真人騷
單身 38年 揹住 102張傳票 葉家寶：我諗我太愛亞視
訪問葉家寶之前，我來過亞視大埔總台兩次。
第一次是訪問以零收視聞名電視界的高志森，第二次則是在葉家寶之前擔任執行董事的盛品儒。
高先生那套我想應該叫事不關己：「本港台本港收視長期錄得零關我咩事呢？總之《高志森微博》長做長有就得喇，我聽講珠三角有過百萬觀眾囉！」
至於盛品儒，四個字：風流灑脫。在任期間風流，離職時則灑脫。
雖說是被通訊局勒令，又會咁啱，王征堂弟離開之時，亦是繼任人選葉家寶的惡夢開始之際。
59歲的葉家寶， 78年畢業於浸會傳理系，做過大台和港台，亦幫過周梁淑怡和陳家瑛，不過他說一生中最黃金的年月是在亞視度過，所以就算最差的時候，也從來沒想過要跳船。
有得跳船時唔跳，結果呢？用惡夢來形容的，不是我，而是葉家寶自己：「我一世人安份守己，為咗亞視傾盡所能，唯一一次瞓唔着就係收到傳票告我欠薪……仲要唔係一張，而係 102張。我諗我真係太愛亞視，亦都太天真太樂觀，個位（執行董事）冇人做惟有我做，又真係搞成咁，，我至知原來執行董事喺公司法嚟講要負法律責任！」
一生不娶、至今單身，為了亞視焦頭爛額搞到周身蟻，我眼前的葉家寶依舊笑得天真無邪話無悔……我想這就是真愛，高志森和盛品儒固然沒法比，連亞視頭馬朱慧珊和劉錫賢亦差九條街。
煩惱由做執董開始
亞視賣盤進度現時係？
我哋嘅新投資者同原本大股東簽咗協議，搞緊手續，而通訊局都發咗信，要我哋十四日內要交轉股東嘅申請，我諗我哋都會依照個要求喺限期內做好。
呢一年來係唔係前所未有咁忙？
主要由舊年三月做咗執行董事開始計……其實我喺亞視做過好多崗位，最早負責製作部、管過公關宣傳、做過特備節目，亦都做過營業部，好多部門都經歷過。但真正比較忙、好多煩惱就係做執行董事開始。頭嗰段日子都叫順暢，由舊年九月發唔到薪金，就真係日夜都忙得好犀利，有時返咗屋企都籌算點出糧、幾時出到糧……
當間公司出唔到糧，身為一個執行董事，你可以點做？
當時，我都好震驚。以前我雖然唔係執董，但都有開高層管理會議，都好了解公司運作，又久唔久會聽到電視新聞話：主要投資者王征先生又注資咗幾多錢……我知過往唔夠錢，投資者都會借錢出糧或者幫助營運，舊年九月點解唔俾？諗都諗唔到……
點解唔俾呢？
我唔係讀會計財務出身，但係都要即刻去了解，據我所知當時賣盤傾成新買家， 09年亞視出糧有問題，王征當時接手又係未辦手續已經攞咗錢出嚟出糧接管，我諗佢係用番呢個理論就唔再俾錢……始終自己唔係老闆，我只能夠不斷打電話，去協調老闆協調員工。
係囉，你唔係老闆，點樣每日對住嗰班冇糧出嘅員工？
最壞嘅時候，我都對公司充滿希望。點解？因為有好多有興趣嘅投資者打俾我，我睇到希望。但係員工未必了解，甚至有人以為公司有錢係特登唔出糧……佢哋唔知，係因為老闆之間有矛盾。我喺呢個位，董事局有壓力俾我、員工有壓力俾我、對外見傳媒又有壓力……所有嘢都係我一個人面對。
員工點俾壓力你？
問我幾時出糧囉！佢唔講，你都睇到㗎嘛，每朝基層會都聽到職員心聲，最慘我連個日期都俾唔到……
你認為亞視最好嘅時代係幾時？
梗係有錢嗰陣時！作為公眾電視點都要灑金，記得林百欣同鄭裕彤先生入主時，又搵周梁淑怡入嚟，轉台名、轉台微、又高薪挖角，肥肥、何 B都嚟咗亞視，最緊要連隔籬台台聲蕭亮都嚟埋……嗰陣時最輝煌。
當時你喺邊個崗位？
廣播執行總監助理。其實我 77年入亞視實習， 85年喺周梁淑怡旗下時，佢間製作公司都幫亞視做咗好多年亞姐、未來偶像爭霸戰，所以話我同亞視真係好有淵源。
資料話係你第一個諗到將流行歌手 crossover管弦樂團？
正確嚟講係周太諗到，佢係我師傅，唔可以話係我功勞，當年我三十頭，都係初出茅廬，係將周太念頭實踐咁解。
唔知執董要負法律責任
最輝煌嘅年代同最不濟嘅年代都俾你遇到？
人生都有起跌，總有得心應手嘅時候，又有一步都難行嘅時候，我覺得𠵱家係充滿挑戰……我自己覺得困難唔緊要，總有辦法解決，不過最令到我不安，係惹上官非。我都係打份工啫，點解會搞到咁？但就係搞到咁，我至知原來公司法真係有條咁嘅例，執行董事要負起呢個責，收咗 102張傳票。
一世人第一次收傳票？
真係一世人第一次，我都係被拖欠嗰個，仲要係出咗人哋先，最後先至輪到我出嗰個，點解要告我呢？我自己心裡面都有啲唔平衡、唔開心，滋擾情緒……好彩我個人樂觀，好多人話咁多嘢一齊嚟，我 EQ好高。
