中環人語
捐錢何須等三萬點
四叔早排開出盤口，話政改通過，有助恒指升穿三萬點，咁佢老人家就每年捐十億做公益，除咗有香港呢位四叔股神，仲有喺鄉下順德嘅五叔股聖，五叔李兆楠係四叔喺大陸嘅正牌代理人，等唔切大陸批嘅奀豬豬嘅 QFII額度，早於二千年已透過五叔大陸人身份買 A股，以及以超低價入股欠債企業玩原始股，其中五叔以廣州恒德貿易揸住平安保險 A股，賺過百億元。
四、五年前，間公司榮登廣州私企交稅榜之首，一年交稅十幾億人仔，聽銀行佬八卦，除咗平安保險，仲有其他 A股，現時大陸股票水漲船高，四叔從中賺到笑；所以係有心捐嘅，又使乜等到恒指上三萬點呢？又。
一「石」激起千層浪
最近《經濟日報》研究部主管石鏡泉，親自演繹咗咩叫「面係人哋俾、架係自己丟」。上週二佢寫咗篇《優質報道毋須犯險》社論，不點名批評《蘋果》記者前往韓國採訪新沙士是以身犯險。身為傳媒高層，石 sir一番偉論，當然一「石」激起千層浪啦，仲被揭發一篇二千七百字的股評，有二千四百字都是「引用」內地文章。
石 sir高深之處，在於唔認衰，仲回應讚自己抄得高明，抄到老友賺錢。有《經濟》員工睇唔過眼，向小宗爆料，話呢個「天下文章一大抄」嘅情況，已經存在好幾年。以前人手充足，有「槍手」代勞，呢幾年人手緊縮，無咩「槍手」，咁水退就知邊個無褲著囉！而讀者見到「研究部主管」呢個 title，以為巧威威啦，但員工爆料，其實成個研究部得石 sir一個人咋！掛個名、每日抄幾篇人哋嘅大作，一年𢭃近三百萬人工！只能說句，這些機會，不是屬於《經濟》前線員工的……
金融逍遙客 股票食物鏈
游走於中港台併購、私募投資的金融多棲動物，現為多間上市公司主要股東及董事
股票上搵錢，屬於快錢中的快錢，慳水慳力，係人都趨之若鶩但逍遙客環顧身邊至親好友，有能力真正賺到錢落袋者，少之又少，單靠聽消息左炒右炒，多數悲劇收場。計我話，股票市場是一條完整食物鏈，要喺呢條鏈條上搵食，首先要認清楚自己處於鏈條上邊個位置。若搞錯角色，搵唔到錢事小，連命都無就事大了。
在股票生物鏈最上端的，是能印股票換現金的上市公司。平時我哋炒開嘅二、三線庄家股，「公司」同「大股東」是個等號，公司利益就是大股東的利益，雖然法律上唔係。他們是森林中的獅子獵豹，最好唔好惹佢哋。而鏈條中間，是一眾知識經驗全面的基金經理、身經百戰的專業投資者或股民，覓食範圍像鬣狗（ Hyena）。常見咬力強大但身形細小的鬣狗，平時可群逼獅子，但偶而激怒雄獅也死得很慘。
食物鏈的底端，是一眾永遠成熟不了、既善良又純、只求搵餐買餸錢的散戶。對了，他們就像草原上跳跳扎的小羚羊，走到河邊飲啖水就成為了鱷魚嘅點心。正如社會階層移動一樣，獅子山下的普通市民，都要靠教育或一番奮鬥，才能上移至中產階段，少啲努力都難以跳出所屬階層。眼見今年市場間多個股票微信群，培養咗一堆股神，群主每日就好似寫馬經。早期逢貼必中，培養咗一堆唔多用腦但又想靠買股票發達的粉絲，一傳十，十傳百，一個「股仔傳銷系統」就咁樣建立起來！近排股仔急速回調，呢啲粉絲頓成大戶點心。其實在股票市場，也須努力爭取向食物鏈上方移動才能生存，無人一出生就係森林之王，要改變身份請老老實實進修基本知識、總結教訓，才能有機會唔再做小羚羊！
中環吋嘴 起完雙飛再飲靚湯
