爆壹爆
SUSHI FIGHTER
唉！香港人依家真係愈來愈躁，整個社會倒退中。爆哥前幾日到上水火車站大堂等朋友時，突然聽到一間壽司店外傳出激烈嘈吵聲，望真一下，原來一名穿格仔恤衫男同一名著黃衫中佬開片，兩條友因為排隊俾錢問題而發生衝突。第一 round埋牙，兩人梗係問候對方娘親開場，當黃衫男稍為熄火時，格仔男突然又爆粗狂鬧，黃衫男一於粗口還擊。
Round 2，格仔男可能恃住自己身形高大，有如拳王上身，一言不發一拳窩落對方塊面度，黃衫男副眼鏡即時飛走咗。格仔男之後仲得勢不饒人，一手將黃衫男推落地。幾個女店員見到格仔男兇神惡煞，都唔敢過去勸交。 Round 3，跌低咗嘅黃衫男，本來想爬過去執番副眼鏡，點知格仔男好有戰鬥經驗值，一個箭步，好似射十二碼咁，將副眼鏡踢走，終極完勝對方冇仇報，毒呀。
「你唔好走呀，打到我流血，報警呀。」黃衫男執番副眼鏡後，指住格仔男大聲悲鳴，又阻止佢離開。聽到對方話報警，格仔男開始笠水，催促店員快些找錢俾佢，然後拋下一句：「教訓你呀。」之後急步離去，剩低大班睇熱鬧路人喺度討論回味。
劏房志氣男
冇人約飲酒，爆哥早排無無聊聊經過尖沙咀天星碼頭，想話睇吓本地年輕人夾 band，結果發現水準絕對好過旺角行人專用區批大媽唱《小蘋果》。爆哥見到其中一個𡃁仔，表演緊外國好流行嘅 beatbox，途經嘅觀眾都好 enjoy，跟住佢個 beat扭動 pat pat。
原來呢個𡃁仔仲讀緊中學，洋名 Airsie，爆哥同佢傾偈，先知佢家境麻麻，一個人住喺尖沙咀唔夠一百呎嘅劏房，而佢爸爸就住喺隔籬劏房，日常生活都係由自己搞掂， beatbox就係佢唯一嘅嗜好，佢話：「喺 YouTube自學，然後膽粗粗去碼頭表演。」佢話每次演出，都有幾百蚊來自觀眾嘅打賞，夠佢買 beatbox裝備同埋食飯喎。爆哥去過佢屋企，真係連窗門書枱乜都冇，佢只可以喺床上做功課，但爆哥好欣賞佢人窮志不短，依家年輕人好少咁捱得啦。
苟姑娘炒車前傳
最近「苟姑娘」苟芸慧喺珠海炒車，爆哥當日都有兄弟落場玩，仲話見到茍姑娘架車凌空翻騰，轉完又轉數住一共五周半，難度系數爆晒燈，當日同場仲有方中信、方力申、劉浩龍等藝人，聽講話苟姑娘攞咗賽車牌後，今次第一次落場，有人見佢喺預賽嗰陣，揸住架 99號嘅紅色蓮花跑車，當時時速都唔過一百，咁一定好穩陣喇。
點知一落場心就雄，正所謂輸人唔可以輸陣，當時苟姑娘炒車前已經化厚妝準備比賽，無懼車廂冇冷氣會溶妝，點都要 keep住個靚樣出賽，估唔到冇耐就喺彎位失控空中轉體五周半，好彩落地冇撞到同場車手咋。最後苟姑娘仲可以風采依然爬出車，證明今次賽事同依家賽車科技，安全水平真係好高。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|