前主播陳珍妮（Jenny）喺無綫新聞部工作三年多，佢認定呢段係人生黑暗日子，今年書展就出《TVB新聞部血淚史》盡呻心中情，離開咗無綫嘅新聞之花周嘉儀接受《蘋果》電話訪問，佢就同Jenny唱反調，對舊公司讚不絕口：「對我嚟講，個腦記住好多開心畫面，唔係都唔會做咗十年，我又唔覺有啲乜嘢辛酸同血淚。」
嘉儀BB避談有冇興趣買本嚟八吓？佢只係話：「我都喺新部聞部工作咗十年，好清楚了解嗰個環境，唔想再咁八卦舊公司啲嘢，佢講嘅故事內容，我唔想評論咁多。」
Jenny自爆工作期間要啪安眠藥，嘉儀BB就答：「我就瞓得好好，冇乜失眠嘅情況。」Jenny話驚唔走會生癌，嘉儀BB好大反應：「吓？no comment！」書中有揞名爆料，嘉儀BB話問心無愧，大方話唔怕畀人寫：「唔擔心，我又冇嘢唔畀人知得、唔畀人講得。」覺唔覺Jenny出書想抽水，嘉儀BB話：「每人有佢表達自由，有佢表達事情方式，祝佢成功。」不過嘉儀BB自問冇料爆，唔會出呢類書。
|
鍾意就快D Share啦！
|
|
|