添好運已上軌道，但培哥（左）依然準時八點到深水埗總店幫手；而強哥（右）為人比較悠閒，大約中午才會落將軍澳分店打點一切。
大錢題
添好運月賺$150萬 廚房佬傳奇
試問世間有邊個廚房佬，可以白手興家，擁有五間米芝蓮餐廳，在海外開十三間分店，仲賺到市值共六千多萬元豪宅？曾在四季酒店和好彩酒樓做點心的麥桂培（培哥）和梁輝強（強哥），五年前開設「添好運點心專門店」，就創出這個成績。
當年二人年到四十，面對事業關卡，決定在香港經濟低潮期，齊齊辭工，合共投資四十萬元開檔。發展至今，估計添好運每月營業額達八百萬，月賺一百五十萬元。培哥和強哥最常說的是：「人生有幾多個十年，再唔搏幾時搏？」不過記者認為他們下的最正確決定，是錢都交由老婆管理：「我哋唔想賭輸晒，老婆話買樓好就買樓咯！」
一身青綠色「添好運」員工服的培哥，沒有半點架子，一直在廚房忙碌地做點心，直到訪問時才肯坐低；而另一個也是做點心的老闆強哥，卻沒有那麼樸素，恤衫西褲加勞力士手錶，但兩人都有一個共通點，就是：「錢？都係交晒俾老婆管理！」
廚房佬都有個習性，就是下午落場時，愛賭兩手，中毒太深的，週末也要過大海。不過培哥與強哥，見過太多因此傾家蕩產的行家，故賭錢最大都是廿蚊雞，其他一律交給老婆處理。強哥會帶老婆去巴黎鳩嗚，買 Hermes袋、 Chanel袋，怎麼也要用上十幾萬，他一臉驕傲地說：「可以令跟了自己二十幾年的老婆開心，值得！」強嫂是同在好彩酒樓工作的知客，見他：「唔聲唔聲好老實！」故安心下嫁。在強嫂揸旗下，有餘錢即掃入牛池灣峻弦及將軍澳天晉等多個單位，現已升值至四千多萬。
坐在旁邊的培哥，對老婆也很「尊重」，他老婆由妹妹介紹，一見鍾情。他說：「我不懂得管錢，全部都拿給老婆投資，她話買樓好就買咯。」培哥手頭亦有長沙灣道怡閣苑及深水埗海峰等單位，市值一千八百多萬。培嫂心足地說：「好滿意佢！無諗過會做到今日咁囉！」
神速賣包 月賺磚頭
這兩個廚房佬成就的發達傳奇，全靠神速賣包秘訣。「添好運」有三十多款固定出售的點心，如蝦餃、燒賣、鹹水角，其中酥皮叉燒包，出名皮鬆餡多，為「鎮店之包」。創出平均每十七秒賣出一個包的佳績，記者計算過，只需兩個半月時間，單單是賣包錢就可買下一層四百六十萬元的將軍澳天晉！神速賣包，做到薄利多銷、貨如輪轉，餐廳設計是第一個關鍵。
自旺角首間店開業以來，添好運內的桌子就已排得密密麻麻，要不搭枱的機會率是：零。椅子沒有靠背，茶水只有普洱和壽眉，而且加單不能超過一次，阿姐亦會自動波趕人走，所以平均每個客人坐三十分鐘，就會埋單走人。這個精密設計來自一向多「計」的培哥：「我哋價錢賣得平嘛，就要做到流轉率高。鍾意坐兩個鐘嘅，就去酒樓」一向沉默少出聲的強哥，亦打開金口：「阿培真係諗得好仔細。」
在四季酒店出身的培哥，指曾在好彩酒樓做街坊點心的強哥，比較自卑，故此意見不多。而坐在旁邊的強哥亦承認：「我係自卑，可能因為細個做酒樓，俾人鬧得多，培哥出主意，我都接受嘅。」兩人性格一凹一凸，爭拗甚少；培哥做領導，強哥做後盾，「有時做決定時，好需要有人說一聲好！先有勇氣實行！」培哥說道。
股份制維持水準
添好運成功的第二個關鍵，是做到五家香港分店的質量都大致統一，未見太大參差。現時添好運在深水埗、中環、大角咀、北角及將軍澳皆有分店；培哥和強哥堅持不用中央廚房，點心在鋪頭即點即製。「我有本簿寫晒點心嘅配方、用料比例，俾每間店嘅廚師跟從。」
由於培哥和強哥難以每日巡鋪，為防偷工減料或做法走樣，維持質素的重責，就落在每間鋪的主管身上。原來主管們都有小量股份，讓他們工作有更大動力。主管的職責，只需金睛火眼「𥄫住」出品部師傅，不需幫手做埋一份。「客人試過一次唔好食，就會判你死刑，我不容許這類事情發生。」最有效的一着，是主管因此行「責任制」，「佢哋按營業額有額外花紅，不過蝕錢嘅話，主管亦要貼番出嚟！」
此外，一間二千呎的點心店，單單出品部就有二十四個員工。煎、煮、炸、炆、蒸、焗，最起碼每一樣都要有兩個人，這樣已需要十二人，還有包餡、搓皮的師傅，培哥實行多人制，「每人專心做一樣，點都會做好啲！」
賺錢黃金方程式