工廈大王楊耀松長子，是各大有名食肆之 VIP，喜歡研究城中富豪對食之要求，透過美酒佳餚，來細味人生百態。
近排休漁期，難搵海鮮食呀，喺中環行過去西環間尚興，粗粗哋歎吓潮州菜，呢度係響螺專科，攞貨量多嘛，隨時都有得食，連「家己冷」佳寧娜有時都要同佢「借貨」，唔係股票借貨呀，係借螺頭，不過唔知佳寧娜還錢定還螺頭啫！
一塊螺片五嚿水，一隻響螺切到四片，我仲可以攞走個螺頭，梗係要一隻着數啲。正所謂要食得精，又食又要拎！嗱，師傅切螺片嘅刀法叫蝴蝶雙飛，塊螺片好似隻蝴蝶咁嘅，入口梗係又爽又鮮甜！呢度有碟叫「博士炒麵」，原來只係冇蝦嘅炒麵，問個恃老賣老嘅侍仔創呢碟炒麵係乜誰，到底係性博士還是茶博士呀？唓，佢唔肯講，計我話呢個乜博士唔識計數，冇蝦咪蝕咗章。
以前啲食家好鍾意幫菜式改名，有款「爵士湯」咪係香港首位華人爵士馮秉芬改名囉，即係蜜瓜煲螺頭。我都唔輸蝕，喺尚興擸走個螺頭，返去俾我菲傭煲湯，督住佢要用燒酒「瀨瀨佢」再用個鑊爆吓先好，叫佢搵個老黃瓜、木瓜、瘦肉、陳年嘅陳皮，加啲扁豆去煲。有我呢位武術指導，喺屋企先有碗靚湯飲潤吓喉。嗱，我都係香港航空青年團嘅榮譽上校，呢碗我創出來嘅湯就叫「上校湯」
近排中環人要行出嚟講政改，計我話香港富豪好簡單啫，就係愛國、愛港、愛銀紙！
本週圖片
喺中環安蘭街十八號呢幢大廈內，除咗以前特首二廚作招徠嘅禮賓傅食府，還有間頂樓法國餐廳 ON DINING Kitchen& Lounge，廚師最叻用唔同嘅酒來煮食，招客方法原來就喺頂樓，以法文「 Cést la vie」髹上熒光漆，夜晚睇好似霓虹燈；目標顧客當然係中半山望到呢句法文嘅優皮一族啦。不過呢句法文意謂「這就是人生」，似乎啱佢啲員工聽多啲，因為餐廳週日休息。
金牙大狀講嘢 買票卑劣抹黑、篩選應有之義
為咗通過政改，上頭不惜以三億銀買票之說不脛而走；西環張曉明話呢個係對中央嘅卑劣抹黑。呢個講法都咪話唔搞笑也。
大家都記得，港澳辦王光亞喺深圳打開天窗說亮話，向全世界承認，八三一政改嘅目的就係篩走北京唔妥嘅人。即係阿爺揀咗至到大家揀，唔使慌最終選出來嘅人跳得出阿爺座五指山。
三億買票嘅目的又係乜？當然係等阿爺可以為所欲為，想點就點。請問咁同篩選有乜分別先？要香港人食死貓，將如假包換嘅篩選當到正係真普選都夠膽死，咁仲有乜嘢會做唔出呢？
仲有，強國金錢掛帥，舉國上下莫不以為有錢就大晒，若果三億銀就搞得掂，你估佢會唔會做啦。卑劣抹黑，佢識得乜嘢叫做卑劣？開——玩——笑。
中環人語迷你版
“反政改將來就知錯”
估中邊個中環人講呢句說話，送你 plantronics. Voyager Legend Signature Black藍牙耳機一個有意參加者，請於六月十七日（星期三）下午一時後，將答案、姓名及聯絡電話電郵至centralman@nextmedia.com小宗只接受電郵，郵寄免問。
本刊員工及直系親屬不得參加。
為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於下期本欄揭曉。
廣告時間
你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp： 6829 5929
|
鍾意就快D Share啦！
|
|
|