娘過《愛．回家》 恒管乖女寫信氹老竇 [FACE - 425 - 大專校園] MF,

何盈盈　 Yankee　恒生管理學院新聞及傳播學系 Yr.3

Yankee第一次參加辯論比賽就獲得「最佳辯論員獎」，伶牙俐齒面對大大小小的面試都無有怕，連去廉政公署面試做暑期實習，一樣輕鬆過關。

U花 U草

娘過《愛．回家》　恒管乖女寫信氹老竇

90後同父母嘈交，最叻一走了之或者閂埋房門發脾四，想佢同你道歉真係諗多咗。

不過乖乖女何盈盈（ Yankee）就唔同，嗌完交會自動波寫信同父母解釋，就算 WhatsApp㩒個制咁方便， 21歲的 Yankee都堅持手寫先最真心。雖然聽落似足《愛．回家》起雞皮娘橋段，不過父母睇到囡囡咁有誠意，乜火都順番，呢招係冧嘅！

「我一向都好鍾意講嘢，中五嗰年想入辯論隊訓練口才，不過爸爸驚我會變得好偏激，又怕練習時間長。嗰晚嗌完交我就漏夜寫咗封信擺喺佢床頭，解釋自己因為太鍾意講嘢同想訓練口才先想入辯論隊，兼氹番佢，希望佢唔好咁嬲，第朝佢睇完封信之後就回信話批准我入隊。」寫信可以話係 Yankee屋企嘅特色，簡單到佢想問父母拎二百蚊買隱形眼鏡，都會畫張通告，叫父母圈番同意定唔同意。「有時嗌交未必次次都係我錯，但始終破壞咗大家感情，想講啲肉麻說話，面對面又講唔出口，反而親手寫會易啲表達。」《愛．回家》可以照抄呀！

Yankee能言善辯，「畢業之後都想從事同講嘢有關嘅工作啦，做主播都唔錯！」

咪以為 Yankee又白又瘦就一定係運動絕緣體，其實佢鍾意跑步同做瑜伽，仲係 University Nike Icon代表，成日有免費運動用品任拎，恨死唔少大學生。

Yankee（紅圈）去過廉署做實習，負責社區關係，「廉署入面個個員工都好忙，宣傳廉潔信息，講吓講座，所以短短兩個月都學到好多嘢！」

鍾意就快D Share啦！

下一篇 》