，陳冠希敗走美國避風頭，余文樂乘人之危，把握時機擸走對方代言廣告和片約，事業隨即更上一層樓，事隔六年，機會再度出現。憑着《小時代》系列在內地爆紅的柯震東，同房祖名在北京涉毒被捕，逾十多個廣告代言面臨解約，當中包括由他擔任大中華代言人的 adidas。代言人涉毒，廣告即時全線抽起，余文樂收到風，馬上向品牌商探路。

「 adidas發散晒搵代言，樂仔收到風，即刻叫公司同品牌𢱑撈，但係人都知佢係 Nike嘅人，兩個品牌一直都係對手，根本冇得傾。」知情人說。

雖然品牌商落閘，但對代言合約志在必得的余文樂，即使從來拍廣告一個仙都唔肯減，今次卻罕有地開出友情價。

「 adidas一向落本，國內所有大城市，都貼滿晒廣告，樂仔唔係蠢，就算荷包收少咗，但賺到曝光率同知名度，有佢着數。」知情人說。

「橫洲工業」憑余文樂的知名度，獲 Nike贊助，他們以球隊名義拍廣告，亦以品牌的球衣上陣。

電影密密拍，早前仲有機會跟發哥合作《賭城風雲 2》。

回歸校園

成功攝位做 adidas大中華區代言人，但另一邊廂，由他領軍的「橫洲工業」，一直由 Nike提供贊助。余文樂以為以球員身份著對家球衫落場冇牴觸，但 adidas講到明「有我冇佢」，余文樂為保飯碗，焗住連累「橫洲」兄弟失去品牌贊助。

至於另一邊廂的柯震東，失廣告，主演的電影亦上畫無期。上週三（十月十五日）他現身台北地檢署，就涉毒事件進行應訊，最終獲判自費到醫院進行戒癮治療。離開地檢署時，對於因涉毒被國內封殺，暫停幕前工作，回歸校園「洗底」的柯震東無奈表示：「我很抱歉，我做錯了事，卻害所有跟我一起合作的演員、導演、投資方都要承受這樣的壓力，真是非常抱歉！」

Out

柯震東北京涉毒，就連 adidas廣告代言都保唔住。

柯震東被國內全面封殺，電影禁上畫，包括令他竄紅的《小時代》系列，以及九把刀新作《打噴嚏》（上圖）等無一倖免。

重返校園的柯震東，被台灣傳媒影到有𡃁模劉奕兒陪打籃球。

上週三柯震東到台北地檢署應訊，被裁定只需自費戒癮治療。

早前余文樂有份演出的電影《閨蜜》，在內地收過億票房。

搵位上

娛樂圈，講人緣、更講形象，一旦行差踏錯，或衰多口得罪人，想保住飯碗都難。

陳冠希

08年陳冠希鬧出「淫照風波」，形象直插谷底，除牽連一班女星， Edison手上工作亦被煞停，一直是 Samsung數碼相機代言人的他，最後由宿敵余文樂攝位頂上。

杜汶澤

王晶執導賀歲片《賭城風雲》在中港兩地叫好叫座，近日以原班人馬開續集，有份主演的杜汶澤早前因「反服貿」言論得罪內地網民，「愛國」王晶馬上與他割席，換馬搵張家輝頂上。

房祖名

今年 3月房祖名成為內地「巴比饅頭」代言人，廣告商更將他打造成「國民偶像」，但涉毒事件影響了品牌形象，成龍唯有「子債父還」，免費幫品牌拍廣告。

鍾意就快D Share啦！

下一篇 》