真人騷
脫星不歸路 人人有 nipple 袁嘉敏：我係挺直胸膛去行
面嗰浸，係太陽娛樂黃柏高旗下藝人，實情呢，袁嘉敏自己聽電話、接訪問，自己化妝吹頭，獨來獨往自己來拍照，她說是供求問題，自己有自己的製作公司，只有在需要的時候，太陽娛樂提供「經理人服務」，幫她洽談比較複雜的演藝工作。
30歲，香港大學文學士主修電影及文化研究， 13歲就在澳洲半工讀，選港姐前已經在陳可辛吳君如旗下做過幾年電影發行，對高學歷、有主見、社會經驗豐富的袁嘉敏來說，凡事離不開「供」與「求」，包括脫光衣服拍《鴨王》：「我天生眼大胸又大，連拍《殺破狼Ⅱ》着到密密實實，啲男人都淨係見到我個胸浪下浪下。既然有咁嘅 quality可以被放大，王晶需要我俾錢我，我就提供服務，呢條路我唔係刻意行，係挺直胸膛去行啫。」
係好波嘅！我說的不是袁嘉敏的上圍，而是她的態度。
可惜，甚麼年代了，男星脫掉會尖叫，女星脫掉卻是原罪，袁嘉敏剝得再有道理，也不是人人懂欣賞。拍個專訪，借場地間間酒店都 say no，服裝也是問了好幾個品牌才成功，一日三級女星，一世三級女星，搣得甩嘅，除了舒淇還有幾個？
「有得搣，我覺得已經好好……有好多人除晒衫拍完都冇人知佢除過！呢個世界每日有咁多訊息攻擊你，搭程地鐵都可以見到幾百個廣告，你仲會記得我做過嘅嘢，已經 ok！有咩咁奇呢？大家都係人，都有兩個 nipple，我唔覺得矜貴到唔俾得人望兩眼囉！」
你有 nipple，我有 nipple，所以無乜所謂俾你望兩眼……這種理論我還是第一次聽，而聽落，又確係有啲道理。
唔通我喊，又要 call晒記者？
同太陽娛樂已經完約？
其實我有自己製作公司，有出月薪俾自己同事，係 Paco幫我公司提供一個經理人嘅服務。我覺得藝人屬於邊個經理人公司，唔使大張旗鼓去講。我唔係年紀輕，都就快 31，你估 18、 9歲咩，就話要經理人無時無刻帶住啫！
被《鴨王》演員孤立，拍《豪情 3D》又俾杜汶澤話八婆，覺唔覺得係你太獨立、無後台，所以特別惹是非，特別多人踩多兩腳？
我覺得唔需要太過在意，有啲人需要發洩，香港最好就係有言論自由。佢想講咪講囉，收入有冇好咗先？不如你又計下，抽完我水，佢哋嘅下場如何？係咪廣為人知呢？何浩文有冇多咗廣告？杜汶澤……佢不嬲都係咁㗎啦，我唔同佢計喇。娛樂圈就係咁㗎啦……可能我細個鍾意 Michael Jackson， The King of Pop都有碟賣唔出、都有人誤解㗎。
你覺唔覺得自己太有諗法、太獨立？作為觀眾，會覺得你太多棱角太多刺？
多謝……我喊嘅時候，唔通要 call晒記者嚟影咩？我成日話俾自己聽，就算發生咗啲再大嘅醜聞，我都要化行妝、 set行頭行出嚟……點解？我唔要好似啲人咁，着住件白恤衫，又要素顏又要喊又道歉，越係有挫折，我覺得越係要俾人見到你最光亮嘅一面。
所以出面咪對你好多誤解囉！連影相，都好多傳聞話你諸多要求、好麻煩！
我冇聽過呢啲講法，我唔會催眠人哋去鍾意我，我接受自己有藝術家脾氣，唔需要人人都接受我……聲音就係聲音，每個人都有見解，我唔介意你哋講乜嘢，總之寫我嘅名冇寫錯就得喇！好似杜汶澤咁，拍戲時叫我「阮嘉雯」、拍完套戲都仲係叫我「阮嘉雯」。
