熱爆娛樂: 獨斷獨行　話之你嘔血　《今晚睇李》無限添食 [壹週刊

2015年4月2日星期四

獨斷獨行　話之你嘔血　《今晚睇李》無限添食 [壹週刊 - 1308] M1,

就算請來楊千嬅、吳君如等級數的嘉賓，仍冇助李思捷呢個節目收視有翻身。

探熱針

獨斷獨行　話之你嘔血　《今晚睇李》無限添食

自信王李思捷主持監製兼一身的節目《今晚睇李》，收視由開波至今一直仆，網民插爆，下場理應跟年前的《爆足一周》一樣「短命」；但李思捷卻有高層頂實，加埋有亞視快將摺埋「優勢」，《今晚睇李》竟然獲厚待，無限添食，話之觀眾典床典蓆，幾乎割櫈。

余詠珊賜免死金牌

宇宙無限大！電影有宇宙最強甄子丹，樂壇有宇宙 G.E.M.，電視代表，非李思捷莫屬。孭飛主持的《今晚睇李》，又 hard sell又 chok，明抄美國清談節目《 The Tonight Show》，但話題總離不開屎尿屁、同居上床低俗趣味。睇到網民眼火爆圍插，節目收視得十六點。

余詠珊揸旗綜藝科後，近年大台綜藝節目近乎仆直，查小欣的《爆足一周》及由余詠珊一班愛將主持的《尋謎博物館》，均在受壓之下腰斬；《今晚睇李》成績慘淡，理應凍過水，但余詠珊卻下旨賜免死金牌，唔斬之餘仲要添食。

據悉，《今晚睇李》原定拍多十集，但見亞視氣數已盡，獨大的 CCTVB更加肆無忌憚，再下旨將節目由加十集變無限復活。

做主持反應一般，但溝女就相當耍家的李思捷，連高層余詠珊都俾佢搞掂，獲特赦。

亞視俾王征玩到面臨執笠，大台更加放軟手腳啦。

因李思捷錯誤高估自己，令節目變成《今晚唔想睇李》，仲要堅持添食，觀眾被迫硬食。

抄，已經係大台劇集同節目嘅特色。難得李思捷擺明抄足，加埋 Chok爆表現，網民梗係火滾

有指衞世輝臨危受命，在《今日》添食集數接任監製，唔俾自信王自把自為。

《扮嘢王》唔肯執手尾

「原本 Sandy（余詠珊）打算搵家燕姐同王祖藍嘅《 Sunday扮嘢王》嚟個 part 2接棒，但兩個主持唔想再做舊嘢，要求綜藝組再諗橋搞新節目。而家無對手，度嘢又需要時間；反正嚟緊劇集播足七日，個節目都會調動時間， Sandy咪放軟手腳，俾《今晚睇李》撐住先囉。」一名工作人員透露。

《今晚睇李》避過「死刑」，不過有指余詠珊為一挫曾當自己面話「《玩嘢王》收得，有我點會唔掂！」的李思捷氣焰，決定不再讓宇宙捷兼做監製，改由衞世輝接爛攤子，唔再俾李思捷話事，胡作非為。