2015年4月2日 星期四

老戲骨 噴無綫 吳耀漢寧願益港台 吳浣儀嘆入黑名單 [壹週刊 - 1308] 無綫,吳浣儀,吳耀漢,M1,



無綫對藝人一啲尊重都冇!(真實對白)

好在我而家拍戲為主!(真實對白)

探熱針

老戲骨 噴無綫 吳耀漢寧願益港台 吳浣儀嘆入黑名單

截至上週五(三月二十七日),《五個小孩的校長》票房已過千萬,片中除了楊千嬅和五個催淚小演員,飾演家長的吳耀漢、吳浣儀、姜皓文和劉玉翠,同樣牽動人心。一班好戲綠葉,提到缺人的無綫,一面倒擰晒頭!吳耀漢誓言不會幫大台拍劇;而出身無綫的吳浣儀,更慨嘆自 90年過檔亞視後,娘家便沒再找她回巢,已入了黑名單。

方丈份人,真係好小氣!

俾樂大媽激親

七十五歲的吳耀漢,在《五個小孩》中飾演拾荒阿伯,笑言一生無窮過,事前曾經親自到屋邨實地觀察,攞靈感的他,接戲片酬屬其次,「最重要係有得發揮,求其一個角色都搵我,係侮辱緊我。」

因為對工作有要求,吳耀漢寧願拍膊頭接港台劇,也不效力無綫。

「我唔睇無綫劇,有時去健身睇到少少,都令我好不耐煩。無綫對藝人一啲尊重都冇,之前明珠台搵我個仔(吳嘉龍)主持時尚節目,幾千蚊一集,但每集要拍三至五日;我打俾樂易玲,佢同我講,公司係俾好少錢,但唔好忘記做完(節目)你個仔會有人識,可以喺出面搵錢。聽完真係發火,咁多年嚟,佢哋都係用咁嘅藉口俾少啲錢人。」

當年有份創立演藝人協會的吳耀漢,曾竭力拉攏汪明荃、鄭裕玲等花旦加入,希望業界齊心,一起向無綫爭取。「啲阿姐話唔好搞喇,冇得爭取,唯一係唔做,因為你唔做,大把人做。」主張有競爭才有進步的他,更力撐王維基,「政府之前發咗兩個電視牌,但又未見嗰啲公司有做嘢,其實我好支持王維基,可惜到而家政府都未有清楚答案俾到市民。」

吳耀漢是影壇笑匠,在《奇謀妙計五福星》中便令人留下深刻印象。

亞視的《吳耀漢攪攪震》是他的代表作。

吳耀漢在《五個小孩的校長》中飾演老來得女的何伯,更在對方家中進行拍攝。

吳耀漢說自己好命,出道於香港電影業蓬勃的時候,兒子吳嘉龍就沒那麼幸運,現仍在掙扎中。

羅蘭借幾十萬解困

至於曾簽約港視的吳浣儀,亦因為發牌無期未有再續約。

「九○年我由無綫過亞視,當時公司有留我,但我堅決走令佢哋唔係好滿意,之後一直冇再搵我,可能永不錄用,入咗黑名單」吳浣儀說。

已經六十一歲的吳浣儀,有四個仔女,孻仔今年亦大學畢業,再無經濟壓力。「而家演戲雖然只係興趣,但仲係好恨遇到好劇本。」

仔大女大,生活無憂,回想○五年丈夫患癌病逝,由於當時子女還在求學階段,吳浣儀當其時要問人借錢度難關。

「好艱難!拍完嘢就要趕返去照顧啲仔女,跟住再撲去醫院睇老公,因為醫病用咗好多錢;老公走咗,一雙手養四個,當時真係要靠朋友幫,我一開口,羅蘭姐就借咗幾十萬俾我,仲有鮑姐(鮑起靜)都係一口就答應幫手,而家已經分期還晒錢,但佢哋雪中送炭,我仲係好多謝佢哋。」吳浣儀說。

《五》片的小演員初時怕吳浣儀演的嫻姨姨惡,所以吳浣儀常要氹番她。

初出道的吳浣儀曾跟黃百鳴合作。

吳浣儀讀無綫第二期訓練班入行,當年她外形不錯。

吳浣儀在《朱門怨》中演三少奶,惡婆形象深入民心。

鍾意就快D Share啦!
Related Posts Plugin for WordPress, Blogger...