歐洋風
好戲總在後頭
從細到大，尤其鍾意荷里活電影；入行以文字為生亦絕非偶然，能夠將兩者結合為一，可以話係夢想成真。
由 2004年開始擔任外娛版主，因利乘便率先睇最新嘅電影，寫喜歡嘅明星；中途曾諗過放棄，甚至連撰文一欄都唔願意填上自己嘅名。
慶幸 11年來喜大於悲，爛戲確係睇過唔少，但好嘅電影永遠陸續有嚟，期望有一日再同大家「食住花生睇好戲」。
第一次獻俾喼神
日期： 2004年 4月 2日
外娛係《忽周》改革下嘅產物，啱啱入行嘅我走馬上任成為版主。第一次寫嘅，就係米路吉遜（ Mel Gibson）嘅《受難曲》。
佢嘅作品，一直唔係我杯茶，但好欣賞佢愈惹火愈要拍嘅精神。結果 2006年，喼神醉酒下發表反猶太言論，全身「着晒火」兼被封殺。直至今時今日，都仍然未翻身得晒。
寫得最多係邊個？
根據個人非正式統計，本欄寫得最多嘅，應該係畢彼特（ Brad Pitt）、安祖蓮娜（ Angelina Jolie）呢對荷里活夫婦。
單係佢哋同珍妮花安妮斯頓（ Jennifer Aniston）嘅三角情仇，已經講足成個世紀咁耐；加上安祖蓮娜唔係收養細路就係生仔，以每多一個人口一篇報道計，再加埋畢安拍戲、攞獎嘅次數，有理由相信，佢哋係本書曝光率最高嘅外國明星。
外娛都可以惹官非？
日期： 2005年 5月 6日
前線新聞承受嘅法律風險比外娛大，但都有例外。一篇講湯告魯斯（ Tom Cruise）撻着姬蒂賀姆絲（ Katie Holmes）嘅報道，就因為一張相而惹官非。好彩係最後打得甩，唔好彩係湯佬最終同姬蒂閃分，於 2012年結束 6年婚姻。
介紹冇上畫嘅電影
日期： 2004年 7月 30日
2004年暑假檔曾介紹《天魔特攻》（ Hellboy），點知最後冇喺香港上映，第一次感覺咁𤓓。後來得知電影檔期經常變，上畫與不上畫，見怪不怪，本人嘅面皮亦練得成尺咁厚。
妙麗惹的禍
戇居的事十常八九， google自己都算一則，話說當年只得 15歲嘅「妙麗」愛瑪華生（ Emma Watson）被揭未成年飲酒，我亦查證外國網站後寫成報道。事後 google自己嘅同時，竟發現有「妙麗」粉絲點名批評，兼且一大堆人身攻擊。
查實「妙麗」出道以嚟都冇申請貞節牌坊或者發誓做一世玉女，俾粉絲硬框做乖乖女都幾無奈。不過明白粉絲只係維護偶像，問心無愧就算了。
小丑最令人懷念
自問不是一個感情豐富嘅人，處理死人稿尤其辛苦。記得第一次面對嘅已故巨星，就係馬龍白蘭度（ Marlon Brando）。雖然只係負責資料搜集，但對於當時只係一個死𡃁妹而言，要去了解唔係自己年代嘅人和事，係有難度嘅。大佬，我當時連《教父》都未睇過呀！
而講到個人最懷念應該係「小丑」希思萊傑（ Heath Ledger），寫嘅時候無端端眼濕濕，不過到後期嘅 MJ，菲臘西摩荷夫曼（ Philip Seymore Hoffman）都再冇咁強嘅感受。
奧斯卡與我
第一套深深打動我嘅電影係《阿甘正傳》，當時喜歡男主角湯漢斯（ Tom Hanks），仲追埋奧斯卡睇佢點封帝。自此之後，睇奧斯卡成為每一年嘅指定動作。不過做外娛後，每次睇完直播都要返公司趕稿。如今無事一身輕，下一年奧斯卡，相信會好不捨，好唔習慣。
撰文：陳盛怡
|
鍾意就快D Share啦！
|
|
|