抱女離開
上周五（ 10日）影完校服相，向蕙已經好攰扭眼瞓，於是朱麗倩親自抱女兒走。離開時，她與工人不時四處張望，警覺性甚高。司機發現記者，更下車抄低採訪車車牌。
滾熱辣
獨家照片 入讀德望幼稚園 朱麗倩抱女辦手續
星爸星媽個個為仔女入學問題𢱑爆頭，貴為天王的劉華亦不例外，不但帶女兒向蕙（ Hanna）到名校面試，為了女兒順利入學，更親身去見校長，用心良苦。偏向傳統學校的劉華，從入選的耀中、創價及德望中，最終選了德望，貪其校風優良。
上周五（ 10日），本刊直擊朱麗倩抱着女兒向蕙返德望影學生相，一向低調作風的朱麗倩，不但戴上口罩，以全新保母車送女兒到學校，更刻意在側門出入。
入讀德望的星二代又豈止天王女，今年與向蕙做同學的，還有楊思琦、關伊彤及胡諾言女兒，嚟緊家長會真箇星光熠熠。
五十歲才當上爸爸的劉德華，一向將妻子朱麗倩和女兒向蕙的行蹤保密。妻女入住保安甚嚴的加多利山獨立屋，外出例必有保鑣隨行，保密工夫滴水不漏。可惜百密一疏，近日有網友爆朱麗倩與女兒向蕙在德望幼稚園出現。上周五（ 10日），本刊亦直擊朱麗倩十級戒備帶女返學校辦理入學手續。
側門閃入
當日朱麗倩須於下午 3點半到 4點半帶女兒返校影學生相，不過朱麗倩的白色保母車 4點 20分才出現。保母車一到，現場即有警員上前趕車，朱麗倩則在司機、菲傭掩護下，抱着女兒從學校側門急步走進學校。根據運輸署紀錄，七人車去年尾以 80萬購入，劉華買新車接送女兒當然是為了掩人耳目。
據目擊的媽咪爆料︰「影校服相當日，朱麗倩好遲至到，差唔多係最後一個影學生相。佢戴住口罩，不時周圍望好警惕，加上嗰日家長怕俾學校扣印象分，好少會帶埋菲傭入嚟。我望咗佢哋兩眼，朱麗倩就 sence到，仲𥄫實我，所以我印象好深刻。劉華個女 Hanna好怕醜，成日趴喺媽咪度，初時仲扭計嗌唔影相，後來朱麗倩安撫咗佢一輪至肯乖乖影相。」
逗留廿分鐘後，朱麗倩 4點 40分離去，記者欲上前拍照，司機已醒目怒啤記者，更抄下採訪車車牌，之後開行 turbo撇甩記者。
劉華親帶女面試
報料人又講：「之前有家長八卦，所有小朋友都係一 group group見老師， First In過咗再 Second In，但因為劉華親自帶女來面試，學校為免引起混亂，就特別安排了當天最後的時間面試，避過人群。而劉華收到入學通知信後，十分識做，親自帶埋囡囡見校長，更在校長室逗留了近廿分鐘至走。」
其實愛女如命的劉華曾表示為了不會錯過乖女的成長階段，前年已經宣布全面暫停巡迴演唱會，花一年時間替孩子物色學校。他曾表示：「我想像一個普通爸爸一樣，為下一代教育操心。」
楊思琦：貪一條龍服務
除了劉華外，還有其他星二代入讀德望來年的 K1。楊思琦三歲大的囡囡 Krystal，也獲德望取錄。楊思琦說：「因為一條龍，有小學及中學可以直升，雖然未必百分百可以升讀，但都有六、七成機會，而且該校校風好，自己好鍾意。」
楊思琦也承認面試甚有難度，她說：「好多小朋友去 interview，囡囡當日嘅表現好主動，真係好好彩。」對於囡囡將會與華仔千金成為同學，思琦笑說：「大家一齊返學都好開心。」
為了迎接囡囡返學，思琦短期內會留港工作：「已經做咗校服，影咗學生相，依家要準備頭飾，因為只可以用黃及綠色，要抽時間去買。嚟緊會留喺香港幫有線拍嘢，所以可以親身接送囡囡返學。」
胡諾言老婆︰唔知天王都考
除了楊思琦外，胡諾言同陳琪的兩個愛女亦成功考入德望。一家在外地旅遊的陳琪，透過電話回應：「大妹（芷苓）就讀 P1（小一），細妹（芷悠）今年會讀 K1（幼稚園）。細妹第一個 round就收咗，好彩」
陳琪話本來有兩間學校都收咗細女，但她意屬德望：「佢哋（德望）鍾意收番姐妹同校，覺得一個家庭嘅整體教育同學校配合都好重要，我都慶幸！唔知天王都考，德望要求好高，剛剛開咗家長會，初時以為可以輕輕鬆鬆讀，但原來喺言行舉止、品德上要求好高！」
胡諾言兩女讀德望
胡諾言與陳琪早前帶大女胡芷苓（右），及細女胡芷悠（左）到新加坡旅行，去環球片場玩足一天。芷苓 9月會讀德望小學一年級，芷悠剛成功入讀德望幼稚園。
母女同校
關伊彤是 02年港姐，近日在港視劇《導火新聞線》上位。她的大女 Marina都是今年德望 K1學生，她表示：「自己係德望舊生，對母校有情意結。阿囡好鍾意德望，覺得學校好靚，又鍾意個鴨仔池。」
美女搖籃
德望除了是傳統名校，更加盛產美女。娛圈中有不少靚女，都是德望舊生。
|
鍾意就快D Share啦！
|
|
|