咁怕俾人講，不如返去拍《愛·回家》
你識咁諗，都幾睇得開。
唔係可以要求啲乜？我又唔識唱海豚音、又唔係做戲有幾勁，亦都唔係天份一流不能錯失，我都同大家一樣去 casting，要等兩個月等結果，導演覺得我提供到佢需要嘅嘢，所以揀我去做咋嘛……好似《殺破狼Ⅱ》個角色就係咁得返嚟。人哋投資一億五千萬，我喺現場若果表現唔到，都大可以換咗我啫。我份人鍾意另類，唔想拍埋啲《愛·回家》嗰啲，每次對白就係「陣間飲奶茶定咖啡」……拍《愛·回家》咪唔使怕俾人講囉。我拍埋嗰啲唔係血腥就裸露，點要求報紙雜誌寫我係個小妹妹呢？老實講，就算去到荷里活，有幾多個角色係慈母呢？呢個工業男性主導，《殺破狼Ⅱ》、《鴨王》都係男人寫劇本，又係男人戲，有幾多個男人眼中女性就係慈母賢妻呢？
其實有諗頭、高學歷（港大文學士）、選港姐前又已經有電影發行經驗，行性感真係唯一出路？
我講呢套你未必接受，我唔係想行性感……係我本身特質就係咁樣：眼大胸大，啲男人望住我都覺得我有桃花，連拍《殺破狼Ⅱ》着到密密實實，啲人都話淨係見到我浪下浪下（上圍），製作人話不如放大我呢個特質。即係話，如果我天生一副好武功，去做打星，因為我有呢種 quality，又係供求問題，點解唔去放大呢？你有件衫俾我，我天生有胸，又唔係話要塞兩嚿嘢落去墊大，咪着囉……件事自然而成，唔係我刻意去行，係我挺直胸膛去行啫。
可惜個社會無進步，廿年前同廿年後，三級女星都係會俾人藐，有冇諗過你挺直胸膛行呢條路係條不歸路？有冇諗過要用幾多時間搣甩個朵？
有得搣，我覺得已經好好……呢個世界有好多人，除晒衫拍完都冇人知佢除過。好似提名過香港電影新人獎嘅蔡潔，其實佢喺《香港仔》全裸過，又有幾多人知？我做完有人講已經好好，最慘係冇人講啫。呢個世界有咁多訊息攻擊你，搭程地鐵都可以見到幾百個廣告嘅，你仲會記得我做過嘅嘢，我覺得已經 ok。
人人有 nipple，我冇矜貴到唔俾得人望
父母、哥哥同妹妹，屋企人對你行呢條路又有冇意見？
我哋三兄妹，唔同樣唔同路，但一睇就知係一個 collection。我哋三個香港出世、係中山老家。我好自豪話我哋係孫中山嘅同鄉，中山人個個都有冒險精神、做嘅嘢夠獨特，就好似孫中山細細個就去咗夏威夷，都係一樣，面前有條路佢就會行。至於父母，亦都有佢哋嘅大膽。
屋企人有冇入場睇《鴨王》？
冇！我屋企人冇人做呢行，亦唔會將呢行嘅嘢放得太大。尤其係爸爸媽媽，佢哋覺得打仗時最重要係醫生， entertainer算得係咩？天下太平咪有得撈囉。但係《殺破狼Ⅱ》，我前晚帶咗佢哋入戲院睇。
點解唔係入場睇《鴨王》？
因為爸爸媽媽六十幾歲，我唔覺得佢哋會被娛樂到囉。我對父母嚟講係一個演員，有角色就去演好佢，唔肯演咪坐喺屋企等囉……我諗我做過呢幾套戲，之前都一定有演員推過先至輪到我演，無所謂㗎，我冇別人諗得自己咁矜貴。有啲女士覺得自己好矜貴，但我裸露嘅時候唔覺得我嘅身體同你嘅身體有咩分別，大家都係 human being，每個人都有兩個 nipple㗎啦，我冇覺得我矜貴到唔可以俾人望下囉……我真係冇呢個咁尊貴嘅諗法。
