探熱針
NG女王 多懶音 甩對白 戲屎蔡思貝累街坊
大台新一代「姣精」蔡思貝，最近在新劇《潮流教主》再次擔正做女一，同陳豪做對手，上位速度極快。上星期，劇組在中環拍外景，出名戲屎的蔡思貝，講對白吓吓出現懶音，頻頻 NG，要導演落場，捉住逐句教咬字，一個 shot拍足兩粒鐘，被幕後賜封「 NG女王」。
導演親自教路
在劇集《衝線》首次孭正的蔡思貝，被網民大彈演技浮誇，講對白有懶音似小學雞；劣評如潮，但因為冧功了得，深得高層、監製歡心，繼續坐正劇接劇。
上週五（六月十二日），蔡思貝同陳瀅在中環一間露天咖啡室為新劇《潮流教主》開工。其間，蔡思貝一時因咬字有問題，一時忘記對白，搞到頻頻 NG，導演忍無可忍，親自出馬教她咬字，簡單一個 shot，重拍又重拍十幾次。
「蔡思貝講嘢一向都有懶音，又鍾意將一句對白斷開幾段講，食晒螺絲咁，幕後個個叫佢『 NG女王』，大熱天時出外景，郁吓十幾 take先搞掂，好惡頂㗎！」一名劇組人員透露。
向陳瀅道歉
之後，劇組轉場到人多車仲多的十字路口拍蔡思貝過馬路戲，踢住人字拖的她站在路中心先換上高踭鞋再埋位。由於拍攝地點太繁忙，拍攝進度受影響，拍吓等吓的蔡思貝開始唔耐煩，助手即刻識做，遞上凍飲降火。
「 Sisley（蔡思貝）都有啲未紅先驕，開親工都要拍晒佢啲戲先，試過因為拍咗其他人啲戲，要佢喺公司車度等下一場，就即刻發𤷪𤺧，話自己三十六個鐘冇瞓過，點解仲要等？好巴閉㗎！」劇組工作人員說。
最後一場戲，是在便利店取景，等埋位前，蔡思貝電話不離手不停聽短訊，其間有便利店職員想和她影合照，雖然冇拒絕，但嘴藐藐一臉不耐煩，表現不甚友善。
到正式 roll機埋位，蔡思貝繼續例牌菜：唔記得對白，連環 NG，唯有不停以笑遮醜。自知累街坊，臨走前，再巴閉的蔡思貝都不忘向陳瀅「耍冧」。
|
鍾意就快D Share啦！
|
|
|