靚抽王
Cap圖龍虎榜
平日一打開 facebook同 WhatsApp，可謂 cap圖滿天飛， cap圖已經成為我哋生活嘅一部分。今期至新至 hit嘅 cap圖係乜？睇 Cap圖龍虎榜！
男女神成婚，網民擔心
男神黃曉明同女神 Angelababy終於喺早幾日成婚，網民們對呢對金童玉女愛護有加，除咗恭喜佢哋新婚快樂，仲有好多朋友都希望佢哋連生貴子。不過就有愛偶像嘅網民擔心，佢哋兩人生出嚟嘅子女恐怕同佢哋唔多似樣……計我話，啲網民擔心都多餘，樣貌有分先天後天，先天生成係咁，無得控制；後天改造，就多變化好多，如果生出嚟真係唔滿意，點解一定要袋住先啫？我哋可以後天改造㗎嘛！到時生一仔一女，女嘅改到似媽媽，仔嘅改到似爸爸，何樂而不為？
聽日一定會好天嘅！
近日天氣一時陽光普照，一時就大雨連連，久違咗嘅黑雨終於出現。不過係喺辦公時間，即係話市民仍然要留喺安全地方，即係留喺公司度繼續辦公……網民們意興闌珊，惟有改圖抒情，先有力場代表李生出嚟嘲笑打工仔，再有政府宣傳片同大家講：「聽日一定會好天嘅！」
至於點解聽日一定會好天？原來係因為聽日一定要返工，噢賣佛經割。
識做廣告嘅一定係咁做
朱古力品牌借住城中藝人同政客嘅金句做廣告，命名為「肚餓語錄」。當中陳豪做古代皇帝台詞「同朕 check吓」，同唐唐、董伯、 tree根等人嘅名句都有入圍。有網民喺網上整咗個網頁響應呢個金句活動，好多香港本土出產嘅名言金句都出現喺臉書，例如係黎明嘅「唔會空肚食早餐」。呢個廣告認為，點解啲藝人同政客講多錯多，全因肚餓。嗯……咁肚餓都唔一定要食朱古力啫！
|
鍾意就快D Share啦！
|
|
|