培哥（左）和強哥（右）自從添好運上了軌道後，很少機會兩人坐下談心。被問到兩人有否爭吵反面時，培哥說：「最多冷戰，不會大吵！」培哥為人較進取，而強哥則較被動，所以談到開分店時難免會有意見不合，但最後都可達成共識。
做生意講變通，培哥有一個黃金賺錢方程式：「 1＋ 3＋ 3」，是他開每一間店都計的數。租金保持在營業額的一成，而食材和人事則各三成，變相盈利就會是營業額的兩至三成。培哥說：「都話係方程式，係變㗎嘛，你這個月賺少了，就 cut其他 budget囉！」
現在香港五間添好運每月總收入達八百萬元，估計每月賺一百五十萬，但培哥依然「鍊到好盡」，「我見到店鋪有員工，開住水喉又唔用，見多過三次我就會鬧。」在食材方面，培哥亦時時留意住，好像上個月牛肉入貨多了，未能清貨，他即時與該店主管商量，該個月整多一款新產品──番茄牛肉鍋貼。培哥說：「最重要會變通，不能死守！」
但由於租金不在控制之內，培哥在揀鋪時會靈活走位。第一間旺角總店，由於租金被業主由三萬加到十一萬，索性結業，總店搬到深水埗。培哥嘆氣說：「試過先知，租商場就好啲，因為租金是根據營業額而調整，不會突然瘋狂大加價，容易控制。」
蔡和平執好籌
近年添好運衝出香港，前後在東南亞開設十三間分店。過去有很多大財團想找培哥他們搞連鎖店，但都因擔心控制不了出品而統統推掉，直到遇上一個與飲食業毫無關係的人蔡和平。
蔡和平在電視圈已有五十年經驗，曾製作《歡樂今宵》及經營華娛衞視。一三年他取得添好運的海外特許經營權，短短一年多，已在四個地方，包括新加坡、馬來西亞、台灣及菲律賓設分店。每間店都大排長龍，業務擴張速度連他自己都形容：「發夢都沒有想過這麼快！」今年蔡和平還繼續走培哥的「五星包平價賣」路線，在中環開法國麵包鋪，賣法國甜點和曲奇餅。
培哥笑說合作原因：「當時蔡生來深水埗食點心，而他搞緊威皇廚藝賣陶瓷鑊，話想送給我哋試試，就做了朋友，之後先傾合作嘅。」對於兩個廚房佬來說，談合作還是生平第一次。培哥說：「我和強哥特登坐低，認真諗吓應該講咩條件，我哋傾咗好耐，最後決定俾蔡生提出條件先。」培哥眼仔碌碌說：「如果我哋出口先，講的數目太細，就不划算，但如果出嘅數目太大，就會俾人笑，所以靜觀其變最好。」
海外撞板記
最終，添好運的海外店，培哥和強哥沒有一份股份。「冇所謂啦，出錢嘅都係蔡生。我哋只收管理費，無論賺定蝕都有得攞，我哋覺得咁樣幾好呀。而佢亦不能在香港開添好運，只限開海外。」培哥每數個月才去海外店巡視一次，但他不怕蔡和平做壞添好運招牌：「佢做事好投入，俾我感覺仲緊張過我！而且佢應承肯用靚料，好少生意人肯放咁重成本。」
第一次帶餐廳出海外，自然多「蝦碌嘢」，培哥坦白說：「有時都好麻煩，例如新加坡啲蝦比較鹹，就要再浸水，用開的調味料又冇，真係頭都大埋，冇時間休息。」培哥說這些都是小事，最麻煩的是新加坡沒有他們用開的紐西蘭麵粉，「點心樣樣都要麵粉，唯有大家周圍撲，搞咗成個月，最後都係決定由香港入貨。」
此外，他們為迎合當地口味，也學習加新元素，強哥說：「台灣喜歡肉燥、新加坡喜歡喇沙，那我就整肉燥春卷，和喇沙鮮竹卷。而越南水果夠靚，就會多些甜品。」他們把當地最好的點心師傅高薪挖過來，培哥說：「店入面的管理層，人工都高過當地餐廳兩成左右，雖然錢不是萬能，但打工仔人工高啲，自然就會聽話啲。」
花無百日紅
培哥和強哥兩人，都是由十五歲開始做廚房。強哥童年時因為鄉下太窮，從深圳偷渡來香港，做廚房仔又俾師傅「蝦」，強哥感嘆道：「我同師傅講早晨，佢又鬧我，話：『早咩晨呀，×街！』可能佢賭錢輸咗，發洩喺我度。」而相比之下培哥就幸運得多，「我細個跟我舅父學廚，打狗都睇主人啦，冇人會無啦啦鬧我嘅。」
做了點心二、三十年，○九年他們夥拍創立添好運。五年間狂開分店，培哥一語道出內心的不安：「本來無諗過開咁多間分店。但花無百日紅，趁現在紅，就開多啲先！唔係要等到幾時？」至於好彩出身的強哥，則相信凡事講彩數：「所有嘢都係咁『好彩』，遇到培哥就最『好彩』！」
問到二人搵夠幾時退休？培哥搶答說：「我哋做慣咗，要我哋停落嚟唔做？哈哈，等添好運開到去歐洲先啦，下一間店會係夏威夷呀！」說罷，兩個廚房佬又匆匆入去廚房幫手，他們笑說：「你訪問完未呀？我哋要開工」
|
鍾意就快D Share啦！
|
|
|
