熱爆娛樂: 老公撩女肉緊打茄輪　林雅詩見相崩潰 [壹週刊

2015年11月12日星期四

老公撩女肉緊打茄輪　林雅詩見相崩潰 [壹週刊 - 1340] 林雅詩,M1,

林雅詩老公送到小三屋企樓下，兩個慾火上升，嘴完又嘴，當街啜爆。點親熱，林雅詩老公都華 Dee上身，騎實電單車。

娛頭

老公撩女肉緊打茄輪　林雅詩見相崩潰

息影 12年，人妻林雅詩失驚冇神行舊路，拋胸出性感寫真搵錢，又自揭家事，嫁鋼閘商人溫文英十年，住千萬西貢獨立屋純粹表面風光，兩夫婦已分房瞓五年，關係瀕臨破裂，要復出鋪定後路。

上週，本刊發現被指在睡房內擺陣壓制另一半的林雅詩老公背妻偷食，與「扒版姜麗文」小三騎住慾火綿羊仔，周街打茄輪。老公搞女事實擺在眼前，林雅詩崩潰痛哭，忍無可忍，即日執埋行李走。

廟街偷食

人妻身份復出拍性感寫真，揭示林雅詩十年婚姻見紅。

當日同商人老公溫文英奉子成婚，結果換來一殼眼淚，自爆多年受盡精神虐待，就算 keep到副「偈」索一索，一樣無助夫妻關係，兩公婆分房瞓，五年冇行埋過。

被長期冷待，守生寡的林雅詩更加無勇氣面對老公早有外遇的

事實。

上週六（十一月七日）傍晚，林雅詩老公溫文英放工離開位於大角咀的公司後，男人老狗揸住架綿羊仔到鴨寮街買嘢，其間一副含春樣聽 WhatsApp留言。買完嘢再落佐敦等人，十五分鐘後，小三終於現身。家有火辣索妻掂都唔掂，溫文英原來鍾意「鋸扒」，一見「扒版姜麗文」小三即笑晒，細心為對方戴上頭盔，再開車踩去附近廟街大牌檔撐枱腳。數口精的溫文英，滾女都要慳住荷包。

愈諗愈嬲再回應：

睇到小三個樣好嘩然，估唔到老公搵件咁嘅嘢！應該搵個好過我，唔係差到咁，眼光去到咁低！（真實對白）

本週一，去完超市買餸嘅林雅詩，睇到老公偷食相，當場激動爆喊，且說：「佢仲成日鬧我。」

即日執嘢走

睇完相，傷心的林雅詩當日下午即執拾細軟，一袋二袋又拖喼，在傭人陪同下返銅鑼灣娘家。

小三送波送嘴

話晒係人老公，同小三行去醫肚時刻意一前一後，保持警覺。直至飯後飽暖，慾火上漲，送小三返將軍澳，將綿羊仔停低在幽靜路旁，二人嚟料！

臨別主動送波挨實的小三，進擊啜爆人夫；當咗自己係《天若有情》華 Dee的溫文英，一邊親熱一邊死騎住部綿羊仔。打完茄輪，未捨得走！再痴纏傾多陣，其間「扒版」小三再出擊，嘴多啖先講拜拜！同小三依泣近四粒鐘，林雅詩老公才揸車返西貢屋企。

慾火綿羊仔

送到女方樓下，兩個傾足半粒鐘難捨難離，其間進擊的小三摸吓林雅詩老公屁股。

當晚林雅詩老公放工去佐敦會合小三，還細心為她戴上頭盔。

家用得五千

據了解，住大屋、揸 Benz的溫文英睇錢好緊，豪己不豪人！食住老婆性格怕事懦弱，家用九年來維持每月五千，令婚後當家的林雅詩要用自己積蓄補貼過活，私己錢亦使得七七八八。

「除咗個仔學費另計，佢每個月俾 Grace（林雅詩）五千蚊家用，包晒買餸煮飯同零用。 Grace想俾個仔學多一兩樣課外活動，阿 Man（溫文英）一係唔俾，一係就黑晒口面要睇佢面色攞。有時買多幾個餸，佢都會話：『做乜咁大使！』

「對住老婆石頭鑽血，自己就點都得，買模型幾千蚊諗都唔諗，近年佢仲迷上玩泰國佛牌，十萬八萬幾貴都捨得。呢一年， Grace吵晒大鑊，佢先肯將家用加到一萬蚊。至於西貢間屋寫 Grace同阿 Man媽咪名，都係因為當年佢孭咗單官司喺身，而唔係送間屋俾老婆。」知情者爆。

