被捲入「鬧雙胞」風波，身為君如好友的劉華，應該都相當難受。
娛樂喧
劉華《失孤》涉抄《親愛的》 陳可辛：我會有律師信俾佢
拐細路題材電影因鬧雙胞起風波。據知《親愛的》今年初在港上映，之前忽然有人放風，指陳可辛知道劉華拍《失孤》，趕拍《親愛的》截糊。不過事件峰迴路轉，電影界近日有消息傳出，原來《親愛的》才是最先有的題材。
周一（ 20日）凌晨，在金像獎慶功宴上，本刊向陳可辛提及《失孤》時，他罕有大動肝火：「我會有律師信俾佢（指《失孤》）。」撐硬男友的吳君如，有傳因此嬲埋劉華，難怪今年拍賀歲片《 12金鴨》時，劉華冇影。問到此事時，君如更黑面吞吞吐吐。
去年陳可辛執導的《親愛的》及劉德華主演的《失孤》，題材類同，兩套片原本同時於去年尾上映，正面交鋒。不過，因為劉華在雨傘運動撐學生，連累《失孤》遭內地抵制，最後要延至今年 3月才可上映，陳可辛先拔頭籌。
早在今年初《親愛的》在港上畫前，電影界吹風，指陳可辛知道劉華拍《失孤》，才趕拍《親愛的》截糊。當時陳可辛暗寸：「拍戲前我真不知道。不過就我所知，劉德華那個片子是很多個故事拼在一起，跟這個還是不一樣。」
《親愛的》被唱搶拍
不過「鬧雙胞」還有另一個版本，「有傳 Peter（陳可辛）籌備拍《親愛的》時，曾經同不少製作人商討劇情。未幾劉華接拍同類題材嘅《失孤》，加上《親愛的》俾人唱截人糊， Peter梗係一肚火啦。」
鬧雙胞事件亦令吳君如同好友劉華的關係變緊張。 01年君如同劉華合作《愛君如夢》後，兩人一直十分老友。之前《金雞》系列，劉華每次都會為君如客串。不過鑑於男友同《失孤》的瓜葛，今年賀歲片《 12金鴨》，君如冇再搵劉華客串。「其實上年拍《失孤》時，劉華為緩和氣氛，都搵君如客串做拐子婆，想君如做和事老，𠱁番 Peter。不過 Peter氣難下，君如局住同劉華反目。」
君如避答
周一凌晨，本刊記者在《金雞 SSS》慶功宴訪問君如。當記者提起劉華，她即時黑面，支吾以對。
忽：點解《 12金鴨》冇搵劉華？
君：吓！你問埋嗰啲咁……嘩！已經上咗落咗畫嘅戲。
忽：有傳劉華聽咗《親愛的》個古仔，至接拍《失孤》？
君：我唔答啦呢個……
而陳可辛聽到記者提問《失孤》，更觸動了神經說：「你問《失孤》啲嘢，我唔答。我到時會有正式聲明，我會有律師信俾佢。（係咪因為《失孤》拍咗個類似劇本？）係呀！我唔答，因為我遲啲會有個正式聲明，我唔會俾你一間講晒！」
據知陳可辛遲遲未有動作，是要慢慢研究《失孤》劇情，力證《親愛的》係「正版貨」。其實陳可辛唔使咁嬲，因為《親愛的》除了令趙薇奪金像獎影后，內地票房埋單 3.42億，比《失孤》的 2億幾票房多，票房同獎項都贏晒
特首仇家
有人民特首之稱的劉華，表面上面面俱圓，但入行以來都有唔少對頭人。
|
鍾意就快D Share啦！
|
|
|