「大家眼中的『女神』，其實只是被啤膠後再打燈營造出來的假象。觀眾要有fantasy，要相信他們想相信的，在電視前無限上綱，那沒辦法的，坐一邊發夢去吧！」原來鏡頭前你日夜供奉的女神，表面上滑溜的皮膚是粉底液搽上一層粉膏再上碎粉，批盪咁樣樣；水靈靈大眼，其實真人都似《少林足球》嘅阿梅。
由五官表像的「假」，講到高層與主播的「假」。阿梅近睇無疑是夠驚嚇，但陳珍妮筆下的大台新聞部生存之道，卻更驚心動魄。
由頭講起，陳珍妮但先講對腳。是的，講腳。2012年，張文采因為一條紫紅色碎花短裙、被高層指太短，被罰停報新聞，連帶損失可觀嘅出鏡費。原來陳珍妮都試過喎。佢「得罪」嗰個，係陳志雲——嘅秘書。
陳珍妮《TVB新聞部血淚史》此書，第一個故事，就係講呢條裙。「傳媒夢因為一條裙完蛋？」係有可能嘅。事發時，據陳珍妮於書中所講，佢著咗條裙連身及膝，坐巴士下層最後靠窗位置。兩日後，上司S(全書所有人物都唔會開名)指時任總經理陳志雲嘅秘書，喺城巴見到陳珍妮，指佢「擘大對腳走晒光」，重點係：「佢哋話你唔檢點呀!」
陳珍妮日前接受《蘋果》專訪時，提及此事，難以釋懷:「我覺得我係第一個俾人話我唔檢點嘅人。我係俾我老闆話我唔檢點，因為我條裙太短。條裙去到膝頭哥，我唔明點解會俾人咁講。」一條裙的代價，除包括絕跡翡翠台新聞時段半年，還有出鏡費；更表亂過嚟M，一係長返通宵，一係返通宵後放一日假然後再返1400，如是者半年。
好喇，好不容易捱咗半年。傾apprasial時，陳珍妮鄭重地向管理層樹先生請教自己如何能做得更好。「樹先生頓了一頓說:『檢點啲啦。』哈哈哈哈。」
咁個頭呢？點解個個女主播個look好似差唔多樣，因為有「御用髮型師」。陳珍妮於書中憶述，上司S留邊種髮型，會要求個個同佢一樣。有段時期興One length 頭，個個變晒One length，前長後短後面bob bob哋，出鏡時一邊頭髮往耳後撥。有印象不？
呢個「御用髮型師」，並非大台髮型師，而係上司S嘅私人髮型師。個個去佢度髮，閒聊幾句公司是非，悉數收錄於呢位髮型師hard disk裡面。就係咁，傳來傳去……「不能捍衛自己的頭髮，還可以捍衛甚麼。」陳珍妮問。
|
鍾意就快D Share啦！
|
|
|