一三年，林雅詩曾在微博放上婚戒相，寫上：「點解要咁對我！」自爆有產後抑鬱，卻得不到老公安慰；有小三後，溫文英對林雅詩的態度更變本加厲。

「近年阿 Man成日喺屋企發脾氣， Grace提出離婚，佢又扮晒嘢係咁氹。有次吵大鑊，阿 Man刻薄到爆咗句：『唔好諗住離婚分到我身家。』點解佢唔肯離婚，就係怕要分身家俾老婆。」

37歲人妻林雅詩近日寫真索味依舊，為自己鋪定後路。

「扒版姜麗文」跟林雅詩老公溫文英在廟街撐枱腳，點菜時有商有量。對老婆孤寒的溫文英，當晚點了龍蝦伊麵餵飽小三，對外遇好過老婆。

05年林雅詩與拍拖三年的溫文英奉子成婚，當時溫文英表示要她生三名子女，還承諾每生一個送一層樓，可惜婚後即變了臉。

林雅詩誕下兒子後產後抑鬱，但老公對她並不體諒，二人感情日淡， 13年她在微博放婚戒相，並感嘆：「點解要咁對我！」

冇得再挽救

本週一（九日），林雅詩如常一早湊仔返學再去買餸。記者上前問她與老公關係如何，她仍說 OK！但當見到老公偷食相，林雅詩不由自主地抖震，泣不成聲。

問她有否懷疑老公外面有小三，她點頭說：「我有問佢點解咁夜返，佢話做嘢忙，仲轉頭鬧番我話我都係咁。近排出書多 job，但去邊同邊個食飯我都有同佢匯報，甚至歡迎佢同我一齊，但佢冇……（爆喊）仲惡人先告狀。佢成日夜返，我啲朋友都知，晚晚為等佢要十點後先開飯。（上週六佢同女友食埋飯先返屋企。）嗰晚佢十一點返到嚟，返嚟當冇事照同我食飯。」

對於多年只得幾千蚊家用，林雅詩並不否認。

「只可以講要爭取，但就算俾，態度都唔係咁好，會黑面。好多嘢要俾單證明，好似個仔睇醫生，要俾張單佢 check，好似公司開數咁。」

林雅詩左手腕上有一道離奇傷痕，問她是否因為婚姻不如意而自殘，她又再一次崩潰爆喊。

「我係發脾氣。我感覺唔止一次（偷食），但一路唔想發作，應該話唔想面對，所以一直忍住唔出聲。（會挽救定離婚？）之前嘗試努力挽回，但見到咁樣，相信今次好難唔離婚。」林雅詩說。

近期林雅詩復出，仍狀態甚佳，但她見記者時總用飾物遮住左手的離奇傷痕。

林雅詩參加 97年港姐入行，之後行性感殺入影圈，拍過多部電影。

日前接完兒子放學後，林雅詩單拖去街市買菜，其實過着一般家庭主婦生活。

林雅詩差不多每日都親自接送兒子返學，非常愛錫兒子。

當年林雅詩老公購入寶珊苑獨立屋時，因他涉及官非，所以物業以母親及妻子名義登記，但卻並非送給老婆，而馬德鐘之前亦是他們的鄰居。

老公疑似玩巫術

日前，林雅詩接受潘紹聰的《恐怖在線》訪問，大爆老公在家中養鬼仔、藏有大量泰國佛牌，又將動物乾屍放在睡房，疑似玩巫術。

「一年前，我覺得屋企好有壓迫感，成日想喊想死，不論喺房或廳都覺得有人望住我。沖涼又覺得有人偷窺，道門又會開開閂閂。有次媽咪嚟我屋企，我俾咗老公買嗰堆泰國佛牌佢睇，媽咪話：『唔好掂呢啲嘢，唔係整到個仔，呢啲唔係咁好嘅嘢！』

「一日後，媽咪喊住打俾我，話佢瞓覺俾鬼『責』，見到個皮膚黑黑嘅女人，『哄』埋佢塊面，再由佢眼珠入咗佢個身體。之後我哋做過幾場好大嘅法事，個師傅話我全屋都係鬼，起碼十五、六隻，仲要集中喺我間房。難怪當時個仔每到凌晨兩、三點就喊醒，話：『媽咪，我好驚！』佢見到有個人成日『哄』住佢，係冇面口嘅。」