位於油麻地的 Café Aboong由
Regina（中）與 Jo（右）自韓國引入。
鯛魚燒雪糕的造型可愛，吸引很多年輕人嘗試，現時每日賣出四百多份，兩位老闆
連食飯時間都沒有。
壹盤生意
女大學生搵快錢 賣雪糕賺$22萬
韓風在香港吹不停，繼芝士排骨及韓式炸雞後，今次襲港的是韓式鯛魚燒雪糕。唔到你唔信，一樣一開即賺。仍在理工讀大學的溫翠婷（ Jo）和李琬琳（ Regina），去年暑假到韓國旅行時，發現一間專賣鯛魚燒雪糕的小店大排長龍，即時傾代理權引入香港，去年十一月在旺角最旺小食的廣華街開設 Café Aboong。
一份三十五元的鯛魚燒雪糕，用新鮮熱辣的鯛魚形狀餅底，配上冰凍的韓式乳酪雪糕，造成「冰火」口感，吸引一班相機先食的九十後幫襯，一個月勁賺廿二萬元。仍未畢業，兩人已滿腹大計，除了在銅鑼灣及灣仔開分店，已諗到搞加盟店盡快搶佔市場……咁，咁好搵，仲使讀書？
書都未讀完已搵大錢的 Jo和 Regina，中三已認識，同於理工大學修讀英文系。 Jo笑說二人有如夫婦般親密，上年暑假還結伴遊韓國。途中兩人見到有小食店大排長龍，唔執輸排埋一份。「嗱，其實我喺香港試過乳酪雪糕，我唔鍾意㗎。」但試過韓式乳酪雪糕就忍不住口。加上鯛魚燒雪糕賣相吸引，兩人回港發電郵傾加盟，加盟費約十萬，再落足嘴頭說服父母打本共四十萬。
Café Aboong位於登打士街及廣華街交界，這條街的小食店來來回回，開完又執、執完又開，能維持三年以上的已算異數。現場所見，該店經常維持二十多人排隊，平均等候二十多分鐘，雖然近日因中學文憑試開考，人流明顯減少，但全日仍保持至少八、九人排隊，左右兩邊賣錶與賣大隻仔奶粉的商鋪，在拍烏蠅，曾向二人「詐型」投訴，分別貼上通告及放出告示牌，要求食客不要在他們門口外等候和停留拍照。 Jo對此頭痛不已：「我哋已經不停呼籲食客企出少少，但佢哋過一陣又企番入去。尋晚旁邊老闆仲鬧啲食客！」
鯛魚燒雪糕只有獨沽兩味，分別是紅豆味及吉士味（奶黃）兩款鯛魚燒，再配上乳酪雪糕，並淋上朱古力漿。現時每日賣出四百多份，營業額已達四十萬元，氣勢強勁。
賣相吸引 相機先食
其實 Café Aboong開店初期生意不太好，首週每日只做得五十單生意。為提高知名度，兩人決定在 facebook賣廣告，放相上去再 tag番鋪頭，可有五蚊優惠；並且建議客人追蹤鋪頭的 Instagram，追蹤後提供兩元折扣優惠。後再經傳媒報導令生意急升，由日賣五十份急升至賣五百份，「突然湧現好多人！好彩 Regina表弟放聖誕假可以幫手。」
Jo認為鯛魚燒的賣相吸引，貌似鯛魚張開大口，吞吃上面的乳酪雪糕，成功吸引喜歡打卡及拍照的港女歡心。記者在現場所見，食客不惜冒雪糕融掉之險，亦要先拍好靚相才開始進食，亦見到大批學生妹未拉開閘已排定隊幫襯，「我哋見到雜誌介紹，覺得外形好得意，所以嚟試。試食前一定要影相啦，放上網同朋友分享。」
韓國實地學師
鯛魚燒雪糕的原材料，全部由韓國總店入貨。鯛魚燒在韓國已調好粉，運來港混入水弄成蛋漿，再放入特製的器具煮好。而放在上面的韓式乳酪軟雪糕，一樣是由韓國運入雪糕粉，再在香港以雪糕機製作。二人為了傾好香港獨家代理權，親自到韓國學師一星期：「同韓國總店經過三、四次電郵溝通後，準備了一份簡單的計劃書，並帶上當地通曉廣東話及韓語的大學生作為面談的翻譯，好快就傾掂咗。之後就學點整鯛魚燒，估唔到除咗粉漿的分量、火候要控制，連乳酪雪糕要唧得靚都唔係咁易。」
鯛魚燒雪糕熱賣，很快就有數個投資者表示有興趣開加盟店， Jo似頭頭是道說，開加盟店能搶佔市場，但自營店才能賺得更多：「加盟店要經我哋向韓國總店入貨，其實每個月都係多幾千元收入，所以都係等佢哋搵好鋪位先再同我傾啦。」她說注意到港島區的租金升幅放緩，因此會拒絕讓加盟店開於銅鑼灣、中環等地段，待下半年租金回落時在港島區搞自營店。雖然計劃多多，但該店已有少少隱憂。