覺唔覺得自己好寃枉？幾次出得成糧係靠你調解，最後俾人告又係你？
我覺得㗎，梁美芬同陳婉嫻都為我發聲，其實我見記者啫，我又唔係老闆，唯一可以講，自己法律意識唔夠，唔知執行董事喺香港公司法有法律責任……如果知……
冇人肯做呢個位？
其一，真係冇人肯做呢個位，其二，要走容乜易呢？我唔係話誇口，就算走，我生活唔會困難，亦都唔憂搵唔到第二份工……
咁你點解唔走？
早期，我冇諗過會搞到咁，後期，都已經去到呢個地步，走太唔負責任，一係就一早走。我諗我真係太愛亞視……
做咩咁愛亞視？
我大學三年班實習、四年班喺麗的寫綜藝節目 gag show，係我第一次接觸電視圈。雖然第一份正式工作喺無綫、又做過港台、幫過周梁淑怡同陳家瑛，但我最寶貴、最黃金嘅時間都喺亞視度過。同埋，當然係因為亞視嗰份人情味。
好多人都話亞視有人情味，點解呢？
即使有大老闆、有錢時，亞視個人情味都喺度，老闆林百欣都有人情味，因為我哋係弱者，長期被打、俾人叫二奶台，連出到嚟人哋都覺得無綫馨香啲、亞視又有亞視除，所以我哋啲員工團結好多，唔想俾人睇死。仲有一樣嘢，我覺得喺亞視仲有好多嘢未做到，壯志未酬咁……
都去到咁嘅環境，你仲覺得壯志未酬？
係呀，咁多次我都仲覺得有轉機，咁多老闆有興趣……
你唔怕下次嗰個又似王征，走去政總跳舞？
咁每個老闆都有佢過人之處，佢嘅特性用喺某啲地方可能係長處，可能喺某啲人眼中係優點呢？好似我太樂觀，都有人覺得我太好人、唔知死㗎！好多人都問我點解仲笑得落、點解仲瞓得着覺……雖然我有段時間真係瞓唔到……
你真係會瞓唔到？
真係有段咁嘅日子，心裡面點都有條刺，就算解決咗出糧喇，仲有官非呢……
最高刑罰有冇了解過係幾多？
最高刑罰係坐三年監、罰款 35萬元……一宗喎！我𠵱家俾人告緊 102宗喎！我唔知，睇番紀錄過往好少要坐監，而真係罪成張振遠，個 case同我唔同嘛，人哋係老闆又係故意，我唔係吖嘛！係就係遲咗，但我哋同員工𠵱家冇拖冇欠，連息都計埋，遲係因為公司困難啫，係唔係一困難就要執笠？就要跳船先？
唔通有困難就要跳船
𠵱家有冇後悔唔一早跳船？
𠵱家後悔都無意思啦，我覺得只可以話係經驗，人行到邊一步真係冥冥中有安排，特別我個人係基督徒，可能真係神嘅安排。
你咁樂觀，喺官司方面，又點安慰自己？
有好多朋友為我祈禱，喺街外都係，好多人為我加油。𠵱家真係多咗好多人認得我。
冇錯，亞視最紅嗰個就係你！
我自己係唔想㗎，應該係藝員最紅㗎嘛……大家都知唔關我事，我自己亦都覺得問心無愧，我喺亞視做嘅每一樣嘢，未必全部啱，但都係盡心去做。我係天真啲、樂觀啲，我辭職容乜易，但我真係唔想七百人冇工開、一影響就可能影響咁多家庭二、三千人吖嘛！
由七十年代入行到𠵱家，一個時代的終結你應該見慣，點解係接受唔到亞視執笠？
時代變遷係啱，但係唔係就要放棄呢？真係執咗，就冇㗎喇……重新申請牌照又幾年，亞視就真係冇咗幾年，幾年之後都唔知社會變咗咩模樣。
係唔係因為一直太盡責、一直太多嘢纏身，所以冇時間拍拖？
我自己都比較鍾意獨居生活，可能我家庭幾好，爸爸 49年由大陸落嚟，行過船做過電器代理，有五兄弟姊妹，我排第四，家人互相照顧得好、而我就享受獨居生活，鍾意做乜嘢就做乜嘢。我啲興趣又難同人夾到，鍾意藝術、鍾意睇書，咁多年慣咗獨處。再講我啲朋友都唔少，教會、生活、同工作上，我唔覺得孤獨。
有冇試過，曾經出現過一個人？
要講到去讀書年代，曾經都有過深刻感覺，不過人哋都結咗婚喇，可能行業都有關係，我哋做呢行唔定時、周圍飛、周末都要做嘢。雖然我忠於亞視，但係都試過有北京、台灣、新加坡嘅工作搵我，爹哋媽咪過咗身、我又一個人，幾好吖，真係要走起上嚟冇乜牽掛。
咁多年淨係出現過呢一個？
有啲嘅……但係我覺得冇可能。係，都係我單方面，我選擇唔講出嚟。
除咗太天真太樂觀，你覺唔覺呢個係你缺點？
我個人係內向啲，鍾意嘅嘢係個人啲，一個人都做到。啱嘅，出一句聲可能已經唔同，我係唔識主動爭取，好似工作一樣，安份守己，有人欣賞你，佢自然會提出……
聽落，就好似你用咗大半生同亞視談戀愛，但得到嘅只係 102張傳票？
你都可以咁講……哈哈，呢段日子係人生不可多得嘅經歷，有幾多人會有呢啲經歷？雖然個經歷殘酷啲、唔知個結局係點，但我唔會後悔，我盡咗力。真係有人問我，係唔係咁偉大，可能我個人真係呢個思維。
|
鍾意就快D Share啦！
|
|
|