講到矜貴，之前捲入淫相風波。雖然相中唔係你，但你有冇試過？接唔接受到情侶拍呢種親密照？
嗰個擺明唔係我，我拍拖嘅時候完全沐浴於愛河之中，但一定唔會拍呢啲……完全冇美感可言，我呢啲藝術家脾氣，冇可能！仲有，既然相愛中，係投入係 enjoy緊嘅，仲邊會得閒影呢？我諗我同會影呢啲相嘅人有代溝，佢哋仲後生啩……食飯影我都覺得煩，俾人食先得唔得？
幾耐冇拍拖？
好多年喇……你係唔係有好介紹先？對上嗰個同呢行有小小關係，第一任男朋友就係我喺跑馬地做三文治店嘅客，係呀，兩個男朋友都大我好多，初戀我 21歲，佢 35歲。
最高紀錄，一千萬見個面
31歲淨係拍過兩次拖？
唔豐富㗎，因為屋企環境唔好，我五、六歲就幫阿媽黐膠花……真係唔停得手嗰種，唔係啲人一路睇電視食住糖一路 hea住黐。跟住 13歲去澳州，由洗碗洗爐開始，夠大就喺門面捧餐。 19歲時，父母話真係供唔起我去澳州，我返咗香港申請港大繼續讀書，課外兼兩份職供自己讀書……記憶中，我真係冇乜課外活動，選港姐時，個個有專長，鋼琴、小提琴、跳舞嗰啲，我好後悔，自己乜嘢專長都冇，從來放學就係返工，我諗我嘅專長就係捧餐。
第一個男朋友點識？
沙士之後我返香港讀港大，日頭做補習社，夜晚去 Hard Rock Cafe帶位，一直帶到凌晨三點。大學二年班我喺三文治店整沙律整包，當年盧覓雪住喺對面，都係我熟客，第一個男朋友都係返工識。
初戀幾多年？點解會分手？
佢比我大十幾年，一齊四年，分開就係因為佢想快啲結婚生仔，嗰年我得廿一歲咋……諗落都有啲後悔！
Why not？早啲嫁唔好咩？自己養咗自己咁多年，有人供你讀大學唔好咩？
第一次拍拖嘛，港大四萬幾蚊學費啫，我自己都搵到……我從來都冇呢啲諗法，佢都要生活㗎、佢都係打份工啫。
有冇試過別人問價？
有！呢啲每日都會發生。
最高紀錄幾多錢？
過千萬……前兩日咋嘛，話兩三日，見個面、食個飯喎……
攝影哥哥叫你幫手問下，男人有冇興趣喎？
人哋開呢個價，你都知啲人係咩人啦，就係覺得用錢可以買起你嘅人囉。
點解你唔去呢？因為佢講明叫你做乜？
冇，冇人會講得好明，呢啲人好精，唔會 set個框俾自己。呢啲錢易賺，但係我冇咁嘅需要，我係一個演員，唔係一個妓女。但係咁喎，我覺得等於細個去捧餐，大家平等，呢一刻我 serve你，下一刻我都去咗第二間食店俾人 serve，佢提出要求，我未必會提供服務俾佢，但將來我唔排除去識下朋友，呢啲人咁多生意，不如傾下有咩合作
說，還是不說
大家都說袁嘉敏拍起照來很麻煩，說實話，我覺得還好：一個女仔，一個人來影樓，自己的身體自己話事，說清楚了好辦事，好過好多女星矯揉造作，借助手把口扭扭擰擰。
有男星曾經在《鴨王》上映期加把口說袁嘉敏是八婆，說她拍《豪情 3D》出爾反爾唔肯露，袁嘉敏說：「合約講到明，係唔係要我攞出嚟？再講套戲我實袋 X萬（袁說簽了約不能寫出實價），會唔會為咗咁小錢除呢？我唔想同呢啲人計，佢講嗰兩個字（八婆），我講唔出口，從來唔會咁樣話人。」
有些話說還是不說，是選擇。把醜話說在前頭，和愛在事後踩多人一腳的人，我選擇敬重前者。
|
鍾意就快D Share啦！
|
|
|