爆 Like王
《選戰》片尾曲 hit咗 捱足 10年陳詩慧：唔係有好歌就得！
全城追睇《選戰》第 3集片尾，王宗堯跟住李心潔行，呢種充滿 MV感嘅畫面港劇少有，搭埋首原創英文歌〈 I'll Be There〉做背景音樂，由意境到視覺效果都靚爆。有好嘢當然自動波不斷推，真金白銀俾錢下載嘅 iTunes榜做足本地 10日冠軍，連 GD同太陽嘅〈 Good Boy〉都要輸畀佢。
首歌原創者陳詩慧 04年入行，喺大台做 music director，吳卓曦首〈別怪她〉都係佢手筆。 08年做過環球歌手只出過一隻碟，連阿媽都叫佢放棄。捱咗 10年，今日叫有代表作，但陳詩慧唔敢高興亦未有再出碟打算。她說：「呢隻歌得咗，咁之後點呢？」
F：《 FACE》 陳：陳詩慧
F：點解會有呢首歌？
陳：個 melody同中文版其實寫咗一段時間喇!年幾前已寫咗，我做《選戰》配樂同埋主題音樂創作，導演嗰日開會就話第 3集有個 scene好特別㗎，要解決佢，但因為時間太緊迫喇，初頭同佢講 sorry冇時間做搵隻罐頭音樂頂住先啦。其實未試過成隻寫英文歌，我諗呢隻歌嘅 melbody都 ok適合喎，咁不如改咗英文詞睇下 work唔 work啦，然後改少少音執吓佢，咦！好似 ok喎，喺好緊迫時間就搞掂咗囉。
F：首歌成為 iTunes榜 10日冠軍有咩感覺？
陳：完全零諗過大家會有呢個反應，仲要係英文歌喎。個個好自然問我有咩感覺呀？包括屋企人問有冇感覺飄飄然？但我完全冇感覺呀，我係好清晰㗎！我唔覺得好大成就，同埋可能做咗 10年喇，即係話我出道時候爆咗一隻歌嘅，就會覺得 yeah得咗。經歷咗 10年然後你同我講有少少嘅成績，我開心感恩但冇嗰種仲唔係我嘅感覺。我實在睇得化呢行，反而係諗緊點延續呢個成績呢，呢隻歌得咗，咁之後點呢？反而會諗呢啲嘢。
F：要一個 DJ播一個唔出名歌手嘅歌係咪好難？
陳：真係好難㗎！睇你有冇唱片公司背景啦，或者任何背景啦，呢個遊戲唔係有好歌就得。呢個圈唔係咁玩其實大家都知，係公開嘅秘密。我唔排除唔否認有 exceptional case，當年阿 Kay（謝安琪）係一個好好嘅例子，阿 Kay喺細嘅公司真係靠歌去換到佢喺樂壇嘅位置，但係有幾多個阿 Kay呢?但你話去爭位、攞獎係比較困難囉。
F： 08年做過歌手但發展一般，呢次會唔會再出碟？
陳：當時打擊都幾大，吓，冇㗎喇？就咁喇。其實當時賣得唔係太差，但唔係好到唱片公司繼續投資喺我身上。好現實嘅，唱片公司角度，你一隻唔得就 bye bye㗎啦。今次冇諗再出碟喇，出碟其實冇意義，我識 10個人只有 1個人買碟，買歌文化唔係咁普及，最 friend嗰班佢哋都冇意識去買，覺得我支持你，我喺 YouTube睇咗識唱咪得囉，冇人有聽歌買歌嘅意識。
F：入行以嚟聽過最難聽嘅說話係咩？
陳：聽過好多難聽嘅說話啦，最深刻嗰句係，「你永遠都唔會係何韻詩囉。你唔好發夢啦，你頂籠都係……我唔記得咗佢噏邊個」。香港做音樂，搵餐晏仔、食三餐都可以勉強嘅，但要去到供樓呀，供屋企呀，就諗都唔好諗。屋企有負擔就千祈唔好入行，特別呢 3年屋企人都幾迫我放棄，因為唔發牌事件啦。家人叫我係時候 stop㗎喇，係時候幫番屋企手。初頭諗住做完《選戰》呢個 project就 bye bye，就返屋企幫手做生意，𠵱家又可以畀我試多陣喇，我媽咪好開心。
|
鍾意就快D Share啦！
|
|
|