娛樂偵訊
《阿郎》重生 李健達減五十磅再唱
倒帶 26年，李健達當年主唱兼填詞電影《阿郎的故事》片尾曲《也許不易》彈出，唱片一出已賣白金數量，之後的《天若有情》和寫給徐小鳳的《變色感情》亦大爆，卻因唔聽話，被公司掟入雪櫃，自此近乎銷聲匿跡。去年仍是個二百磅肥佬的他，健康出現問題，聞到棺材香，決定減肥做運動，早前更因為幫失婚江欣燕搞新歌而傳出緋聞，李健達復出之路，愈行愈近。
教嘉樂毛姐唱歌
這些年，匿在幕後搞音樂做製作的李健達，一三年出唱片《久音真經》，今年又計劃開演唱會，決定走上舞台，因為一班挑戰他「教咗咁多，點解老師唔出碟」的學生推動，其中有藝人錢嘉樂、毛舜筠以及緋聞女友江欣燕。
「毛姐唱歌係得嘅，因為係最佳女演員，佢驚俾人話又拍戲又唱歌好模糊，但佢有興趣同鬥志，呢點最重要。（錢）嘉樂係我遇過嘅其中一個奇跡，佢係武師又係演員，仲要係獎門人嘅護法，好多身份，佢最初搵我，我都話要觀察吓，但點知佢咁犀利，可以由零去到咁快，鬥志好高，只係用咗兩個月時間，就可以喺演唱會自彈自唱。至於江欣燕不嬲都係雙棲，所以冇問題。」李健達說。
對於緋聞女友，李健達說江欣燕比他出道早，應該是師姐，去年有機會合作，二人有講不完話題。
「我幫佢一手包辦《 M Club》首插曲，今次合作，我發覺佢好似梅姐（梅豔芳），所以特別好傾，我哋又可以講番以前梅姐、哥哥（張國榮）嘅事。唔知會唔會拍拖，我比較 old school，都係要由朋友開始做起。」
二百磅企唔穩
去年跟江欣燕傳緋聞時，李健達仍是個徘徊在二百磅的肥佬，朋友形容佢「幾得意」，但因為過胖，身體機能出現問題，有次由北京工作返香港，忽然整個人平衡唔到，幾乎跌低。
「二百磅嘅人跌一跌好危險，醫生 check咗話我耳水不平衡，但食完藥都冇改善，之後就驗到有糖尿病、高血壓。當時要食好多藥，但食咗一個月都冇起色；我開始做運動，同時睇好多書，尤其有關草本藥，醫生又推介我做一種高速運動，加埋改變飲食習慣，兩個月內減到一百七十三磅。我走啱方向，又肯落功夫，好快就行得番，唔再一行就見暈。」現時一百五十磅。
大學讀心理學，李健達明白病痛跟心理是互相影響，健康差，情緒自然不好。
「我當時未到黐線，但肯定唔算正常，因為平衡唔到，成日都好驚，應該有抑鬱。」李健達說。
撰文、攝影、攝錄：娛樂組
|
鍾意就快D Share啦！
|
|
|