熱爆娛樂: [壹週刊 - 1285] 搾乾平民董事　葉翠翠大咬鱷魚袋　伴遊出埠開天價翠翠,葉翠翠,M1,

2014年10月23日星期四

[壹週刊 - 1285] 搾乾平民董事　葉翠翠大咬鱷魚袋　伴遊出埠開天價翠翠,葉翠翠,M1,

完事落樓　 20/10

前一晚在 Raymond屋企過夜，葉翠翠第二朝返自己屋企換衫，新佬就負責去買外賣，之後再接番葉翠翠返自己屋企再開餐。

娛頭

搾乾平民董事　葉翠翠大咬鱷魚袋　伴遊出埠開天價

試過在○八年搭上大陸富商黃有龍，可以一炮過俾三千萬買入兩個賽西湖豪宅單位，從此令三十三歲過氣港姐葉翠翠，走上專釣有錢佬不歸路，能被她睇得上眼的男士，全部都非富則貴。

向來進取的葉翠翠，最新目標是建築公司副董事的周曉東（ Raymond），對方年約四十多歲，身高六呎，出入揸寶馬跑車。為拑實富男友，葉翠翠頻頻送上門摸黑擦蟹，更答應做伴遊陪出埠，用盡辦法搾乾新歡。

以為「叫胡」，實情 Raymond絕非富豪級數，手上持有的物業，是被歸類為「窮人恩物」的屯門細價樓。睇來葉翠翠今次要白做！

嗒蟹過夜

在屋企內玩完一輪，傍晚時分，兩人出動去買大閘蟹。

被葉翠翠人肉篩選過的男人，大部分都非富則貴，揸名車、住靚樓，即使並非老細級別，都會係專業人士。

至於葉翠翠最新目標，是在「李景勳、雷煥庭建築有限公司」擔任副董事的 Raymond周曉東。這間公司在香港頗有名氣，經常幫四叔李兆基的恒基地產，負責樓宇項目。年約四十多歲的他，身高有六呎，頭髮依然濃密，外表屬於才俊形，出入以七十多萬的寶馬 428iA Cabio-M Sport代步，加上目前單身冇老婆，絕對是葉翠翠眼中的筍盤，非拑不可。

早前，葉翠翠陪新佬 Raymond到九龍城買大閘蟹，兩個原本一齊入鋪頭揀蟹，但店內人多，為免被人眼望望尷尬，葉翠翠要求返上車等，但臨上車前不忘報以姣電眼神，搞到 Raymond暈晒浪，之後二人更急急返回男方北角寓所，嗒蟹談情。

半島開餐

由於葉翠翠近排工作量不多，與 Raymond幾乎晚晚見，大部分時間更選擇到男方屋企玩禁室培慾，而 Raymond就負責買餸玩煮飯仔。

直到十月八日，葉翠翠同 Raymond終於孖住外出，男友收工後返回北角寓所換衫，再揸車去到賽西湖花園接女友，在等葉翠翠期間， Raymond全程落地企，一見女友就即刻幫忙開車門，甚有紳士風度。而當晚葉翠翠的打扮亦極具戰鬥格，露背兼低胸，全身白色造型同新佬襯到絕。

二人到半島酒店撐枱腳，落車時葉翠翠同 Raymond刻意扮生疏，保持距離行入酒店內的 Gassi's餐廳食法國菜。對食兩個半小時，又飲過香檳調情，之後葉翠翠索性返男方屋企，繼續下半場。

8/10

Raymond揸住架價值七十三萬寶馬 4系去接葉翠翠。

葉翠翠化行妝，著了低胸露背裙，同 Raymond去半島酒店食飯。

無論上車落車，葉翠翠同新佬都保持住一段距離，警覺性極高。

食完飯，兩人極速返回男方北角威景台寓所，繼續溫馨。

應承伴遊

除了日見夜見，葉翠翠更答應做伴遊陪對方出埠。由於稍後時間她會到上海為劇集《梟雄》拍幾日戲，於是約實 Raymond在上海會合，再轉機去韓國玩幾日，但無論酒店同機票，葉翠翠都有要求。

「 Raymond為咗試吓玩明星仔，佢都好揼本，每次出去食飯都帶葉翠翠食貴嘢，淨係半島呢半個月都去咗兩次，每次五、六千蚊埋單，同埋佢都有呻過條女扮大牌，雖然答應陪佢去韓國玩幾日，但就要求多多，搭飛機最起碼要坐商務客位，酒店要住五星級，仲揀咗明洞間 Lotte Hotel套房，每晚房錢要近三千蚊港幣。」 Raymond一位友人說。

既然答應做伴遊，葉翠翠唔蝕底，再𢱑新佬送禮物，據知她睇中一個二萬九千九百元鱷魚皮手袋， Raymond雖然肯送，但卻買錯顏色。上星期六（十八日）唯有幫女友到 ifc Nancy Gonzalez換貨，將原本紫色的鱷魚皮手袋，換了葉翠翠指定的灰色。

4/10

葉翠翠陪新佬到九龍城揀大閘蟹，她無時無刻都對 Raymond放晒電，搞到對方不時流露興奮表情。

13/10

剛剛開始拍拖，葉翠翠同新佬幾乎日日見面，每次他都會親自載葉翠翠返自己屋企。

葉翠翠在微博 post了一段愛的告示，明顯用來冧 Raymond。

釣錯金龜

新佬出手闊綽，更樣樣照顧周到，正當葉翠翠以為執到寶，甚至在微博出招傳情冧佬，「真正的愛情，要懂得珍惜。能遇心愛的人，是多麼幸運的事……」

但原來報稱是建築公司副董事的 Raymond，並非葉翠翠想像般富貴，根據公司註冊處記錄所得資料，他在「李景勳、雷煥庭建築師有限公司」內並無持有任何股份，只屬掛名股東，而他目前手上只持有一個物業，是去年以四百三十萬購入的屯門海慧花園一個極低層單位，相比葉翠翠市值三千萬賽西湖豪宅，絕對只屬「窮人恩物」級數。

而據記者連日追訪所見， Raymond的寶馬溝女戰車，只用來接載葉翠翠，其餘返工放工時間，他只會坐四元八角一程的小巴，相當慳家。

以為拑到大水喉，點知揀錯平民董事，葉翠翠想好似以前咁有豪宅收、坐頭等去歐洲，有難度。