隱憂一：代理權欠自由
Jo深知小食熱潮退得快，因此已打算引入其他韓式地道飲品、小食，帶來新鮮感：「暫時已嘗試過各種韓式百果茶，準備鯛魚燒熱潮有冷卻跡象就推出市場。」然而，韓國總店規定香港代理只能售賣鯛魚燒雪糕，不能出售其他食品， Jo坦言仍未和韓國總店傾掂數。
另外，雖然所有食品都由韓國進口，但想不到韓式乳酪雪糕的口味較酸，並非所有香港人能接受：「好多食客不習慣乳酸味較重，甜味較輕，但因為材料限死由韓國入貨，冇得自己改口味。」因為味道太「正宗」，近日在網上開始傳來劣評， Jo認為網上的評論很極端：「一係就好鍾意食，一係就覺得好難食。我都想喺味道方面着手去改，但代理有限制。」其中試食過的 David便表示不會再幫襯，「乳酪雪糕太酸，鯛魚燒味道可以接受。不過呢個味其實同雀巢乳酪差唔多，三十五蚊有啲貴。」另一食客 Selina覺得乳酪雪糕與一般專門店沒有大分別，「價錢差不多，但多了下面的鯛魚燒，會再嚟試埋另一口味。」
隱憂二：細鋪難發圍
Jo當初花了兩個月時間找鋪，最終以三萬四千元租下目前鋪位，面積約二百呎，足夠放下器材，但這位創業初哥在開店後才知中伏：「電壓原來唔夠，只係放到四個電餅模，生意好嗰時根本做唔切鯛魚燒。」致輪候時間過長，繁忙時間食客投訴要等一、兩小時，不少人經過時都指：「要排咁耐隊，我先無咁得閒！」故 Jo希望在銅鑼灣找一間三百呎鋪位，除了放多幾部電餅模來整鯛魚燒，更希望劃出一半鋪位來賣其他小食，提高生意額。
同時兼顧學業， Jo笑說兩人經常要做 deadline fighter，在訪問前一晚 Regina還在通頂趕功課。原定睡三小時便回鋪接受訪問，因體力透支「瞓過龍」，最後要 Jo致電 Regina母親叫醒她。二人同場匆忙影了數張合照， Jo就回校上課，隨後 Regina亦離開與同學傾另一份功課，鋪頭由 part time打骰。 Jo坦言覺得好辛苦，要通頂做功課及處理牌照等，寧願賺少啲。但一開即賺廿幾萬，生意與學業，大家又會點揀？
開業成本（ 11/14）
加盟費：$100,000
裝 修：$100,000
食 材：$100,000
租 金^：$102,000
器 材：$40,000
總投資：$442,000
^兩按一上
營業資料（ 2/15）
營業額：$450,000
租 金：$34,000
食 材：$130,000
人 工#：$60,000
雜 費：$2,000
盈 利：$224,000
#兩個全職員工、四個兼職
保持新鮮感
現有八間分店的雪糕專門店 Lab Made老闆 Ronnie認為， Café Aboong改變傳統雪糕筒的做法特別：「產品可以有好多變化，鯛魚燒造型一變，就令人再有新鮮感。」鯛魚燒的餡料、乳酪雪糕的味道、雪糕上的裝飾，可以有千變萬化的組合。 Ronnie稱 Lab Made成功之一，就是在於不停研發新口味，平均每兩星期就有一種新口味推出，最近就有一款「奶醬脆多」味，到現時為止已推出過百款口味。
與總店打好關係
Ronnie很清楚海外加盟店的風險，「喺韓國可能好受歡迎的乳酪雪糕，嚟到香港『水土不服』，所以會有人覺得太酸。但要改總店的配方可能有難度，要慢慢解釋香港人的口味與韓國有別。」而且由於經常要有新口味，如果每次都要和總公司傾就會有好大掣肘，宜維持良好關係。
開新鋪外的選擇
Ronnie認為若要堅持到租金較高的港島區開鋪，要多加留意：「開之前要睇吓潮流有無減退跡象。開鋪時機都好重要，盡量避免冬天開新鋪。」 Ronnie補充：「要更多人認識，不一定要於旺區開鋪， Lab Made就不斷與其他機構、品牌合作。」他們剛與「黑暗中對話」舉辦了一個「看不見的味道」的猜雪糕口味遊戲，算是新嘗試。
|
鍾意就快D Share啦！
|
|
|
