靚抽王
廣告代言人嘅嘢，你識條鐵咩！
唔好睇小廣告，皆因愈荒謬嘅廣告係愈入腦。你唔好同我講你唔記得黑旋風忍者唔使用劍，亦唔好同我講未聽過鄭世豪唱鏗鏘駕駛學院。近日唔知係香港人基因突變定係點，好多品牌都一反其道而行，搵啲你想像唔到嘅藝人幫佢哋拍廣告……
周柏豪×衞生巾（似椰菜花雪糕廣告）
雖則話亞洲嚟講，佢已經唔係第一個男性代言衞生巾（羅志祥、賀軍翔、林宥嘉、陳柏霖都已經做過），但係香港嘅話，佢都算係第一人；查實用男性角度去賣呢個廣告，感覺幾溫柔、幾 pure、幾 true。不過呢個平面廣告就有啲奇怪，你睇周柏豪上等威風顯現一身虎膽再現出半個___頭，幾型呀，但係佢手上嗰棵嘢，究竟係乜嘢嚟？係廁紙？係棉花？定係椰菜花？冇人知~~總之嗰棵嘢令到成件事有啲詭異。又唔係怪叔叔食軟雪糕，你收埋半個頭喺後面嗒乜嘢啫。
莊思敏×安全套（似朱咪咪賣沐浴露）
本身呢個安全套品牌呢，係由何潤東做代言人嘅。咁你知啦， Dom Dom呢家嘢，通常都係由我哋男生負責，所以由一名男士嚟做代言，就好似一名汽車維修員身上面有個士巴拿一樣，係好合邏輯嘅。至於阿莊思敏瞓吓浴缸，同靚仔耍花槍呢啲鏡頭，就唔係太令人聯想到安全套囉！俾到盡頂多係美容呀人體維修之類，再講白啲，甚至有宣傳易朱咪咪賣沐浴露嘅感覺。不過有關品牌唔使緊張，因為無論你用邊個做代言人，用家都未必咁介意。反正我哋唔會周圍同人講我哋用邊隻牌子㗎嘛，我哋買 DOM嘅時候通常都係鬼鬼祟祟㗎
魯芬×龍珠（扮咩魯芬啫你！）
雖然佢唔算係代言人，但係都叫做幫《龍珠》賣廣告。話說魔人布歐化身魯芬，參與動漫節活動，幫其中一隻《龍珠》 Game宣傳，側跟仲有突然領悟瑜伽+gathering真義嘅殘廁悟空，同埋你老 X呢度係印度嘅波波（喬寶寶）。成件事夠晒搶眼、出位，不過我個人認為有關當局輕視咗魯芬喇！喺全宇宙嘅人心目中，魯芬 BB係無可取代的，所以成件事感覺似係魔人布歐扮魯芬，多過魯芬扮魔人布歐囉。你諗吓，無論魯芬 BB扮乜嘢，佢個樣都係咁魯芬㗎，就算佢倒返轉頭扮孫悟空或者波波，都會似係孫悟空/波波扮魯芬多過魯芬扮佢哋囉。
荒謬現象學
每期荒謬現象學為你解構娛圈嘅不尋常現象！
撰文：娛文樂
|
鍾意就快D Share啦！
|
|
|