2015年7月17日 星期五

亞視’ s殺入網絡搞(電)視 [忽然1周 - 1042] 亞視,MW,



靚抽王

亞視’ s殺入網絡搞(電)視

是咁的,亞視員工秦啟維搞咗個網絡電視,叫做 A記。喺發俾傳媒公告嘅時候竟然笑膠亞視,最後秦啟維話啲嘢係公關公司寫,自己唔知,跟手向亞視道歉,仲獲得葉家寶嘅支持同原諒……唔,成件事都瀰漫住一種 9唔搭 8、騎騎呢呢、膠都唔想俾嘅亞視色彩,真係想唔支持佢都唔得。為此,我娛文樂決定向大家簡介吓「 A記」究竟係乜東東:

常見問題( 1):誰是秦啟維?

講咗咁耐,可能大家都唔知佢係邊個,冇錯,佢就係宇宙中「認得個樣唔記得個名」演員排行榜 No.1嘅秦啟維。同亞視其他員工一樣,佢都曾經喺亞視做過主持、演員、唱過歌、向空櫈掟過壽包、賀過台慶等,完成過戰狼 300以一敵百嘅亞視演藝生涯,代表作係喺亞視節目《香港有飯開》,表演 7日連飲 28杯奶茶,大家請唔好再唔記得佢。

常見問題( 2):點解叫「 A記」

顧名思義,「 A記」係由亞視嘅演員們參演嘅一個網絡平台,至於有咩演員會參與……噢,都係算吧啦,其實亞視演員一般同秦啟維一樣,每一個都長踞「認得個樣唔記得個名」排行榜,亦係「做過主持、演員、唱過歌、向空櫈掟過壽包、賀過台慶」等嘅戰狼。更加難得嘅係,佢哋作為亞視一分子,心底裏面或多或少都有一種捨易取難,愚公移山嘅決心。而呢個平台叫得「 A記」,應該都會喺呢方面有所發揮,相信就算冇人睇都會繼續撐落去。

常見問題( 3):「 A記」有咩好節目?

《我愛黛廚》

《友情歲月》:秦啟維同亞視友一齊緬懷亞視的歲月……嗯,即係睇亞視嘅人會鍾意睇,唔睇亞視嘅人係唔會睇嘅,亞視咁多人睇,一定好多人睇你哋啦咁!

《我愛黛廚》:戚黛黛主持嘅親子烹飪節目,咦,即係戚黛黛版本嘅《吾淑唔食》?一定好有創意。

《好識食》:主持張加慧介紹食肆,講解食物冷知識……而我們一定知道張加慧是誰啦……

《午間亂報》:似乎係一個抽亞視水嘅節目,但疑似抄襲年青人雜誌《 100毛》近日所搞嘅《毛記電視》……(其實話係疑似都非常俾面)

反話王

以反話普渡眾生,八盡天下娛樂事。

鍾意就快D Share啦!
Related Posts Plugin for WordPress, Blogger...