罕見的溫馨
娛樂喧
甩拖兩個月 欣宜搵秋官治情傷
28歲的欣宜早年父母異離，一直與媽咪肥姐相依為命的她，與爹哋秋官關係疏離。 7年前肥姐病逝時，有傳父女關係一度惡化。不過兩父女邊有隔夜仇，與潮男 Silas Lee分手兩個月的她，近月與秋官重拾多年的父女情，日前二人更被本刊捕獲拖實去圓方睇戲，多年難得一見。
欣宜早前推出的新歌〈你瘦夠了嗎？〉引來熱話，事業得意，愛情卻失意，不過有老竇秋官錫番，又有兩個妹陪散心，欣宜不愁寂寞。
近年有不少「星二代」在圈中發展，要數最成功的一個，非鄭欣宜莫屬，父親鄭少秋與母親沈殿霞，都是圈中舉足輕重的人物。雖然父母形象深入民心，不過近年欣宜成功搣甩父母的標籤，發展自己的歌唱事業。
欣宜去年中突然在 facebook宣布不會再盲目減肥，要做番自己，今年初又推出歌曲〈你瘦夠了嗎？〉，名正言順以她的身材做賣點，被視為由修身到翻肥的寫照，其形象正面，最近更接秋官棒，成為「位元堂」代言人。
反口唔認男友
不過事業愛情兩難全，事業正在搏殺期的欣宜，早前被踢爆與拍拖兩年的潮男男友 Silas Lee甩拖，心情難免有影響，她更反口指自己沒有承認過拍拖。據知情人士透露：「欣宜同男友散咗冇唔開心就假佢經歷過咁多嘢， EQ好高，每次講呢個話題佢都唔介意同大家分享，佢曾經話當呢個男友係結婚對象㖭！不過欣宜都好自我，有啲嘢大家協調唔到，兩個月前和平分手。欣宜話依家要全力寄情工作喎！」
工作以外，空窗期的欣宜難免有寂寞時，失去愛情，還有親情。早前（ 7月 1日）本刊獨家捕獲欣宜與秋官一齊到圓方行街兼睇戲。當晚 7時許，一身 casual打扮的欣宜與頭戴「賊仔帽」的秋官到圓方戲院入場睇《未來戰士》，散場後兩父女並肩而行，欣宜不時攬住秋官條腰，秋官又會拖住女兒，父女情不言而喻。
修補父女關係
據知秋官早年因與肥姐離婚，與欣宜的關係並不親密。「欣宜細細個秋官同肥姐已經分開咗，而秋官好快就同官晶華再婚。由細到大都係跟住媽咪，所以欣宜同呢個爹哋不嬲都冇咩交流。前幾年肥姐過身，佢哋關係係最差，由肥姐入院到辦身後事，秋官都冇乜參與，欣宜覺得佢咁多年嚟都冇關心過佢兩母女，真係好失望。到肥姐過身後，欣宜唔夠錢使，戶口得番兩位數，佢都冇諗過搵秋官幫手。」知情人續指：「不過出嚟捱咗幾年世界，欣宜識諗咗，佢明白爹哋始終有自己嘅新生活，態度亦開始軟化。秋官近年都開始主動關心個女，今次欣宜失戀，佢仲話只要欣宜出聲，全家都唔會甩拖。其實欣宜唔止同秋官 friend番，佢同鄭詠恩（秋官與官晶華的大女）係好姊妹，依家成日一齊出街㖭！」
兩父女始終血脈相連，欣宜近年自力更生搵錢，心態亦有所轉變，二人關係轉好，早前欣宜到國內參加電視節目《我不是明星》，秋官撐到底，親身上節目與欣宜合唱。
欣宜：佢成日 send搞笑短訊
本周二，欣宜回應與秋官多年的關係，她說：「我同爹哋一向關係好好，雖然平日大家各有各忙，不過我哋都 keep住緊密聯絡，爹哋仲識 send短訊俾我，好搞笑。我每次表演完，爹哋都會 send短訊，俾好多鼓勵我，同埋我哋一有時間就會見面食飯。（同爹哋有冇啲難忘回憶？）爹哋好錫我，同佢相處好多時刻都好開心好難忘，講唔晒咁多喎。好似以前我喺加拿大讀書，大學畢業典禮時，佢突然出現，嗰次真係超 surprise！爹哋有時會俾呢啲驚喜我哋，佢咁忙仲咁關心我哋，其實係好難得。」欣宜隻字不提失戀一事，看來有父愛籠罩，可以令她忘掉分手之痛。
重投爹哋懷抱
鄭欣宜 87年出世， 1歲時父母已離婚。父親秋官旋即與官晶華再婚，欣宜則跟媽咪肥姐在加拿大生活，自小與父親感情淡薄。讀書時期欣宜長駐加拿大，雖然不時回港放假，但甚少與秋官聯絡。
08年肥姐沈殿霞病逝，父女關係曾一度惡化。在肥姐追思會上「契爺」鄧光榮更發難，公開斥責秋官未盡父親責任。至近年父女關係好轉，欣宜不時上載與秋官的合照。
秋官大熱網民激讚
大台早前重播《大時代》，秋官飾演的丁蟹 hit爆全城。最近大台又重播秋官與金牌監製韋家輝首次合作的《誓不低頭》，劇中不乏血腥暴力場面，最為人所知的就是曾江揮刀斬死李香琴一家。
由於劇集牽涉警界黑暗面，有話題性之餘，更被網民視為神劇，在網上掀起熱話。不少網民大讚秋官好戲，又讚《誓不低頭》多賣點，不過都有網民埋怨大台重播秋官劇，會繼續引來丁蟹效應，令股市波動。
|
鍾意就快D Share啦！
|
|
|