網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年8月6日 星期四

女神崩壞 自費迫蕭正楠同居 黃翠如丟清何傲芝舊物 [壹週刊 - 1326] 翠如,蕭正楠,正楠,何傲芝,黃翠如,M1,



30/7下午 3:00

同蕭正楠住埋三個月,翠如 BB走晒樣,口腫面腫,雙下巴現晒形,女神形象蕩然無存。

娛頭

女神崩壞 自費迫蕭正楠同居 黃翠如丟清何傲芝舊物

去年從何傲芝手上成功搶人,黃翠如小三變正印,同蕭正楠愈愛愈高調。拍拖一年,控制慾強的翠如 BB,為全面掌控男友,已由半同居關係發展到正式鵲巢鳩佔,搬埋去男友位於茘景華景山莊六百呎寓所,全天候監視對方一舉一動。為釐清主權身份,翠如 BB自己出錢,將蕭正楠全屋傢俬包括杯碗碟,一律換新,確保舊愛物件,全數不留。

下晝三點,二人拍住拖從寓所出發去開工,一頭亂髮的蕭正楠見到記者一臉愕然。

佔有慾強

以前久不久上門過夜,三個月前,黃翠如正式搬埋去同蕭正楠展開同居生活。連日來,翠如 BB要開工,都從華景山莊出發,放工後亦直接返愛巢。

上週四(七月三十日)下午三點,街坊打扮的翠如 BB和蕭正楠一齊離開華景山莊寓所,二人明顯啱啱瞓醒,翠如 BB更嚴重走樣,一頭亂髮,口腫面腫,雙下巴現晒形,身旁面青青的蕭正楠更加瞓到頭髮蓬鬆,邊高邊低,發現記者,二人一臉慌張,急急腳行去停車場各自揸車出發去開工。

原本一直與家人同住馬鞍山聽濤雅苑的翠如 BB,和蕭正楠拍拖後,不理父母反對,在同屋苑租住另一細單位,爭取私人空間方便男友上門過夜。

去年底,蕭正楠在新劇《倩女喜相逢》中和新進姣精吳若希有大量親熱戲,佔有慾強的翠如 BB立即響晒警號,打爛醋埕。經冷戰後,翠如 BB決定落手,將監控進一步升級,執埋包袱去蕭正楠屋企,嚴防「野花」偷襲入侵。

「平時只要 Priscilla(黃翠如)唔使埋位,就拎住部電話打俾 Edwin(蕭正楠),第一句一定係問:『你做緊乜呀?喺邊呀?』仲要開埋視像通話俾佢睇,有時俾工作人員經過見到,勁尷尬!試過開廠收得夜,有女同事問 Edwin可唔可以跟佢車走,佢都唔敢車埋人話唔方便。」一名無綫人說。

22/7

翠如 BB一身街坊裝,從愛巢出發去拍廣告。

化番個靚妝開工,翠如 BB馬上變女神,在場的男工作人員當堂冧晒。

翠如 BB又要搬垃圾,又同男主角攬晒坐綿羊仔,拍到半夜三點先收工。

千絲萬縷

黃翠如做小三成功撬走蕭正楠後,男方舊愛何傲芝曾經作出反擊,但同時又傳出何傲芝搭上馬主,關係糾纏不清。

向正印示威

有指黃翠如明知何傲芝是蕭正楠女友,依然發功強搶,更故意用蕭正楠手機發送二人的親密合照給何傲芝,向正印宣戰。

分手收車

黃翠如主動出擊追求,令經常為女友何傲芝外出「偷食」問題吵大鑊的蕭正楠決絕斬纜,放棄三年情,甚至即時收回早年買給她的車和要對方搬走。

微博暗寸

被踢爆移情別戀後,蕭正楠即時確認黃翠如女友身份,何傲芝心有不甘,以舊愛金句「邪不能勝正」暗寸黃翠如姣撬男友。

暗撻馬主

寸爆黃翠如同時,何傲芝又被揭發已投向馬主懷抱,不時陪新歡出入馬場,拜金愛名牌,以黐富豪為己任。

一件不留

日前翠如 BB又從愛巢出發到金鐘拍廣告,穿上白色連身裙,化晒妝的她馬上有番個女神樣,但一停機埋位,翠如 BB就第一時間匿上保母車篤電話。

拍廣告賺快錢,翠如 BB同男主角攬實坐電單車,又要變身村姑搬垃圾,連走三個景拍足十五粒鐘,一直到半夜三點,才收工坐保母車直返華景愛巢。

成功入屋霸到半張床後,翠如將佔有慾發揮極至!自費將男友全屋傢俬,甚至杯碗碟,統統丟清,由她揸弗,全部換新。

「之前有啲傢俬同屋企嘢係 Edwin同 GiGi(何傲芝)一齊嗰時買落, Priscilla唔鍾意,搬入去之後已經買過晒成批新傢俬,包括床單被鋪杯碟都一次過換晒,一件不留,所有嘢全部由佢揀佢俾錢。」身邊友人說。

