娛樂偵訊
套現前夫物業六千萬 楊寶玲第三嫁初戀男友
1987年港姐冠軍，現年四十八歲的楊寶玲（ Pauline）， 94年跟音樂人陳容森秘婚三年後離異； 02年，三十五歲的她，跟美國凱撒皇宮賭場市場部亞洲區副總裁 Nelson黃延年再婚，並在四十歲高齡誕下兒子 Nathan，嫁夫隨夫，自此定居美國。
據了解，楊寶玲已於去年跟第二任丈夫協議分開，並套現六千萬物業，屢敗屢戰的她更迅速找到第三春，並決定下月於美國第三嫁給初戀男友。
賣樓一刀切
望五張的楊寶玲，今年四月突然將跟前夫黃延年聯名擁有的半山物業，以 6600萬出售，賬面大賺 2800萬。據了解，原來雙方已經辦理離婚手續，為避免再有錢銀轇轕，二人遂將物業先行放售套現。
「 Nelson同 Pauline結婚前，早就分咗一半身家俾佢前妻，到生咗 Nathan，佢又送咗間豪宅俾 Pauline。婚後 Pauline一直住喺美國，連自己媽咪都搬埋去，方便照顧孫仔。但有咗個仔之後，佢兩個反而愈來愈唔夾， Pauline好動，鍾意約朋友出去玩飲吓酒， Nelson就喜歡靜，大部分時間都留喺屋企。前幾年，佢哋偶然仲會一齊返香港探吓朋友，但呢兩年 Nelson寧願留喺美國，由得 Pauline帶住個仔返香港。」知情者說。
見面少磨擦多
據了解，由於近年內地賭客愈來愈多，要「湊客」的 Nelson更經常要內地美國兩邊飛，兩夫妻見面時間愈來愈少，磨擦卻愈來愈多。
「 Nelson經常要返內地見客同開會，老公成日唔喺身邊， Pauline梗係唔鍾意，就算 Nelson人在美國，但大家嘅嗜好又唔一樣，慢慢就積咗好多問題。兩個都係成熟人，大家唔再拖拉，舊年決定離婚。」
fb重遇初戀
經歷兩段失敗婚姻，但楊寶玲依然冇放棄愛情，去年回復單身後，她重新出發，開始跟一些舊相識的朋友，密切聯絡。
「 Pauline係個愛情至上嘅人，覺得結咗婚都應該有拍拖感覺， Nelson大佢成十幾年，加上工作關係，佢覺得自己被忽略。離婚後， Pauline都冇諗過要即刻識人，咁啱今年喺 facebook搵番初戀男友，原來大家都住喺美國，咪約出嚟見吓面，點知一見就撻番着！
「個男仔對 Pauline好好，又識得氹佢開心，兩個係讀緊大學時拍拖，當時大家都喺英國讀書，畢業後， Pauline返香港做嘢，兩個先分手。」
一切從簡
今次第三嫁，楊寶玲主張一切從簡，雖然會在拉斯維加斯舉行婚宴，但人數唔會多，全都是雙方好友及屋企人。
「 Pauline忙緊搞婚禮，早排六福（珠寶）喺香港馬場搞第一屆賽馬盃， Pauline係董事之一，咁重要嘅公司活動，佢都唔得閒返嚟出席。」知情者說。
本刊致電楊寶玲求證有關十一月婚訊，至截稿前仍未聯絡上。
前夫陳容森再婚
楊寶玲與音樂人陳容森， 94年在澳洲黃金海岸註冊結婚，二人婚後多次否認已婚傳聞，直到 97年， Pauline開記者會承認曾結婚外，同時宣布正跟陳容森辦理離婚手續，震驚娛樂圈。離婚後，受刺激的陳容森向傳媒大爆前妻現實，「冇家用便冇福利（指性需要）」，成為一時佳話。
98年，陳容森與張可頤拍拖，四年後張可頤提出分手，但再見亦是朋友。已轉到北京發展超過十年的陳容森，數年前在當地與圈外女友結婚，育有一女，現已四歲多。
最威風
今年的出爐港姐麥明詩孭住女拔十優狀元招牌，由面試到參選都是風頭躉，無獨有偶，原來 87年港姐冠軍楊寶玲也是出身自拔萃女書院，更是首位女拔港姐冠軍。
此外，香港自 1952年首屆環球小姐已經派出代表參賽，直到 2001年才停止。 78年港姐冠軍林良蕙曾進身環姐前十二名，而 84年冠軍高麗虹亦拎過「最佳民族服飾獎季軍」，但講到成績最好最威風，是楊寶玲！ 88年她在台灣參加環球小姐競選，獲得第五名。
嫁雞隨雞
與楊寶玲同屆的港姐，有亞軍及最上鏡小姐李美鳳、季軍林穎嫺及最受佳麗歡迎的張鳳妮，眾人均已作人妻，嫁雞隨雞，定居海外。
李美鳳
87年港姐亞軍， 90年曾與林敏驄在加拿大秘密註冊，但婚姻只維持了五年便告終。 96年，李美鳳改嫁台灣航空業富商鄭翔中，自此定居台灣， 98年誕下龍鳳胎後過着少奶奶生活，閒時出席品牌活動，五十二歲，風采依然。
林穎嫺
89年放棄幕前工作到美國進修的林穎嫺，畢業後退出娛圈並定居美國。 99年，與 Tom Dupont結婚，婚後育有一子兩女，做全職家庭主婦。 02年，回港出席香港小姐決賽嘉賓，在張玉珊邀請下任修身堂纖體代言人。 12年，林穎嫺回港推出《林穎嫺育兒成功秘笈》，分享育兒心得。
張鳳妮
96年離開無綫後轉到馬來西亞拍劇，機緣下認識了當地富商傅仰峰，二人一見鍾情，拍拖一年便閃婚，定居吉隆坡的她現育有三女。已全身退出娛樂圈的她， 12年在吉隆坡投資開設 Crazy Potato薯條專賣店做老闆娘。
撰文、攝影、攝錄：娛樂組
|
鍾意就快D Share啦！
|
|
|