網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年7月1日 星期三

荔園中環重開 好掛住大象天奴呀 [FACE - 423] 荔園,MF,



全知言

荔園中環重開 好掛住大象天奴呀

荔園喺中環重開,我哋又可以重拾 18年前嘅集體回憶喇!大家對荔園有乜難忘回憶呢?原來官恩娜同梁漢文最深刻印象係玩鬼屋,邵仲衡就試過俾馬騮神偷嚇到發惡夢添呀!

官恩娜 掟香口膠最開心

最深刻係掟香口膠,小朋友掟到香口膠會好開心又記得好似有個隧道咁嘅地方有啲恐怖!我咁鍾意聽鬼故唔知係咪嗰陣培養出嚟!知道荔園會重開都幾興奮,想去睇吓,重拾番啲回憶,懷舊吓!或者同屋企人開心吓咁我個仔已經 book咗我一齊去喇,佢長期喺我個肚度,又會同老公囉,或者爸爸媽咪呀,約定一齊去。

梁漢文 鬼屋好恐怖



最深刻係鬼屋,因為係我人生第一次入鬼屋,係阿媽帶我入去,阿媽好鍾意聽鬼故呀、怪談呀嗰啲嘢!嗰次帶我入鬼屋,得幾歲,係好驚好驚!雖然好似係坐住架車穿過個洞咁,雖然唔係真人走出嚟嚇你,但感覺都好恐怖!嗰次之後就上咗癮,沉迷玩鬼屋。

袁嘉敏 睇大象好 high



我諗去過兩次荔園,都係為咗睇隻大笨象好興奮!因為我好細粒啦,隻象就好似特別大咁,好似見到怪物咁,但佢啲眼神好善良,但因為阿媽第二次去就玩過山車,暈到嘔,哈哈我嘅美好回憶就係佢嘅陰影囉!所以之後都冇帶我哋去喇,因為啲動物又見過啦,佢又玩過山車玩到暈,暈咗又照顧唔到我哋,所以佢話都係唔好喇,但我覺得如果香港有大象就好,因為佢可以帶嚟幸運囉!

邵仲衡 俾馬騮嚇死

最深刻係隻大象我去時應該得 10歲以下,記得臭到飛起,但好鍾意買比出面貴幾倍嘅香蕉,大人都會買俾我哋餵佢囉!同埋記得有馬騮,我餵佢一手伸埋去,隻馬騮一手抓住我隻手,嚇到我面到青、尿都標埋咁滯,阿媽同佢鬥搶,一嘢拍落隻馬騮度,跟住仲要鬧佢好似隻馬騮有人性咁。

DaDa陳靜 懷念全家齊整



有影過相,同屋企人有去荔園嘅水上樂園,細個會同家姐同親戚去玩,憑啲相睇到係泳照嚟,好細個嗰啲泳照,仲好似有韆鞦,最印象深刻有個模型大猩猩,其他嘢都應該有玩過,但冇留低相,我估當時 3、 4歲。再開絕對有興趣去玩,因為人大咗呢,好多細個嘅回憶未必咁深刻,屋企人都同我講,以前去荔園嘅時候,我哋屋企仲係嗲哋、媽咪仲一齊嘅時候,一家人齊齊整整時最多去嘅地方就係荔園,所以重開我一定會同屋企人去。

再玩荔園 街坊:旋轉木馬

話晒荔園都離開咗我哋 18年,普羅大眾又有冇印象呢?

陳小姐

旋轉木馬啦,嗲哋媽咪帶我哋去嘛,仲記得係好舊式遊樂場,重開會同老公去囉!最恨玩碰碰車囉!

Stephanie Andrea

以前有摩天輪,好多機動遊戲,𠵱家都有,應該幾好玩,前幾日見有大笨象,好想去玩。

Matt

記得以前荔園好細,同剩係記得隻象囉,其他已經冇乜印象,𠵱家重開會同啲朋友去行吓!

鍾意就快D Share啦!