前主播陳珍妮的新書《TVB新聞部血淚史》爆無綫新聞部大鑊，離職3年多的她於自序表示，此刻聽到大台新聞片頭預告聲仍會打冷震：「畢竟服安眠藥才能度日的歲月，烙印太深。」書中Jenny揞名爆黑幕，她指回憶都痛苦：「再留下，我會生癌的。走吧！」Jenny日前在中環接受本報獨家專訪，講到激動處更眼紅紅。
Jenny在第一篇便自爆得罪陳志雲，她提到某年生日，臨時接通知返公司上堂，壽星女當日淡妝配穿及膝裙，但兩日後被上司照肺，她當日離開坐城巴下層最後靠窗位，被當時陳志雲秘書撞到，指她「擘大對腳走晒光」，負上「唔檢點」罪，Jenny解釋其實有放大手袋在及膝裙上，沒可能走光，解釋變掩飾，Jenny從此沒運行，陳生有份審閱出鏡費卡士沒份，連帶半年返通宵更。Jenny提到其後向管理層「樹先生」請教如何改進，她說：「樹先生頓了一頓說『檢點啲啦』。」
入世未深的Jenny不知同事間溝通用的Intranet會惹是非，「樹先生」有權限看到全部留言，Jenny試過在直播時，被指髮型不對要即拆髻，她事後才知一直被針對是因為曾在Intranet鬧過老細。Jenny又呻有時委屈到要暱埋喊，轉頭又假笑出鏡:「喊完返去執個樣又再讀囉。」
入職月薪只有$11,000的她要淘寶買平價套裝，上司S卻要她幫襯其私人髮型師，又要有指定髮型，試過明明沒戴錯吊吊揈耳環，卻受罰要寫道歉信。Jenny與負責編更主播C不熟，更表往往最「惡哽」，她在書中控訴：「大台徹底摧毀並改造我的價值觀。」
訪問當天，Jenny直認壓力爆煲失眠：「臨走前半年係咁睇醫生，醫生話太大壓力，更表太亂，成日返通宵，有時返完通宵又返晏，返完晏又返早，跟住又通宵，成日瞓唔到。醫生知道我情緒上有問題，開血清素同B雜畀我食。」
Jenny瀕臨抑鬱邊緣，回想近4年黑暗生涯，忽然淚盈於睫，Jenny沒向上司反映不公平嗎？她說：「講過佢唔理，嘥氣啦。我問佢唔係有能者居之，跟住佢答呢度唔係，所以先輪到你。」上司不關心員工？Jenny說：「佢唔關心我囉，唔得寵！我接受咗自己唔係老細最鐘意嗰個，一個人可以坐大，係俾上司縱到咁，一個咁大嘅機構，唔係需要做到嘢嘅人，點解會咁扭曲?」Jenny揞名爆惡頂同事:「呢個人真係喺我身上留低過傷痕。」
|
鍾意就快D Share啦！
|
|
|