26/7

連日來翠如 BB都從男友寓所出發去開工,但在公開活動接受訪問時,翠如 BB自稱患上氣管炎,正與男友隔離。

蕭正楠以 12萬買入二手 Mini Cooper俾女友代步,更在車頭放滿小雞公仔冧女友。

深得高層余詠珊歡心的翠如 BB,更帶挈男友升格做男一。

高調傳情

去年初,蕭正楠和黃翠如合作無綫劇《師奶 Madam》暗中撻着,戀情公開後,二人更加毫不避忌,不時網上傳情,打情罵俏,蕭正楠送車送禮物同遊東京,戀事全公開。

硬銷男友

作為高層余詠珊頭號愛將,翠如 BB一度捲入高層鬥爭,成為祭品遭雪藏,但話咁快又重見天日,即使被彈戲屎講對白有懶音,依然劇接劇,套套女主角。女友有高層撐,連帶蕭正楠亦受惠,在無綫日漸站穩陣腳,接拍新劇《倩女喜相逢》及《巨輪 2》,同樣擔正做第一男主角。

「 Priscilla好落力 sell Edwin俾啲監製,成日同人講話佢適合做喜劇,有好角色記得留個俾佢;有次俾同事見到佢孖住 Edwin入咗余詠珊間房,傾咗兩粒鐘先出返嚟,又做埋中間人,約飯局等 Edwin有機會同余詠珊見多啲。」一名無綫人說。

拍拖一年,翠如 BB與蕭正楠愛得癡纏,試過被拍得到沙灘談情,玩踢浪,男方更公然向女方索吻。



早前蕭正楠同新姣花吳若希合作拍劇傳緋聞辣㷫翠如 BB,事後即陪女友遊日本補鑊。

何傲芝同蕭正楠拍拖期間,亦曾進駐男方寓所,為免男友睹物思人,翠如 BB一次過清走舊物。

揸頸就命

入主處境劇《愛.回家》,翠如 BB被踩戲屎,拖冧收視。

女友幫自己上位,拍拖一年,即使被翠如 BB箝到實一實,蕭正楠都揸頸就命,對女友千依百順;兩個月前,更以公司名義買入二手黑色 MINI Cooper俾女友代步,又在車頭位置放滿翠如 BB最愛的小雞公仔,製造浪漫。

「 Edwin間唔中都有同啲兄弟呻,話 Priscilla太黐身,一齊後完全冇私人空間,又叫啲兄弟唔係大日子大事件就唔使預佢,事關就算有時出咗嚟食飯,一個電話打嚟, Edwin就要趕返屋企交人,不過都係一個願打,一個願捱。」身邊友人說。

霸床位

鵲巢鳩佔是大部分港女的格式,拍拖後為進一步箝實男友,都會千方百計進駐對方碼頭,瞓半張床等上岸,但逼得太緊,物極必反。

王菀之

出名公主病的王菀之,前年撻着「 Figure王」 Eric So,男友先後搭上盧巧音、杜如風、蒙嘉慧等女星,戰績彪炳,拍拖唔夠三個月, Ivana唔理父母反對,搬到男友位於九龍城的寓所,開始同居。

王敏奕

家住公屋的王敏奕,去年搭上曾志偉大仔曾國祥後,火速進駐對方位於九龍塘千呎寓所,又深得「未來老爺」歡心,全心全意等做曾家新抱。

胡定欣

12年,胡定欣被馬國明狠撇後,與創作界才俊沈泊淳( Patt)一拍即合,拍拖未夠一年,她搬入男方位於渣甸山的寓所同居,因心急做少奶奶多次逼婚,最後分手收場,更有指甩拖後多個月,胡定欣仍未肯搬離愛巢。

撰文、攝影、攝錄:娛樂組

nextb@nextmedia.com

鍾意就快D Share啦!